AYINAMẸ BIBLU TỌN: “Mẹdepope ma nọ gbẹwanna agbasa edetiti tọn gbede; ṣigba e nọ na ẹn núdùdù bo nọ wlebòna ẹn.”—Efesunu lẹ 5:29.

NUHE E ZẸẸMẸDO: Ayinamẹ Biblu tọn ehe to bibiọ dọ mí ni nọ penukundo agbasa mítọn go ganji. Dodinnanu de dohia dọ gbẹzan he zan mí te wẹ nọ hẹn susu to azọ̀n he mí nọ wá jẹ lẹ mẹ plá mí. Enẹwutu, eyin mí nọ basi nudide dagbe lẹ, azọ̀n gán nọla na mí.

NUHE A GÁN WÀ:

• Núdùdù. Nọ dù núdùdù hunsindagbe tọn lẹ bo nọ nùsin susu.

• Nọ Zan Agbasa. Agbasa zinzan ganji gán de azọ̀njijẹ pò, mahopọnna owhe he mí do, eyin mí tlẹ yin madogánnọ kavi to azọ̀n sinsinyẹn jẹ. Nugbo wẹ dọ doto lẹ po mẹyiwanna lẹ po gán gọalọ jẹ obá de mẹ, amọ́ hiẹ lọsu wẹ dona dovivẹnu nado nọ zan agbasa!

• Nọ Damlọn Ganji. Amlọnmadọ́ ganji na ojlẹ dindẹn gán zọ́n bọ yè na bẹ azọ̀n sinsinyẹn delẹ. Mẹsusu wẹ ma nọ damlọn ganji, na yé nọ yí amlọn whenu yetọn zan na nudevo lẹ. Amọ́, eyin mí nọ damlọn ganji, mí na do agbasalilo dagbe.

AYINAMẸ BIBLU TỌN: “Mì gbọ mí ni klọ́ míde wé sọn hẹnflu agbasalan tọn podọ gbigbọ tọn lẹpo mẹ.”—2 Kọlintinu lẹ 7:1.

NUHE E ZẸẸMẸDO: Eyin mí nọ dapana onú adínọ lẹ taidi azọ̀-nùnù kavi onú mọnkọ he nọ hẹn azọ̀n po okú po plamẹ lẹ, mí na nọ ganji.

 NUHE A GÁN WÀ: De azán de nado doalọtena aṣa lọ, bo kàn azán lọ dai. Amọ́, whẹpo azán lọ nido pé, bẹ siga, fọ́fi, taba, bliké po onú mọnkọ lẹ po dlan. Dapana fie mẹlẹ nọ nù azọ̀ te lẹ. Dọ nudide he a basi lọ na họntọn he gán gọalọna we lẹ.

NỌ HỌ́ DEWE.

“Eyin hiẹ gbá ohọ̀ yọyọ de, a dona sọ basi oglọ́n de lẹdo họta towe, na mẹde nikaa flẹ jai sọn e ji bọ whédo towe na duhùnhọ.”​—DEUTELONOMI 22:8.

MA NỌ DUADI BLO.

“Mẹhe nọ whleawu nado gblehomẹ tindo wuntuntun taun, ṣigba, mẹhe nọ yawu gblehomẹ nọ do nulú etọn hia.”—HOWHINWHẸN LẸ 14:29.

NỌ DÙNÚ DO JLẸKAJI.

‘A tin to mẹhe nọ yí nukunkẹn do dùnú lẹ ṣẹnṣẹn blo.’—HOWHINWHẸN LẸ 23:20.