Naamwi alipa ootholathola akina elocaka othanana mmukhalelo woohiyana hiyana, muchu ti muchu onathanana mmukhalelo awe. Apwanne ohiyana wa othanana wa achu onataphulela wi achu akina anavitha moonelo aya? Hooye. Eparipari wi weemererya echu yeeren’ye ni okhala oothanana enanwerya okhaviherya. Nto hiwaavo mukhalelo waphaama wa wooniherya othanana. Ikwaha ikina othanana oniiwanana ni yookhovelela, omuchu, ni mpuro muchu unnunweiyewo, hiiha ntoko ochuneya wa muchu yoowo okhwile.

Anaamukhwele akhweya hanasuwela tiheeni enawehereryeya amanle okhwa oosiveliwaaya. Nyenya, moonelo ni makacamiho makina tawunlaana nave ananwerya osepiwa woosiilo ene. Muthokororye masu anacharela:

Ohooseya mmuupuweloni. Wiikhupanyerya, winla ntakhara nookhwe, ni othanana onneereya. Eneereya hiiha nthowa na wuupuwelela naari oloha ichu seeparipari. Nave meerelo oopacerya akhweya ori oheemererya ni echu yeeren’ye. Tina, onnuupuwela meerelo awe iyawe aakhwileiye mootutuxa. Owo ooloca: “Wuupaceryani malaku yaakuma. Ophiyerya wi nkaawerya winla. Kaari oothananaxa ikwaha ikina kihinawerya omumula. Miyaano nkaawerya weemererya echu yeeren’ye.”

Wuukhuwa, esara, ni wiiphwanyerya mathowa ti sawunlaana. Ivani oriye: “Mu elukuluku ekina amanle okhwa mwanihu, Erik, a iyaakha makhumi meeli nasese, mwaaraka Yolanta ni miyaano naahitepa osarasareya! Ela yaahitepa ontikhiniha, woona wi hinintonko wuupuwela wi naahaala wiisoona okhala achu osarasareya. Naahiiphwanyerya mathowa, niikohaka waakhanle wi hinaahaala opaka echu wi nimukhaviherye mwanihu ahaakumve okhwa.” Alexantre, yoowo mwaariye okhwile ni ereca yootitelela, aahiiphwanyeryatho mathowa. Owo oriye: “Woopaceryani kaahuupuwela wi waakhanle wi Muluku oheemererya wi kihooseye vancipale, kinoona wi kamuchu oonanara murima. Voocharela kaahiphwanyerya mathowa, enakhala ntoko wi kaamukhupanya Muluku wa yeeyo yeeren’ye.” Nave Kosta, oromoliwe mmwaha ovirale, oriye: “Mu elukuluku vakhaani kaahisarasareya nthowa na okhwa wa Sofiya. Voocharela kaahiiphwanyerya mathowa wiisoona mmukhalelo yoola. Opwaha soothene, kaahoona wi hinaari nthowa nawe.”

Waakanyeryeya mmuupuweloni. Akhweya enamukhalavo elukuluku muupuwelo wa muchu onakhalaaya wawaakanyeryeya. Veelukuluku aya, muchu okhweliwe onamwaanyiherya wi yoole okhwile onnawerya wiiwa, naari woona. Naari muchu okhweliwe hanawerya okhala phaama naari wuupuwelela ichu. Tina ooloca: “Ikwaha ikina kaanachekula, nto muupuwelo aka hiwaakhala vaavale! Muupuwelo aka waakhala wawuutuweleya, kuupuwelelaka saweereya sa okhwa wa Aiyaka. Ilukuluku ikina kaanakhala awuukhuwa ni awaakanyeryeya mmuupuweloni.”

Nchuno na wiivalaanya ni akina. Muchu onathanana akhweya onamukhala oonyeenyeya naari ohikhala ootaphuwa akhala ni akina. Kosta ooloca: “Vaavaa kaakhalaaka ni atheli, yannakuupuweliha amwaaraka. Nto elukuluku kaakhalaka ni aciye, kaanapwahavo kiniiso kiri ni yaawo.” Mwaara a Ivani, Yolanta, onnuupuwela: “Waari woovilaxa okhala variyari va achu yaawo yiikhupanyerya vooloca sa makacamiho yaakhala ntoko oothananihaxa opwaha awihu! Navetho yaanakhalavo yaawo yaanileela oya vahoolo wa anamwane aya. Kaanahakalala ni yaawo, nave mu elukuluku emohamoha, waari woovila waawiriyana. Miyaano ni aiyaka noohiwexexa wi okumi onnarimeela, nto hinaano nchuno naari opixa murima wi nivoothe.”

 Makacamiho a okumi. Ohilya, ohokola wa mwiili, ni ohikona mwawaakhwanela ti sawunlaana. Aroni onnuupuwela eyaakha yoocharela emanle okhwa apapa awe. Owo ooloca: “Chiri kaahikhalano makacamiho a okona. Kaanavinya mu elukuluku emohamoha ohiyu ti ohiyu kuupuwelaka okhwa wa apapa.”

Alexantre aapacerya okhalano makacamiho a okumi. Owo ooloca: “Ikwaha sincipale kaahaalikheliwa ni totore, nave kaahileeliwa wi kamukumi. Kaanoona wi ineneeryo iho saakhumelela nthowa na othanana.” Veelukuluku aya ineneeryo iho saahirimeela. Naamwi hiiha, yoolakelela ya Alexantre ya omwaavya totore yaari echu yamiruku. Wiicela wa okhweliwa onnamukhulumula muchu, otepiha ereca mwaaryaanyuno, naari okhalano evyaani.

Makacamiho a opaka ichu sookhweleya. Ivani onnuupuwela: “Erik amanle okhwa, naaphwanela waaleela ohiya pahiru ahima ni asinthamwene, komatho achu akina, ntoko mutokweene awe a muteko ni mulipa empa aakhaleiyemo.” Saahikhalavotho ipaaxo sa malamulo naaphwanelaahu orepa. Voocharela naaphwanela orehererya ichu sa Erik. Soothene seiya onachuneya okhala phaama mmuupuweloni, xaxaxa vaavaa nnakhalaahu oovelavela mmuupuweloni, ni omwiilini.”

Nyenya wa akina, makacamiho anarwa ohoolo waya, vaavaa awo anapakaaya ichu seiyo saapakiwa ni oosiveliwa aya. Ti yeeyo yeeren’ye ni Tina. Owo onnathariha: “Aiyaka yaanathokororya soothowa sahu ni ichu ikina. Vano owo waari murici aka, yeeyo yaakeerinhe okhalaxa awuukhuwa. Apwanne kanwerya okhumelela phaama ni mukhalelo yoola?”

Makacamiho aromoliwe mmwaha yoola annooniherya wi ti woovila ovootha othanana. Eparipari ti yawi wiicela onakhalavo nthowa na omuyeleela oosiveliwa onakhala otokotoko, nto osuwela yeela woosiilo ene enanwerya waakhaviherya anaamukhwele wi evoothe. Muupuweletho wi tahi oothene anakumanano sookhumelela sa othanana woothene yoola. Koma, sookhalavo ichu ikina sinaahakalaliha yaale akhweliwe osuwela wi othanana otokotoko nthowa na okhweliwa echu eneereya.

Tiheeni Enawehereryeya: Othanana iwo honamaliha elukuluku yincipale; veelukuluku aya onnavukuwa. Ela henooniherya wi akina annakhala phaama naari omucuwala oosiveliwa aya. Nyenya, vakhaani vakhaani, mirala sa wiicela sinnavola. Ikwaha ikina othanana iwo onanwerya okhumelela vaavaa nnuupuwelelaahu elukuluku yammoori ntoko nihiku na yaweereya yoohakalaliha. Nto veelukuluku aya, achu ancipale annaphiyerya ophimelela moonelo aya nave enawerya oteteiwa mmiteko sa nihiku nnihiku. Ela eneereya xaxaxa wakhala wi naamukhwele onnakhaviheryiwa ni amusi naari asinthamwene nave eneera ichu ikina wi evoothe wiicela.

Ophiyerya liini? Wa akina, othanana onnavirelela mweeri. Wa ancipale, eyaakha emoha naari piili sinnavira ehaakumve okhala phaama. Nave wa akina anamuchuna elukuluku yincipale. * Alexantre onnuupuwela: “Wa miyaano, othanana waahititelela ophiyerya iyaakha raru.”

Mukhale oopisa murima. Muteteiweke ni ichu sa nihiku nnihiku, muhitakiheryeke meerelo a akina, nave musuwele wi othanana honi olekele. Apwanne sookhalavo ichu munaphwanelaanyu opaka wi mvoothe othanana hiihaano ni osepa ohooseya?