Kia mārama meitaki te tangata i te tuke o te meitaki mei te kino. Kare teia mārama e taui ua kia tau ki to ratou turanga. Mari ra, ka akatumuia te reira ki runga i te au kaveinga papu tei riro ei aratakianga meitaki​—noatu e kare e tangata e kite mai ia ratou.

Maata te au manako tarevake no te meitaki e te kino ta te tamariki ka akarongo atu, penei mei te au oa apii, ta ratou imene e akarongorongo ra me kore te au teata e te porokaramu tivi ta ratou e akarakara ana. Penei ka akatupu te reira i te manako ekoko i roto ia ratou no te meitaki e te kino.

E āka manamanata teia no te au mapu. Karanga te puka Beyond the Big Talk, “Ka anoanoia te au mapu kia mārama i te taomianga maata a te au oa e te aronga ke kia aru i tetai peu ei akamareka i tetai ke. Pera katoa, kia rave ratou i ta ratou i kite e ko te mea tika noatu kare to ratou au oa e mareka mai.” Taka meitaki ua e ka anoanoia te au metua kia tereni i ta ratou tamariki kia rave i teia i mua ake ka mapu ei.

Akamārama eaa te mea meitaki e te kino.

KAVEINGA PIPIRIA: “Na te tangata pakari ïa, . . . no te mātau i kite ei to ratou ngakau i te meitaki e te kino.”​—Ebera 5:​14.

• Taangaanga i te au tuatua ei akataka i te meitaki mei te kino. I te au rā ravarai, e akataka meitaki i te au turanga tukeke: “E mea tika teia; e mea tika kore tera.” “E tu tiratiratu teia; e tu tiratiratu kore tera.” “E mea meitaki teia; e mea kino tera.” Aere ua rai, ka apii taau tamaiti i te au mea meitaki tana ka rave e te au mea kino kia kopae atu aia.

• Akamārama i te tumu i meitaki ei me kore i kino ei tetai turanga. Ei akaraanga, e ui i te au uianga mei teia rai: Eaa i puapinga ai kia akakite i te tika? Akapeea te au tuatua pikikaa me takino i tetai pirianga oa? Eaa i tarevake ei te keikeia? E akamārama meitaki i te tumu ei tauturu i taau tamaiti kia tereni i tona akava ngakau kia kite i te meitaki mei te kino.

• Akakite i te au akameitakianga no te rave i te meitaki. Penei ka karanga koe: “Me akakite koe i te tika, ka irinakiia koe e tetai ke” me kore “Me takinga meitaki koe i tetai ke, ka reka ratou i te piri mai kia koe.”

Kia kite te tangata e te akono ra toou ngutuare i te turanga meitaki.

KAVEINGA PIPIRIA: “E kimi matatio ia kotou uaorai.”​—2 Korinetia 13:5.

• E akariro i toou turanga no te meitaki e te kino ei mea mātau i roto i toou ngutuare. Ka rauka i reira ia koe i te karanga e:

  • “Kare matou e pikikaa i roto i teia ngutuare.”

  • “Kare matou e tā me kore e karo i tetai ke.”

  • “Kare matou e akatika i te tuatua akakino.”

Ka kite taau tamaiti e kare teia i te au ture ua, mari ra e turanga mātau no te oraanga ngutuare.

• E uriuri putuputu i te au kaveinga a te ngutuare ki taau tamaiti. Taangaanga i te au mea tei tupu i te au rā ravarai ei apii iaia. Penei ka akaaite koe i taau kaveinga ki te au manako tei akaariia mai i runga i te tivi me kore i te apii. Ui i teia au uianga ki taau tamaiti: “Me tupu teia kia koe, eaa taau ka rave?” “Akapeea to tatou ngutuare me akono i teia tupuanga?”

Akamaroiroi i taau tamariki kia rave i te meitaki.

KAVEINGA PIPIRIA: “Ei akava-ngakau meitaki to kotou.”​—1 Petero 3:​16.

• Akakite i toou mareka anga me rave aia i te meitaki. Me rave taau tamaiti i te mea tika, e akakite kiaia e mea meitaki tana i rave e e akamārama i te tumu. Ei akaraanga, penei ka karanga koe: “Kua akakite koe i te tika. Mareka tikai au.” Me akakite mai taau tamaiti e kua rave aia i tetai mea tarevake, e akameitaki iaia no te akakite mai i te reira i mua ake ka akatanotano ei koe iaia.

• Akatanotano i te tu tau kore. Tauturu i taau tamariki kia āriki i te apainga no ta ratou i rave. Kia mārama ratou eaa tikai te tarevake ta ratou i rave e akapeea te reira i tuke ei ki te au kaveinga a te ngutuare. Kare tetai au metua i inangaro i te ako i ta ratou tamariki me rave i te tarevake no te mea kare ratou e inangaro i te tamariki kia taitaia. Inara me uriuri koe e taau tamariki no runga i te tarevake, ka tauturu teia ia ratou kia tereni i to ratou akava ngakau kia kite i te meitaki mei te kino.