Okusoya onkhalelo omunthu akala tyina pena otyitateka tyimukalesa notyiho. Owongo uundapa monkhalelo ikuatesako olutu okuava ovipuka vitiwa hormonio. Ono hormonio ombo mbutyika onkhalelo ohonde yuundapa nokufima iya omutima auhimbika okuveta vali unene iya omihipa avikala tyatana. Tyina nkhele uheivite natyike tyikahi nokumonekapo, olutu lulinga ovipuka ovio aviho opo lukulondole. Tyina otyitateka tyamalambe, olutu aluhimbika vali okuundapa monkhalelo ikahi nawa.

Okusoya onkhalelo olutu pamwe lukala opo utyivile okulambela movitateka viepuiya. Otyitateka otyo tyihimbikila mowongo. Onkhalelo yaviuka yokukala tyasoya ikukuatesako okulinga liwa ovipuka. Monkhalelo ikahi nawa, okukala tyasoya tyipondola okukuatesako okufuisapo etyi wapanga okulinga, iya otyivili okulinga nawa ovipuka tyina upulwa pokuovola ovilinga ine tyina uyumba ombola.

Mahi tupu ankho utualako okukala omuvo omunyingi tyasoya, upondola okukala novitateka viekongoko. Tyina ukala ehimbwe tyasoya, upondola okukala notyitateka tyokuvela komutwe. Onkhalelo ukala iya nonkhalelo utekula vakuenyi ipondola okupiluluka unene. Okutualako okukala tyasoya, tyihole okutuala ovanthu ovanyingi okunwa unene, nokusipa omapangwe, nokunwa unene ovihemba, nokulia unene, nokupuena, iya novipuka ovikuavo ovivi. Tupu tyipondola okulingisa omunthu okukala nomalusoke okulipaa.

Namphila ovanthu kokusoya velikalaila, mahi okukala tyasoya tyipondola okueta omauvela omanyingi mononthele ambuho mbolutu.