Timotetsopaj pampa totlakayo peua kichiua se keski tlamantli kema tikixnamikij se tlaouijkayotl. Totsontekuich kichiua ma yoli miak tlamantsitsij ipan nochi totlakayo, yeka toyolo chikauak tekiti, toeso chikauak motlaloua ipan totlakayo, tlauel titlaijiyotilanaj o ayokmo kuali titlaijiyotilanaj, uan se keski tlamantli tlen totlakayo peua kuajkualo pampa motijtilana. Maske ayamo tijmatij, totlakayo kejuak nima kiita kenijkatsa momanauis. Kema ayokmo tleno techtetsoptok, totlakayo ayokmo “momanauia” uan sampa tekiti kej ipa kichiua.

Totlakayo kichiua ma tijmatikaj se tlenijki techtetsoptok pampa kiampa techpaleuia ma tikixnamikikaj se kuesoli o ma tijmatikaj kenijkatsa timomokuitlauisej. Nochi peua ipan totsontekuich. Kema se tlenijki techtetsopa se kentsi, techpaleuia nimantsi ma tikitakaj tlake tijchiuasej. Nojkia techpaleuia ma tijchiuakaj tlen timosentlaliaj o nojua kuali ma tijchiuakaj se tlenijki, kej kema tijchiuaj se exámen, kema titlajtlanij tekitl o kema timauiltiaj.

Uan kema uejkaua tlauel techtetsoptok se tlenijki o nochipa kiampa techpano, uajka techtlanauia. Kema totlakayo nochipa kineki “momanauis”, uelis timokokosej, amo kuali tijyolmatisej uan amo timoiljuisej kej kinamiki. Mopatla kej timonejnemiltiaj uan kej timouikaj ininuaya sekinok. Kema nochipa techtetsopa tlen ueli tlamantli, uelis kichiuas ma titlaikaj, ma tijtekiuikaj drogas, ma titlachichinakaj, tlauel tipajtolosej, tisentlakuajtosej uan sekinok tlamantli tlen amo kinamiki. Uan nojkia uelis kichiuas ma timotekipachokaj miak tonali, tlauel tisiauisej o tijnekisej timomiktisej.

Maske amo nochi sanse kinpano kema kintetsopa se tekipacholi, uelis kichiuas ma kipiakaj miak kokolistli uan uelis kitlanauis nochi inintlakayo.