Mavbanyelo nya ndranga ni dzipari
Vathu nya vangi si ngu va garadzeya gu vbanyisana gwadi ni gilongo gumogo ni dzipari. Wona matshina nyo khaguri nya Bhibhiliya ma nga gu phasago gu vbanyisana gwadi ni vambe.
U NGA KHATHALEYI SILO SAGO BASI
LITSHINA NYA NAYO NYA BHIBHILIYA: “Muthu ni muthu a nga dwaneli basi gu sayisa esi si gu saye, aholu, a na dzi garadze gambe khu sile si gu sa vangana.” — Vafilipi 2:4.
SO THULA GINANI: Pari nya yadi ya gu vega gupima avba nya esi a na gireyago vambe, nasiri avba nya esi a na giredwago khu vambe. Wa gu ba u gola gu khathaleya silo sago basi, u na kupula gupwanana gwago ni vambe. Khu giyeyedzo, pangoni, abari gu mwama mwendro mwangadzi a gu gola gu khathaleya silo saye basi, a na hegisa khu gu kanganyisa pari yaye nya wugadzi khu gu a thegeya wubhayini. Ni gu gambe, mwalo a golago gu gira wupari ni muthu a khaleyago khu gu ganeya khesi a gu naso mwendro esi a si kodzago gu gira. Khu kharato, libhuku nyo khaguri lari khilo: “Muthu a khathaleyago silo saye basi, a si dundrugeyigo khu vambe, kha kaledwi khu sigaradzo nya singi.”
GINANI U YEDEGO GU GIRA:
-
Phasa vambe. Dzipari nya dzadi dzi ngu tumbana nigu dza gu dzi emiseya gu phasana. Wugevisisi nyo khaguri wo yeyedza gu khuwo muthu a golago gu phasa vambe kha khaleyi gu garadzega nigu kha dzi woni na si phasi gilo.
-
Dzi vege wulangani nya mumbe muthu. Esi sa gu thula gupwa wuvi wu pwidwago khu mumbe. Muthu a dzi vegago wulangani wa vambe, kha na nga khaleya gu tsorodzeya vambe na gu khuye a gu hagana, ganiolu khu lisine lakone nari a gu va kula myonyo.
Wa gu dzi vega wulangani wa vambe, si na gu vbevbugeya gu khala muthu nyo ninganiseye; iso si na gu phasago gu potsa gihateya, nigu u na gira wupari ni vathu nya mitumbunugo nyo hambanehambane.
-
Dzi ninge tepo nyo bhule ni vambe. Gambe ni gambe u dzi ningago tepo nyo bhule ni vambe, u na vati gwadi. Wa gu vbweta gu gira wupari ni muthoyo, u yede gu bhula khu silo a si golago. Mu engiseye gwadi nigu yeyedza gu khuwe u ngu mu ninga lisima. Mowo nya wugevisisi wari khuwo “mabhulelo yoyo ma ngu reseya gutsaka vathu.”
HATHA GWADI DZIPARI
LITSHINA NYA NAYO NYA BHIBHILIYA: “Gidinga nya vathu nya guvivbedwe khu monyo gi ngu vivbisa mavbanyelo nya yadi.” — 1 Vakorinto 15:33.
SO THULA GINANI: Ava u va hathago gu hagana navo, va nga gu phasa gu gimbiya ndziyani nya yadi, mwendro gu gu bedza khabini. Vahevbuli nyo khaguri vari khavo dzipari dzi na ni kutsedzelo nya tshivba ngudzu. Khu giyeyedzo, va ri khavo wa gu ba uri pari nya sidahi mwendro vathu va tshulago wugadzi, si ngu vbevbuga gu mbakwa nuwe khu mapimo yoyo; gu daha ni gu tshula wugadzi.
GINANI U YEDEGO GU GIRA: Gira wupari ni vathu va gu ni mavbanyelo mwendro makhalelo u ma dogoreyago. Khu giyeyedzo, gira wupari ni vathu va gu ni githawo, wuhindzi, wuwadi, va khathaleyago vambe.
MAMBE MATSHINA NYA NAYO NYA BHIBHILIYA
Wona dzivhidhiyu dzi seketedwago omu nya Bhibhiliya dzi giredwego gu phasa mipatwa, vaphya, ni sanana gu manega ni mavbanyelo nya yadi ndrangani
U NGA GANEYI SILO SI NA HENDRAGO VAMBE.
“Vomo va dusago magana nya gupaye kha nga litshari, aholu lidimi la va nya guti, la gu ninga womi.” — MAVINGU 12:18.
KHALA MUTHU NYA WUHINDZI.
‘Muthu nya wuhindzi a na hodza a eneledwa.’ — MAVINGU 11:25.
PHARA VAMBE NGA EDZI U VBWETAGO GU PHARWA KHIDZO.
“Iso mu vbwetago gukhenu vathu va mi girele, va gireleni nenu.” — MATEWU 7:12.
