KOMBEYA YIP TE ESTRÉS
¿Aybal awichʼoj estrés?
«Ta jpisiltik ay kichʼojtik estrés, pero te joʼone bayal estrés kichʼoj. Ma jaʼuknax yuʼun jchajp wokolil, ay bayal wokolil jtaoj jich bitʼil te bayalix jaʼbil yakon ta skanantayel te jmamalal te yichʼoj chamel ta sbakʼetal sok ta sjol», jich la yal te Julia. a
«La yijkitayon te kinam, jaʼ yuʼun jtukel la jchʼites te chaʼtul jnichʼnabe. Wokol la kaʼiy te jtukel jilone. Ma jaʼuknax-abi, la slokʼesonik ta kaʼtel sok maʼyuk jtakʼin yuʼun ya kakʼ ta chajpanel te jcarroe. Ma jnaʼ-a te bin ya jpase. Ma xkujchix kuʼun-a te estrés. Jnaʼoj-a te maba lek teme ya jmil jbae, jaʼ yuʼun la jkʼanbey Dios te yakuk slajinbon te jkuxlejale», jich la yal te Barry.
¿Aybal jich awaʼiyoj aba bitʼil te Julia sok te Barry te ma xjuʼix awuʼun ya awaʼiye? Teme jiche, te revista ini yame skoltayat sok yame yakʼbat smukʼul awoʼtan, melel ya scholbey skʼoplal bintik-a te ya yakʼbotik estrés, bin-utʼil ya yutsʼinotik sok te bin ya xjuʼ ya jpastik swenta ya xkujch kuʼuntik-a.
a La yichʼ jelel te biililetike.
