VAKUENDZE NA VAHUMBE
12: Vizango
VI CA LOMBOLOKA
Vizango ka via puile ngue vilota ni viuma vie ku lisolokela ngoco. Vunoni ku kala na vizango via vusunga, ca tondeka ku singaniekaho vuino, ku litombuesa kaha na ku lihakela kapandi.
Mu hasa ku lihakela vizango via ku puisamo mu matangua, visimano, vingonde, muaka ni ku tuvakana oho. Vizango via ntsimbu ya kama, tu hasa ku vi puisamo mu ku puisamo vizango via ntsimbu ya indende.
SEHO YA KALAHO
Ku puisamo vizango vienu, ci hasa ku kaniamesa vusamba vuenu, ku likaniamesa enu vavene kaha na ku vueza ku ndzolela yenu.
Ku mi kulahela: Ku puisamo vizango vi mua lihakela mu ntsimbu ya indende, ci ka mi hana ndzili ya ku puisamo vizango via ntsimbu ya kama. Cikuavo naua, ci ka mi hana ndzili ya ku lua na visoti via tangua na tangua, ngeci mua ntsindiye ya vakuenu ku sikola.
Vavusamba. Tu vose tua lema ku likuata vusamba na vantu va kala na vizango via cili mu muono ni nguetu, ve ku lihakela kapandi ka ku puisamo vizango viavo. Ca ku muenako, nga nenu na kavusamba kenu mua kala na vizango vimo lika kaha mu pangela hamo, vusamba vuenu vu ka kaniama.
Ndzolela. Mua vusunga, ku lihakela vizango na ku vi puisamo, ci ka mi vuisa ndzolela.
“Nja lema ku lihakela vizango, muomu vie ku nji kuasa ku kala na via vingi via cili via ku linga kaha na ku kala na vutumbe mu muono. Ca pua ca cili ku puisamo vizango viaco, muomu ce ku tu kuasa ku kala na ndzolela. Kaha mu tue ku tala ku nima, tue ku mona nguetu, kali-kali nja puisamo vi nja tondele.”—Christopher.
CITUME CA MU MBIMBILIYA: “Uze a tala luhundzi kali ka kuva; No uze a tala maselua kali ka tia.”—Ekelesiaste 11:4.
VI MU HASA KU LINGA
Talenu vimo vinanga vi hasa ku mi kuasa ku puisamo vizango vienu.
Vihangula. Sonekenu umo mukana ua vizango vienu. Kaha mu nima yaco, hangulenu cizango ca ku livanga ci mu tonda ku puisamo, ca mu civali, ca mu citatu kaha ngoco lika.
Ku liviukisila. Mu nkala cizango, lingenu evi:
-
Lihakelenu ntsimbu ya ku puamo na ku vi puisamo.
-
Liviukisilenu viose vi mua tondeka ku puisamo.
-
Singaniekenu ha visoti vi hasa ku izamo kaha na vati mu hasa ku vi vula.
Ntsimbu ya ku vi puisamo. Linga mu vi puisemo, ka ca tondekele ku singanieka ha tuviuma tuose-otuo. Lihulenu nguenu: Cinanga cika ca katete nja pande ku linga mu ku puisamo vizango viange? Kaha lingenu cose mu puisemo cinanga caco, na ku kavangeya ku suena cove omo muya na ku puisamo vinanga vi na hatako.
CITUME CA MU MBIMBILYA: “Visinganieka via mukua ku takama vi tuala ku vuingi.”—Visimo 21:5.
