¿Am ba chuqui maʼ wen cʼojoʼtan?
«Ti lac pejtelel añʌch chuqui tac mi laj cʼojoʼtan, pero joñon ñumento. Mach tiʼ cajic jach jumpʼejl tsʌts bʌ wocol. Cabʌl jax chuqui miʼ mejlel i yʌcʼonla ti pensar. Añix cabʌl jab i cajel j cʌntan c ñoxiʼal, an i chaʼan jumpʼejl cʼamʌjel tiʼ bʌcʼtal yicʼot tiʼ jol» (Julia). a
«Tsiʼ cʌyʌyon quijñam, c bajñel jach tsaʼ caji j cosan chaʼtiquil calobil. Wocolʌch cheʼ mi lac bajñel cosan la calobil. I cheʼto jaʼel tsaʼ c sʌtʌ queʼtel, i maʼañic c taqʼuin chaʼan mi cʌcʼ ti tojʼesʌntel jiñi j carro. Maʼañix tsaʼ c ñaʼta chuqui mic mel, cʌlʌxix chuqui tsaʼ j cʼojoʼta. Cujil chaʼan mach weñic mi lac tsʌnsan lac bʌ, jin chaʼan tsaʼ c sube Dios chaʼan miʼ tsʌnsañoñix» (Barry).
¿Mach ba añix chuqui miʼ mejlel a mel maʼ wubin, cheʼ bajcheʼ Julia yicʼot Barry? Mi cheʼʌchi, ili revista mi caj i coltañet yicʼot mi caj i tijicñesañet come miʼ tsictesan chucoch mi lac wen chaʼlen pensal, chuqui tiʼ wocol miʼ mejlel lac taj yicʼot chuqui yom mi lac mel chaʼan mi lac chʌn lʌtʼ majlel.
a Jiñi cʼabaʼʌl tac tsaʼ qʼuextʌyi.
Miʼ mejlel a qʼuel jaʼel iliyi
LAC TSICTESΛBENTEL
Tiʼ pejtelel pañimil an cʌlʌx pensal
An estudio tac tsaʼ bʌ i pʌsʌ chaʼan anquese tsʼitaʼ jach mi laj cʼojoʼtan lac bʌ, miʼ mejlel i tsʌnsañonla cheʼ maxto i yorajlelic. ¿Chuqui miʼ mejlel a mel chaʼan maʼ lajmesan jiñi a cʼojol?
