Maski seki motelmachtianij ika tajtouaj tayokol tein se kipanotiuj keman aksa momikilia, tataman kemej se kinextia. ¿Kijtosneki nejin ke sekin amo semi motayokoltiaj oso amo kinextiaj tein kimachiliaj? Amo. Xa tapaleuis komo se kijtoua ke se tayokoya uan se kinextis, sayoj ke amo ixyetok sayoj se taman kemej uelis tikxikoskej tayokol. Tein momattokej kichiuaskej kampa tinemij, kemej titamatij, tein tikpanouaj uan kemej momikilij akin tiktasojtaj, uelis techpaleuis maj tikxikokan totayokol.

Akin tayokoxtokej porin momikilij aksa akin kitasojtaj xa amo kimatiskej ouijkayomej tein monekis kiixnamikiskej satepan. Sayoj ke, onkak seki taman tein se kimachilia uan ouijkayomej tein se kipia. Maj tikitakan seki:

Semi se motayokoltia. Miakpa akin tayokoxtok semi choka, kitemoua akin momikilij uan niman mopata kemej momachilia. Tein kikochita oso tein kielnamiki uelis okachi kitayokoltis, yekinika amo kimatis tein kichiuas oso amo kineltokas tein panok. Tina kijtoua keniuj momachilij keman amo kichiaya maj momikili itakauj: “Amo nikmatia toni nikchiuas. Hasta nion uelia nichokaya, semi nimotekipachouaya hasta amo uelia nimijyotiaya. Amo uelia nikneltokaya tein panoka”.

Semi se motekipachoua, se kualani uan se motajtakoltia. Iván kijtoua: “Keman momikilij tokonetsin Eric akin kipiaya 24 xiujmej, nosiuatsin Yolanda uan nejua uejkauak tikualantoyaj. Hasta tikmoujkaitakej porin achto amo niman tikualaniaj. No semi timotajtakoltiayaj porin timotajtaniayaj ox ueliskiaok tikpaleuiskiaj tokonetsin”. Alejandro no motajtakoltiaya porin momikilij isiuatsin akin uejkauak mokokouaya. Yejua kijtoj: “Yekinika niknemilij ke xa Dios kikaujtoya maj nitajyoui porin amo niyolkuali. Ompa, amo kuali nimomachilij porin kemej yeskia niktajtakoltijtoya Dios tein panoka”. Uan Kostas, akin achto ika titajtojkej, kijtoua: “Kemansa nikualania iuan Sofía porin momikilij. Ompa, amo kuali nimomachiliaya porin niktajtakoltiaya”.

Ouij se yektanemilia. Kemansa miak taman se kinemilis tein amo taixejekol. Xa akin tayokoxtok kinemilia ke kikaki, kimachilia oso ke kiita akin momikilij. Xa kiouijmakas yektanemilis oso amo kielnamikis seki taman. Tina kijtoua: “Keman nitajtojtoya iuan aksa nikitaya ke nitanemilijtoya itech okseki taman. Nochipa ika nitanemiliaya tein kipanok Timo. Semi nimotekipachouaya porin amo niyektanemiliaya”.

Tiktemoskej tietoskej toselti. Aksa amo kuali momachilis maj yeto iniuan oksekin komo momikilij aksa akin kitasojta. Kostas kijtoua: “Keman nietoya iniuan akin kipiaj inintakauj oso ininsiuatsin, amo kuali nimomachiliaya. Sayoj ke no ijkon nimomachiliaya keman nietoya iniuan akin ininselti”. Yolanda, isiuatsin Iván, kijtoua: “Ouij nechkisaya nietos iniuan oksekin akin kijtouayaj ininkuejmoluan tein tikitayaj ke amo uejueyi katkaj kemej tein tejuan. Oksekin techiluiayaj keniuj ininkoneuan kuali yetoyaj. Nechyolpaktiaya maj kuali yetonij, sayoj ke ouij nechkisaya nikinkakis. Notakauj uan nejua tikmatiaj ke monekia tiksentokaskej timochikauaskej, sayoj ke amo tiknekiaj uan tiyolijsiuiaj”.

Se kokolispeua. Xa mopatas kemej tietikej, kemej titakuaj uan kemej tikochij. Aarón kijtoua tein kipanok yekinika xiuit keman momikilij ipopaj: “Amo uelia nikochia. Mojmostaj youak niijsaya uan ika nitanemiliaya tein kipanok nopaj”.

 Alejandro kielnamiki ke peuak mokokoua uan amo kimatia keyej. Yejua kijtoua: “Miakpa nikitato tapajtijkej sayoj ke yejua kijtouaya ke amo nimokokouaya. Nikmatik ke tayokol kichiuak maj nikokolispeua”. Maski Alejandro iselti pajtik, semi kuali maj yani iuan tapajtijkej. Tayokol uelis kichiuas maj tikokolispeuakan oso maj okachi tikmachilikan kokolis tein tikpiajya.

Ouij techkisas tikchiuaskej seki tekimej. Iván kijtoua: “Keman momikilij Eric, amo sayoj monekik tikinmatiltiskej tochankauan uan akin kuali iniuan timouikaj, no monekik tikiniluiskej oksekin, kemej kampa tekitia uan kampa nemia. Monekik tikpexontiskej miak amamej tein tajtanij tekiuanij. No monekik tikitaskej seki taman tein Eric iaxka katka. Para tikchiuaskej nochi nejin monekia tiyektanemiliskej, sayoj ke amo tiueliaj porin semi tisioujtoyaj uan amo kuali timomachiliayaj”.

Sayoj ke, sekin okachi ouij kinkisa satepan, keman moneki kichiuaskej seki taman tein achto kichiuaya akin momikilij. Yejua nejon kipanok Tina. Yejua kijtoua: “Notakauj kiitaya nochi tein monekia itech banco uan okseki taman tein monekia se kiixtauas, uan axkan nejua monekia nikchiuas. Nejon kichiuak maj okachi nimotekipacho. Nimotajtaniaya ox ueliskia nikchiuas nochi”.

Keman tikitaj nochi tein se kipanoua, tein se kimachilia uan se kinemilia, xa moitas ke amo se kixikos maj momikili aksa akin tiktasojtaj. Maski semi tetajyouiltia, se kimatis tein uelis se kipanos, uelis kinpaleuis akin yankuixtok momikilij aksa akin kitasojtaj. Xikonelnamiki ke amo nochin ijkon kinpanoua keman motayokoltiaj. Uan no, uelis kinyolseuis kimatiskej ke ipa ijkon se momachilia keman momikilia aksa akin tiktasojtaj.

Tein uelis mitsonpanos. Ueyi tayokol tein tikonpanotok amo uejkauas porin yolik kuali tionmomachilijtias. Nejin amo kijtosneki ke senkis amo keman tiontayokoyasok oso ke tikonelkauas akin tikontasojtaya. Uelis yolik poliuis tayokol, sayoj ke xa oksepa tiontayokoyas keman tikonelnamikis seki taman oso itech tonalmej keman nankisenchiuayaj teisa. Sayoj ke, keman panoua se tiempo, sekin oksepa kuali momachiliaj uan ueli kichiuaj tein momattoyaj kichiuaskej. Nejin uelis panos komo kichiuaj tein kinpaleuis maj kixikokan tayokol uan komo ininchankauan oso akin kuali iniuan mouikaj kinpaleuiaj.

¿Uejkauas? Sekin sayoj seki metsti amo kuali momachiliaj uan miakej peua kuali momachiliaj keman panoua se oso ome xiuit. Uan sekin uelis okachi uejkauas. * Alejandro kijtoua: “Semi nimotayokoltij kemej eyi xiuit”.

Amo xionyolijsiui. Xikonchiua seki taman kemej tionueltias. Xikonelnamiki ke amo nochipa tiontayokoxtos. Sayoj ke, ¿uelis tikonchiuas teisa para amo semi tiontayokoyas uan amo uejkauas?