Aj tkubʼ qximen tuʼn tbʼant jun tiʼ quʼn, nya noq kʼokel te jun witzikʼ moqa noq oʼkx qaj tuʼn tbʼant. Qa qaj tuʼn tbʼant jun tiʼ quʼn, il tiʼj tuʼn tbʼaj qbʼinchaʼn qten ex tuʼn qaqʼunan tiʼj.

Aj tkubʼ qximen tuʼn tbʼant jun tiʼ quʼn, jaku txi tiʼn chʼin ambʼil moqa jaku txi tiʼn nim ambʼil. Tuʼn tjapun twi jun qximbʼetz toj nim ambʼil, ax ikx kbʼantel junjuntl tiʼchaq quʼn.

Qa ma japun twi jun t-ximbʼetza, kʼonil jlu tiʼja tuʼn tok qeʼ tkʼuʼja tiʼjxa, che tel tbʼanel tamiwa ex mas ktzalajela.

Kʼokel qeʼ tkʼuʼja tiʼjxa. Qa ma kubʼ t-ximana tuʼn tbʼant jun tiʼ tuʼna ex qa ma bʼant tuʼna toj chʼin ambʼil, kʼonil jlu tiʼja tuʼn tbʼant mas tiʼchaq tuʼna. Ax ikx, kʼonil tiʼja tuʼn tten tipumala tuʼn texa kywitz junjun nya bʼaʼn in nok weʼya twitz tkyaqil qʼij, ik tzeʼn aj kyok ten txqantl qʼamalte teya tuʼn tkubʼ tbʼinchaʼna jun nya bʼaʼn.

Che tel tbʼanel tamiwa. Qkyaqilx qgan tuʼn qten kyukʼil xjal ojtzqiʼn kyuʼn tiʼ kxel kybʼinchaʼn toj kyanqʼibʼil ex in nok tilil kyuʼn tuʼn tjapun twi kyximbʼetz. Ax ikx, jaku ten tbʼanel qamiwbʼil tukʼil jun xjal qa ma qo aqʼunan junx tukʼil tuʼn tbʼant jun tiʼ quʼn.

Mas ktzalajela. Aj tkubʼ t-ximana tuʼn tbʼant jun tiʼ tuʼna ex in japun twi t-ximbʼetza, in kubʼ tnaʼna nim tzalajbʼil.

«Ngane tuʼn tkubʼ nximane tiʼ kxel nbʼinchaʼne, tuʼnju in najbʼen ambʼil wuʼne toj tumel ex tuʼnju at jun tiquʼn in nok tilil wuʼne. Tbʼanel aj tjapun twi jun qximbʼetz, ex aj qximen tiʼj, in xi qqʼamaʼn jlu: ‹Ma bʼant wuʼne› » (Christopher).

NABʼIL TOJ TYOL DIOS: «Qa at kyqʼiqʼ in xi tkeʼyin jun xjal, mintiʼ in xiʼ awal, ex qa at muj in xi tkeʼyin, mintiʼ in xiʼ chmol twitz tawal» (Eclesiastés 11:4).

Tuʼn tkubʼ t-ximana tuʼn tbʼant jun tiʼ tuʼna ex tuʼn tjapun twiʼ, bʼinchama jlu:

Ximana tiʼj tiʼ kbʼantel tuʼna. Tzʼibʼinkuya tkyaqilju taja tuʼn tbʼant tuʼna, yajxitl, ximana tiʼj alkye kxel tbʼinchaʼna tnejel.

Ximana tiʼj tzeʼn kxel tbʼinchaʼna. Bʼinchama jlu tiʼj teyele junjun tiʼchaq taja tuʼn tbʼant tuʼna:

• Tzʼibʼinkuya toj alkye ambʼil taja tuʼn tjapun twi t-ximbʼetza.

• Tzʼibʼinkuya tiʼ kxel tbʼinchaʼna.

• Ximana tiʼj alkyeqe nya bʼaʼn jaku tzʼok weʼya twitz ex tzeʼn jaku tzʼexa twitz.

Tzʼaqʼunana tiʼj. Nya il tiʼj tuʼn t-ximana tiʼj tkyaqilju jaku bʼaj qa naʼmx t-xi tzyet tuʼn taqʼunana tiʼj jun tiʼ. Tnejel, ximana tiʼj tiʼ kxel tbʼinchaʼna tuʼntzun tjapun twi t-ximbʼetza ex tzʼaqʼunana tiʼj. Yajxitl, ximana tiʼj jniʼ otoq bʼant tuʼna aj tikʼ chʼin ambʼil.

NABʼIL TOJ TYOL DIOS: «Aju xjal nej in kubʼ ten ximal tiʼj alkye tuʼn tbʼant tuʼn, bʼaʼn nneʼl te te» (Proverbios 21:5).