Tauanina Dalanai
Ena be Baibel be medikol bukana ta lasi, to ena sisiba haida ese tauanina naria karana dekenai ita ia durua diba. Mani Baibel ena hakaua herevadia haida ese emu mauri ia hanamoa dalana ita itaia.
EMU TAUANINA NARIA NAMONAMO
BAIBEL ENA HAKAUA HEREVANA: “Tau ta ese sibona ena tauanina ia inai henia lasi, to ia ubua bona ia laloa bada.”—Efeso 5:29.
ANINA BE DAHAKA: Unai Baibel ena hakaua herevana ese ita ia hagoadaia iseda tauanina ita naria namonamo totona. Tahua gaukarana ta ese ia hahedinaraia gorere momo idia vara badina taunimanima be sibona edia mauri dalana idia abia hidi. Unai dainai bema abia hidi maorona oi karaia, do oi gorere momo lasi.
DAHAKA OI KARAIA DIBA?
-
Aniani Maorona Ania. Namona be aniani namodia oi ania bona ranu momo oi inua.
-
Eksasais. Gaukara ma haida oi karaia karana ese emu tauanina ia durua diba, ena be emu mauri lagani be bada o maragi, oi be diseibol o gorere tauna. Emu famili, turadia, bona doketa taudia ese oi idia hagoadaia diba oi eksasais totona, to namona be gau ta oi karaia sibona oi durua totona!
-
Mahuta Namonamo. Nega maorona ai idia mahuta namonamo lasi taudia momo ese gorere idauidau idia davaria. Badina mahuta negana ai idia ura gau ma haida idia karaia. To nega maorona ai oi mahuta neganai, do oi gorere momo lasi.
TAUANINA HAMIROA GAUDIA DADARAIA
BAIBEL ENA HAKAUA HEREVANA: “Namona be tauanina bona kudouna hamiroa gaudia ibounai amo ita goeva.”—2 Korinto 7:1.
ANINA BE DAHAKA: Iseda tauanina ita naria namonamo totona, tauanina hamiroa gaudia ita dadaraia hegeregere kuku ania karana, unai gauna ese gorere bona mase ia havaraia diba.
DAHAKA OI KARAIA DIBA? Namona be emu kalenda ai deit ta oi abia hidi unai gauna oi rakatania totona. Unai dina ia do abia lasi neganai, namona be kuku, lighters bona unai kara ia durua gau ma haida oi negea be namo. Unai bamona gaudia idia hoihoilaia gabudia oi dadaraia. Emu turadia bona famili oi hadibaia oi ura unai gau mirodia oi rakatania, unai amo oi do idia durua.
BAIBEL ENA HAKAUA HEREVA MA HAIDA
Emu gabu ai ia noho Iehova ena Witnes tauna ta amo idia printaia Baibel ta oi abia diba
SEIFTI LALOA BADA.
“Ruma matamata do umui haginia neganai, guhi ena isena dekenai magu maragina do umui haginia, emui ruma guhi dekena amo tau ta do ia moru garina, bona iena mase be emui kerere garina.”—DEUTERONOMI 22:8.
EMU BADU OI BIAGUA.
“Iena badu ia hakerua tauna, be mai ena aonega danu, to bema ia badu haraga neganai, tau ta ese iena kavakava do ia habadaia.”—AONEGA HEREVADIA 14:29.
EMU ANIANI DALANA OI BIAGUA.
“Aniani idia ania momo taudia, danu do oi noho lasi.”—AONEGA HEREVADIA 23:20.
Reana Inai Danu Oi Ura
NOGA!
Moale Davaria Dalana—Helt Namona Bona Haheauka Karana
Ita gorere neganai, unai ese eda moale ia hadikaia diba, a?
