BATJHA
12: Di Goal
SEO SE BOLELANG?
Dintho tseo o batlang ho di finyella kapa di goal, ha e ya lokela hoba ditoro feela. O lokela ho di rera e sa le pele, o fetohe le maemo o be o etse boiteko ba ho di finyella.
Ho na le di goal tse ka nkang matsatsi, dibeke, dikgwedi, selemo kapa ho feta. Hanyane hanyane, ipehele di goal tse kgutshwanyane tse tla o thusa hore o finyelle di goal tse kgolo.
KE HOBANENG HA E LE HA BOHLOKWA?
Haeba o kgona ho finyella di goal tsa hao, seo se tla etsa hore o itshepe, o ntlafatse setswalle sa hao le batho ba bang le hore o thabe.
Itshepe: Haeba o ipehela di goal tse nyane mme o di finyella, seo se tla etsa hore o batle le ho finyella tse kgolo. Ebile o tla kgona le ho sebetsana le mathata ao o kopanang le ona letsatsi le letsatsi, jwalo ka ho hlola kgatello ya dithaka.
Setswalle: Batho ba thabela ho etsa setswalle le batho ba batlang ho finyella dintho tse itseng bophelong. Ho feta moo, tsela e molemo ya ho etsa setswalle ke haeba o etsa setswalle le batho ba nang le di goal tse tshwanang le tsa hao mme le sebetsa mmoho ho di finyella.
Thabo: O tla thaba haeba o ipehela di goal ebile o di finyella.
“Ke rata ho ipehela di goal. Di etsa hore ke batle ho finyella ho itseng. Ha o finyelletseng goal e itseng, seo se etsa hore o re ‘ha ke kgolwe hore ke finyelletse goal ena!’”—Christopher.
MOLAOMOTHEO WA BIBELE: “Ya shebellang moya a ke ke a jala peo; mme ya tadimang maru a ke ke a kotula.”—Moeklesia 11:4.
SEO O KA SE ETSANG
Mehato e latelang e ka o thusa hore o finyelle di goal tsa hao.
Hlophisa dintho. Ngola dintho tseo o batlang ho di finyella mme o kgethe tseo o batlang ho qala ka tsona.
Rera e sa le pele. Etsa dintho tse latelang ka goal e nngwe le e nngwe:
-
Beha nako eo o tsebang hore o tla be o finyelletse goal ya hao.
-
Ngola mehato eo o lokelang ho e latela.
-
Nahana ka dintho tse ka o sitisang le hore na o ka di hlola jwang.
Nka bohato. O se ke wa batla ho qala ha dintho di se di le hantle. Ipotse, ‘Ke lokela ho qala kang e le hore ke finyelle goal ya ka?’ Ha o se o tseba, qala ka yona. Hlahloba hore na o se o le hole ha kae le ho finyella goal ya hao.
MOLAOMOTHEO WA BIBELE: “Ka sebele merero ya ya kgothetseng e tlisa molemo.”—Liproverbia 21:5.
O ka Nna wa Rata le Tsena
SEO BATJHA BA BANG BA SE BUANG
Tsela e Molemo ka ho Fetisisa ya ho Phela
Na o batla ho thaba bophelong? Mamela ha Cameron a re bolella hore na keng e mo thusitseng hore a thabele bophelo sebakeng seo a neng a sa labella hore o tla dula teng.
BATJHA BA A BOTSA
Nka Kgetha Role Model e Nepahetseng Jwang?
Role model e ka o thusa hore o qobe mathata mme o fihlele seo o se batlang. Empa o lokela ho latela mohlala wa mang?
