Ixtlamatkej kijtouaj tlatlamantli kimachiliaj akinmej moyolkokouaj porque oixpoliuik akin okitlasojtlayaj. ¿Kijtosneki oksekimej amo okachi moyolkokouaj uan amo kijtouaj tlen kimachiliaj? Amo ijkon. Pero ijkuak tikinmiluiaj oksekimej ken timomachiliaj non uelis techpaleuis. Pero san seki tlamantli uelis kichiuas ayakmo ma timoyolkokokan. Porque tlatlamantli toaltepe, ken otechiskaltijkej, tlen yotechpanok uan ken oixpoliuik akin otiktlasojtlayaj.

Akinmej moyolkokouaj porque oixpoliuik akin okitlasojtlayaj, xamo amo kimatij tlen kinpanos. Ma tikitakan ken momachiliaj sekimej.

Amo kuali momachiliskej. Akinmej moyolkokouaj xamo chokaj, sapanoua kilnamikij akin oixpoliuik uan ualeua xamo hasta kualanij. Noijki ijkuak kilnamikij tlen okichiuaya uan kitemikij, xamo okachi amo kuali momachiliaj uan amo kineltokaj kox melauak oixpoliuik. Tina kijtoua ken omomachili ijkuak inamik oixpolitikiski. Ye okijto: “Amo onikmatiaya tlen nikchiuas ijkuak ijkon opanok, amo ueli onichokaya, amo ueli onimijyotiaya porque sapanoua onimotekipachouaya. Amo onikneltokaya kox melauak tlen onechpanotoka”.

Motekipachouaj, kualanij uan motlajtlakoltiaj. Iván okijto: “Ijkuak oixpoliuik totelpoch Eric tlen okipiaya 24 xiuitl, ouejka otikualantokaj pero tejuan amo ijkon otikualaniayaj. Otimokuayejyekouayaj xamo totlajtlakol tlen okipanok totelpoch uan otimotlajtlaniayaj tleka amo otikmaluijkej”. Alejandro noijki ualeua omotlajtlakoltiaya porque oixpoliuik isiua akin sapanoua omokokouaya, ye okijto: “Onimokuayejyekouaya toTajtsin Dios onechtlajyouiltiaya xamo porque amo niyolkuali. Satepan amo kuali onimomachiliaya porque onikijtouaya tlen onechpanotoka itlajtlakol toTajtsin Dios”. Kostas tlen itech yotimotlapouijkej itech okse tlamachtil okijto: “Ualeua onikualaniaya porque oixpoliuik Sofía pero satepan amo kuali onimomachiliaya uan onikajsikamatki ye amo itlajtlakol tlen okipanok”.

Oui kitaj mokuayejyekoskej ken moneki. Xamo mokuayejyekouaj kikakij, kimachiliaj uan kitaj akin oixpoliuik. Xamo noijki peua kilkauaj seki tlamantli uan mokuayejyekojtokej okseki tlamantli. Tina okijto: “Ijkuak ikaj iuan onimotlapouijtoka, satepan onikitaya okse tlamantli onimokuayejyekojtoka. San nochipa onimokuayejyekouaya tleka oixpoliuik Timo. Sapanoua onimotekipachouaya porque amo onimokuayejyekouaya ken moneki”.

Amo kinekij yetoskej iuan oksekimej. Ijkuak ixpoliui akin okitlasojtlayaj xamo san kualanij uan amo kinekij yetoskej iuan oksekimej. Amo kuali onimomachiliaya ijkuak onikatka iuan akinmej yokipiayaj innamik pero noijki ijkon onimomachiliaya iuan akinmej ok inselti. Isiua Iván tlen itoka Yolanda okijto: “Oui otikitayaj tiyetoskej iuan akinmej san okijtouayaj tlen okinpanotoka maski amo okachi otlajyouijtokaj ken tejuan. Oksekimej okijtouayaj kuali okatkaj inkoneuan. Oniyolpakiaya nikmatis kuali okatkaj pero ayakmo oniknekiaya nikinkakis. Nonamik uan ne otikmatiayaj amo omonekiaya san nochipa timoyolkokojtoskej pero oui ijkon tikchiuaskiaj”.

Peua mokokouaj. Noijki peua pitsauaj porque ayakmo tlakuaj uan ayakmo ueli kochij. Aarón okijto ken omomachili ijkuak oixpoliuik itajtsin: “Youak onijsaya porque onimokuayejyekouaya tleka oixpoliuik notajtsin”.

 Alejandro kijtoua amo omotaya kox omokokouaya: “Miak uelta onikitato tepajti uan onechilui amo onimokokouaya. Onimokuayejyeko xamo amo kuali onimomachiliaya porque onimoyolkokouaya”. Alejandro okipaleui ijkuak okitato tepajti. Akin moyolkokoua uelis peuas mokokos.

Kitaj oui kichiuaskej tlen okachi ipati. Iván okijto: “Ijkuak oixpoliuik Eric omonekiaya tikinmiluiskej tofamiliares, toyolikniuan uan oksekimej, kanin otekipanouaya uan noijki kanin ochantiaya. Noijki omonekiaya tikitaskej tlen tikchiuaskiaj ika tlen okipiaya pero amo kuali otimomachiliayaj uan otisotlauayaj porque otimoyolkokouayaj”.

Sekimej amo kuali momachiliaj porque axkan moneki kichiuaskej tlen okichiuaya akin oixpoliuik. Ijkon okipanok Tina, ye okijto: “Nonamik okitaya tlen omonekiaya tikchiuaskiaj ika tomin tlen otikpiayaj itech banco pero axkan omonekiaya ne nikchiuas uan non onechtekipachouaya porque onikijtouaya kox uelis nikchiuaskia tlen ye okichiuaya”.

Nochi tlen kinpanoua sekimej uelis kichiuas ma mokuayejyekokan nochipa san moyolkokojtoskej ijkuak ixpoliui akin okitlasojtlayaj. Akinmej yikin ijkon okinpanok, maski sapanoua moyolkokouaj uelis kinpaleuis tla kilnamikij ualeua amo kuali momachiliskej. Noijki moneki kilnamiktoskej amo nochtin momachiliskej ken yejuan . Akinmej moyolkokouaj porque oixpoliuik akin okitlasojtlayaj kinyolseuia kimatiskej amo san yejuan ijkon momachiliaj.

¿Tlen uelis panos? Tla axkan timoyolkokoua, amo nochipa ijkon mitspanotos. Satepan kuali timomachilijtias. Pero non amo kijtosneki ayakmo timoyolkokos uan tikilkauas akin oixpoliuik. Xamo timoyolkokos ijkuak tikilnamikis seki tlamantli tlen otikchiuaya iuan akin oixpoliuik. Miakej satepan kuali momachiliaj uan peua kichiuaj tlen achto okichiuayaj. Pero uelis ijkon kichiuaskej tla kinpaleuia infamiliares, inyolikniuan uan noijki tla mochijchikauaj para amo san moyolkokojtoskej.

¿Uejkauas ijkon nimomachilijtos? Sekimej san seki metstli moyolkokouaj uan miakej kanaj se noso ome xiuitl. Pero oksekimej xamo ok uejkauaj, kuali momachiliskej. * Alejandro okijto eyi xiuitl omoyolkojtoka.

Amo ximosotlaua. Ximochijchikaua san xikchiua tlen moneki. Xikilnamikto amo nochipa san timoyolkokojtos. Pero ¿uelis itlaj tikchiuas para amo nochipa ijkon mitspanotos?