Tla tikneki itlaj tikchiuas, moneki tikitas ken tikchiuas, keman tikchiuas uan noijki timochijchikauas.

Xamo ualeua tiuejkauas kanaj seki tonal, seki metstli noso seki xiuitl para tikchiuas tlen tikneki. Tla sapanoua uejkauas tlen tikneki, yolik xikchijti nochi tlen moneki.

Ijkon tikitas uelis tikchiuas tlen tikneki, okachi kuali timouikas iuan oksekimej uan noijki tiyolpakis.

Tikitas uelis tikchiuas tlen tikneki. Tla tikchiua tlen tikijtoua, noijki uelis tikchiuas okseki tlamantli tlen okachi ipati. Noijki amo tikchiuas tlen amo kuali ijkuak oksekimej kinekiskej ijkon xikchiua.

Okachi kuali timouikas iuan oksekimej. Miakej kinpaktia mouikaskej iuan akinmej kinpaktia mochijchikauaskej kichiuaskej tlen kinekij. Noijki okachi kuali timouikas iuan oksekimej tla san sekan nanmochijchikauaj nankichiuaskej tlen nankinekij.

Tiyolpakis. Tla tikchiuas tlen tikneki, tiyolpakis.

Se telpochtli tlen itoka Christopher okijto: “Nechpaktia nikijtos tlen nikchiuas porque ijkon nimochijchikaua uan noijki amo nimotonalpoloua. Kuali nimomachilia ijkuak nikchiua itlaj tlen oniknekiaya”.

PRINCIPIO BÍBLICO: “Akin kita ejekatl amo tlatokas uan akin kita mixtli amo pixkas” (Eclesiastés 11:4).

Tla tikneki tikchiuas tlen yotikijto, ijkin xikchiua.

Xikpejpena tlen tikneki tikchiuas. Xikijkuilo tlen mitspaktiskia tikchiuas uan satepan xikijto ken tikchijtias.

Xikijto ken tikchiuas. Ijkin xikchiua:

• Xikijkuilo keman tikneki tikchiuas.

• Xikijkuilo ken tikchijtias.

• Xikijkuilo tlen uelis panos uan tlen tikchiuas.

Xikchiua tlen yotikijto. Amo moneki nochi tikyektlalis tla tikneki itlaj tikchiuas. Ximokuayejyeko tlen moneki tikchiuas uan xikchiua. Ijkuak itlaj yotikchi, xikita tlen okseki tlamantli tikchiuas.

PRINCIPIO BÍBLICO: “Kuali kisas tlen kichiua akin kipaktia tekipanos” (Proverbios 21:5).