PENAMPAT MAN KALAK SI ERCEDA ATE

Penampat si Mehulina man Kalak si Erceda Ate

MAINKEN

BAS PUDI WARI ENDA, PERASAN CEDA ATE RUSUR JADI BAHAN PENELITIN. Bagi si ituriken ndai, saran si mehulina arah ahli-ahli si mpelajari kerna perasan ceda ate biasana cocok ras nasehat si mehuli si enggo ndekah lit bas Pustaka. Enda mbuktiken maka nasehat si lit bas Pustaka la pernah ketadingen jaman. Tapi, labo nasehat si erguna ngenca si lit bas Pustaka. I je pe lit informasi si la banci sidat bas ingan si deban. Informasi e banci mereken kedamen man kalak si sangana erceda ate.

Kalak si keleng ateta si enggo mate lanai gejapna si mesui

“Kalak mate la tehna kai pe,” nina Pustaka bas Pengerana 9:5. Enggo “bene perukurenna.” (Masmur 146:4) E me sebapna maka ikataken bas Pustaka kalak si enggo mate bali bagi kalak si entabeh kapna medem.—Johanes 11:11.
Dibata si perkeleng banci ngapuli kita

Nina Pustaka bas Masmur 34:15, “Mata Jahwe * mperdiateken kalak si benar, cupingNa megiken pemindon kalak e.” Adi situriken perasanta man Dibata arah toto, labo terjeng tenang perukurenta ntah pe erban kita ngasup ngendaliken perukurenta. Tapi, situhuna enda me carana gelah rembak kita ras Dibata si banci ngapuli kita alu kuasaNa.
Lit masa depan si mehuli si man timanta

Cuba sibayangken, bas masa depan pagi kalak si enggo mate ipegeluh mulihi i doni enda. Kerna janji e, lit piga-piga kali ituriken bas Pustaka. Uga nge pagi situasina doni enda? Ikataken Pustaka maka ‘apusi Dibata me kerina iluhta. Lanai pagi lit kematen ras ceda ate. Tangis ntah pe si mesui lanai pagi lit.’—Ketangkasen 21:3, 4.

Kalak si tek man Jahwe, Dibata si ikataken bas Pustaka, banci terapuli kel amin pe sangana erceda ate. Engkai? Perban tek kalak e maka bas masa depan banci kalak e jumpa mulihi ras kalak si keleng atena si enggo mate. Contohna, Ana, enggo mate perbulangenna janah kalak e enggo erjabu 65 tahun dekahna. Bagenda nina, “Pustaka erban aku tek maka kalak mate, lanai gejapna si mesui. Janah, ipekeke Dibata pagi kerina kalak si mate si ingetNa. Lalap kuukuri kerna si e sanga sedih kuakap. Dungna, banci kuadapi masalah si mberatna bas geluhku eme perasan ceda ate.”

Tina si ituriken ndai ngataken, “Kenca mate Timo, kugejapken kel penampat Dibata. Tuhu-tuhu kugejapken penampat Jahwe sanga sedih kel kuakap. Lalap kuinget janji si lit bas Pustaka kerna kekeken. Enda mpegegehi aku gelah terus megenggeng seh ngasa jumpa ka pagi aku mulihi ras Timo.”

Situhuna, lit jutan kalak si tek maka janji bas Pustaka pasti terjadi. Banci saja la kapndu masuk akal janji si lit bas Pustaka, ntah pe la kapndu mungkin terjadi. Tapi, labo lit salahna adi pereksandu lebe bukti-buktina tuhu ntah lang nasehat ras janji si lit bas Pustaka e. Banci saja, Pustaka me penampat si mehulina man kalak si sangana erceda ate.