A te fakamoemoega e se pelā me se moemiti—se mea telā e mafaufau koe ke taunu. A fakamoemoega ‵tonu e aofia i ei te faiga o palani, e uiga faigofie, mo galuega kolā e manakogina ke fai faka‵lei.

A fakamoemoega e mafai foki o fai i se taimi toetoe ke ga‵lue ki ei (ne aso io me ne vaiaso ke taunu), io me tai leva malie (masina), io me leva atu (se tausaga io me tai leva atu). A fakamoemoega kolā e fai mo se taimi leva e mafai o taunu māfai e fakataunu a fakamoemoega fo‵liki.

Te fakataunuga o fakamoemoega e fakamalosi i ei a tou loto talitonu ki a koe eiloa, tou vā fakataugasoa mo nisi tino, kae fakalasi foki ne ia a tou loto fiafia.

Loto talitonu: Kafai e fakamoe ne koe a tamā fakamoemoega kae fakataunu ne koe, ka loto talitonu koe ke kausaki atu ki fakamoemoega tai ‵lasi atu. Kae ka malosi foki a tou loto talitonu o fakafesagai atu ki fakalavelave kolā e fe‵paki mo koe i aso takitasi—e pelā mo fakamalosiga ma‵sei mai taugasoa.

Taugasoa: E fia‵fia loa a tino o fakatasi mo latou kolā e isi ne olotou fakamoemoega—ko latou kolā e iloa ne latou a mea e ma‵nako latou ki ei kae fiafia eiloa latou o kausaki ki ei. E se gata i ei, e tasi o auala e fakamalosi aka ei a te va fakataugasoa ko te ga‵lue fakatasi mo te tino telā e ‵pau lua fakamoemoega.

Te fiafia: Kafai e isi ne ou fakamoemoega kae ne taunu, e maua eiloa ne koe te lagonaga lotomalie me ne taunu eiloa ou fakamoemoega.

“E fiafia eiloa au ke isi ne oku fakamoemoega. E fesoasoani mai ke fakalavelave au mai te kausaki malosi ke fakataunu oku fakamoemoega konā. Kae kafai ko taunu se fakamoemoega, e fiafia malosi au kae fai atu penei, ‘Tapa, ko taunu eiloa aku palani! Ko taunu te mea ne fakamoemoe au ki ei.’”—Christopher.

FAKATAKITAKIGA MAI TE TUSI TAPU: “Kafai e faka‵tali a koe ke malū te matagi kae ke ‵lei te ‵tau o te aso, e seai eiloa sau mea e ‵toki kae ka seai foki ne au fuataga e tau.”—Failauga 11:4, Today’s English Version.

Tautali i auala konei ke fai kae ke kausaki ki ou fakamoemoega.

Ke iloilo muamua. Ke fai se fakasologa ki ou fakamoemoega kolā e fakatāua ne koe— kae ke filifili aka a fakamoemoega kolā e manakogina ke saga muamua koe ki ei kae ke penā foki mo nisi fakamoemoega aka.

Palani. Mō fakamoemoega takitasi konei, ke fakagalue a mea konei:

• Ke fakamoe te taimi tonu telā e talitonu koe e mafai o fakataunu au fakamoemoega.

• Fai sau palani ki mea kolā ka aofia i loto i te fakatokaga tenei.

• Ke lavea foki ne koe a fakalavelave kolā e mafai o ‵sae aka, mo te auala e mafai ei ne koe o manumalo i fakalavelave konā.

Ke na gasue. Ke moa eiloa e faka‵tali ke maua ne koe a mea liki‵liki e uiga ki fakatokaga konei ko fatoa gasue ei koe. Fesili ifo ki a koe, ‘Se a loa a te mea muamua e ‵tau o fai ne au ke taunu oku fakamoemoega?’ Kae ke fai eiloa a te mea tenā. Ke onoono faka‵lei ki mea takitasi kolā ne galue a koe ki ei ke lavea atu a tou gasolo ki mua.

FAKATAKITAKIGA MAI TE TUSI TAPU: “A palani a tino ga‵lue malosi e manuia eiloa.”—Faataoto 21:5.