DAꞌRA NORĨ MA
12: Ãma ĩꞌuwaimramidzéb da pitsutu
E MARĨ TE WATSUꞌU.
Ãma ĩꞌuwaimramidzé pitsudu taré robꞌruiwaparidzéb õ di. Marĩ ĩꞌuwaimramidzéb da hã te dza atsima ĩrowaꞌõ, te dza atsipe duré te dza tsô atsiwatsu.
Wa te ãma ĩꞌuwaimramidzé pitsudu ahö di. Nima norĩ hã ãma ronomro petse õ di bötö norĩ ꞌrep tsi, niwamhã romhuri norĩ ꞌrep tsi wa te ãma uwaimrami dzaꞌra da. Nima norĩ hã te dza tironomro petse aꞌö, ãté aꞌamo norĩ ꞌrep tsi wa te ꞌmanharĩ dzaꞌra da. Duré nima norĩ hã te tironomro petse, mitsi wahu te dza ãma aiꞌutõ niwamhã ĩtsipai u. Ãma ĩronomro petse norĩ wa te uwaimrami dzaꞌra da, ĩtsuru hã wa te ĩꞌuwaimrami dzaꞌra da tsi aꞌö.
E MARĨ WA WẼ DI.
Ãma ĩꞌuwaimramidzé pitsutu na ãma uwaimrami wamhã te dza atsipte atsiwaihuꞌudzé daꞌãma hã. Tahã te dza duré aipawapto danhipai u atsiꞌumnhatsi da duré atsima robdze da.
Datsiꞌumnhatsidzé: Ãma ĩꞌuwaimramidzé pitsudu ĩtsuru na ãma uwaimrami wamhã, te dza atsiꞌumnha dza ãma ĩꞌuwaimrami na hã ĩtsaꞌẽtẽ norĩ dzama. Atsiptete na te dza ĩꞌwapé ropire norĩ aima ĩhöimana hã, ãma ĩtsimiré atsiré norĩ nhimiwatidzé.
Datsiwaihuꞌudzé: Datsiꞌubumro dze ti da te datsima ĩwẽ dzaꞌra dzéb dzô ĩdatsiꞌwapé dzaꞌra norĩ ꞌratamhã. Ãma ĩtsimiré, a hã duré atsiwaihu tô marĩ dzô ꞌre atsõpré aba mono wamhã, tsimitsutu atsiré romhuri aba wamhã ãma uwaimrami aba da, te dza ĩtsiptete waꞌwa atsiwaihuꞌu aba dzé.
Robdzedzé: Ãma ĩꞌuwaimramidzé pitsutu na ãma uwaimrami wamhã aima robdze ti.
“Ĩ̱ma wẽ uptabi di te ãma ĩꞌuwaimramidzé hã dza te ĩ̱tsima pitsutu wamhã. Ãne na hã marĩ ĩwẽ na wa ĩ̱nhiꞌwaꞌrutu duré taré ꞌre ĩ̱höimana mono õ di. Ĩpitsutudzé ãma uwaimrami wamhã te ꞌröwi ĩrotsaꞌra: ‘E niha ĩwẽ! Wa tô ãma uwaimra te ĩ̱tsima ĩpitsutudzé.’” — Christopher.
ROPOTOꞌWAI MREME NHIMIROTI: “Niꞌwa ꞌre tsimipari dzei mono wamhã rowaꞌu tsitsaprĩ da duré höiwa wẽ dzô, niwa te te dzuri õ di dza duré marĩ te te ubumroi õ di dza.” — Eclesiastes 11:4, Bíblia na Linguagem de Hoje.
E MARĨ TE DZA ĨꞌMANHA.
ꞌManharĩ marĩ norĩ piꞌrebamhã ãma ĩꞌuwaimramidzé pitsutu norĩ na ãma uwaimrami da.
Pitsutu wẽ na. Tsihötö ãma ĩꞌuwaimramidzé pitsutu norĩ atsima ĩpitsudu hã. Pitsutu ĩmorĩꞌrada hã ãma ĩꞌuwaimrami da, taha parimhã maparane ãma hã, tsiꞌubdatõ ãma hã, duré ãne na mitsi tsidöpötsi.
Rowaꞌõtõ wẽ na. Ãma ĩꞌuwaimramidzé pitsutu mono da hã, ãne te dza ĩꞌmanha:
-
Atsimidzaꞌretse na pitsutu e niha bötö ꞌre te dza ãma ĩꞌuwaimra.
-
Rowaꞌõtõ marĩ ĩꞌmanharĩ mono dzéb da hã.
-
Atsitsõwa rotsaꞌrata ropire atsô ĩwairébé da hã duré e niha te dza ãma ĩꞌaiꞌuté dzaꞌra.
Ãma tsãnaꞌrata pé. Rotsaꞌrata õ di dza marĩ mono na ãma tsãnaꞌrata wana ré. ꞌRöwi rotsaꞌrata: ‘E mahã ĩmorĩꞌrada te ãma ĩꞌuwaimrami da hã.’ Tawamhã ãma tsãnaꞌrata duré tsihötö mono ĩꞌmanharĩ pari dzé hã ꞌre ꞌmanharĩ mono tsidöpötsi.
ROPOTOꞌWAI MREME NHIMIROTI: ‘Niꞌwa atãma na marĩ na te te tsima ãma ꞌre ĩrowaꞌõtõ wẽ mono hã te dza marĩ tsiꞌutõrĩ ãna tsaꞌẽtẽ na tsa ꞌre tsimiꞌwara.’ — Provérbios 21:5.
