“Madiherida humá lubeiti luagu haruga, ladüga barǘ lumuti giñe haruga lidiheridüna lúmagua” (MATÉU 6:34).

Le mini lubéi: Lau sun wasandiruba lan idiheri, mabuidunti wadiheridun uguñe luagu le lunbei lasuseredun haruga. Áfaagua humá lun madiheridun humá saragu luagu le lunbei lasuseredun ámuñegü.

• Gayaraati ladügün hasandirun gíbeya lan katei lun hichügü lun hasandirun lueirin idiheri. Kati gayaraabei hadügüni? Furumiñe, gabaroun huméi íbini lan siñabei lan hanurahan sunsuinagubei luéi hasandirun gíbeya lan katei lun hichügü, anhaün adiherida saragu luagu turobuli le siñabei haransehani, hanarimetimabei luriban hasandiragun hungua. Libiaman, mabulieida huméi liibe-agei lan dan masuseredunti katei kei aubei wasaminarei.

“Hámañein ǘnabugubutiña lichú aau” (ARIÑAWAGÚNI 11:2).

Le mini lubéi: Maguraba humá lun ladügǘniwa sun katei machararunga. Magurabaha humá saragu ni húmagiñe ni hámagiñe ha híbiri.

• Ǘnabugu humá, mámarügüla luagun aban oubaü harabacha ani subudi huméi lébeha dandu le hiyaraabei kei le hayaraabei ha híbiri adüga. Anhein hadüga ítara, hasandiraguba ha geyegubaña hau houngua buidu ani buídutimabei lasalirun katei. Meferidira huméi giñe hugundan. Dan le wéherahan, íbini dan le wuriba lan léibugun katei, rariti lídangiñe wagañi ani buídutimati wasandiragun woungua.

“Lualin ichügü gálumaü” (ARIÑAWAGÚNI 17:27).

Le mini lubéi: Adügati katei burí wuribati le wasandirubei lun masaminarun wamá keisi lubudubu, ligíati, áfaagua humá lun darangilañu humá.

• Subudi huméi ka lan adügübei lun hasandirun gíbeya lan katei lun hichügü luma ida liña lan hóunabun lun. Danme hasandiragun hungua ítara, akutiha huméi le hasaminarubei, le hasandirubei luma ligaburi hóuserun. Gayaraati íbini habürüdün fiu lídangiñe. Anhein gabaroun humá ligaburi hasandiragun houngua dan le gíbeya lan katei lun hichügü, gayaraabei hahandilihani buidu. Gayaraati giñe hasaminarun luagu le gayaraabei hadügüni lun lalouguadun katei le adügübei lun hasandiragun hungua ítara. Anhein siñá lubéi hagidaruni, ariha huméi ka lan gayaraabei hadügüni lun mibe lan damichi ladügün hun. Kei hénpulu, houcha humá habürüdüni ida luba lan hayusuruni dan luma kaba burí lan un hetenira furumiñe.

• Ámuñegueinarügüti lébuna wasandirun gíbeya lan katei lun wachügü, lugundun ámuñegueinarügüti ligaburi warihini katei. Ligía lunti lubéi houchun lun hasansiruni ligaburi harihini katei. Ka uagu mouchun hubéi hadügüni le?

  1. Móufudaha humá asaminara wuriba hawagun amu. Anhein ádaragua aban gürigia lungua higibugiñe dan le hadügün ili, hagañiduba anhaün asaminara ladüga lan menebenehabu lan gürigia ligía ladügei. Buítimati hasaminarun mama lan ladüga luriban ladügei. Háfuga ítara liña.

  2. Áluaha huméi le buídubei luagu katei. Anhein lǘbadün lubéi agurabaha busu o lun letenirun surusia hun, gayaraati hayusuruni dan ligía lun haliihan o lun hadügün amu katei le hemegeirun.

  3. Gabaroun huméi sun katei. Álügüdagua humá hungua: “Ítarameme luba san lueirin narihini turobuli le haruga o leweñegua dimaasu kei narihini uguñe?”. Subudi huméi ka lan turobuli wéiribei lumoun le maweirinbei lisudinin.

“Adügarügü huméi sun katei lidan lubudubu” (1 KORINTUNA 14:40).

Le mini lubéi: Áfaagua humá lun ua lan chagaguaü lidan hibagari.

• Sun wagía mégeitiwa lun lidan lan lubudubu sun katei lidan wabagari. Anhein hechu wabéi ígirahei sun katei lubá amu dan, wasandiruba gíbeya lan katei lun wachügü, ani aganwoundeina luba katei le lunbei wadügüni. Houcha humá hafalaruni adundehani burí le:

  1. Bürǘ huméi kaba burí lan dan hadügei katei ani falá huméi.

  2. Subudi huméi ka lan igaburi adügübei lun hígirahani sun katei lubá amu dan ani sansi huméi.

“Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (APURICHIHATI 4:6).

Le mini lubéi: Másiñati meredebei lan dan ni erei houn gürigia ha madariragunbaña houngua mawadigimaridunga lun harihini buiti le lanügübei hawadigimari.

• Ariha huméi wadagimanu luma seinsu keisi lubudubu. Madügünbei gíbetima lan hiseinsun lun gúndaatima humá ni lun masandi humá gíbeya lan katei lun hichügü. Le linarün katei, másiñati adügarügübei lan lira lun magundan humá luma lun lagibeduntima katei lun hichügü. Kei lariñaguni Apurichihati 5:12: “Le rísibei, marumugagüdün lumuti lirisin”. Ligíati, darugua humá darí le ñein lumuti tébeda hisidin.

• Direi humá dan lun hemeraagun. Anhaün adüga katei le hínsiñeti hun, maweirinbei hasandirun gíbeya lan katei lun hichügü. Gama lumoun, gabaroun huméi maweirinbei lan líderagunün isebáhari le ídanti madügün humá ni kata, kéiburi hañuurun aríagua bigibigitu.

• Maweirinlá hayusuruni teknolohía. Maweirinlá liyarafagun harihini koréu le ounahóubei hun luéigiñe Internet, le abürüdǘbei hun luéigiñe gágamuru o le iseribei lidan páhina lánina Internet le ídanbei hadügǘwa umadagu. Metenira humá lun katei le lánina wadagimanu anhein mama lubéi lídanñadün lóurate wadagimanu.

Huuti “lánhingichun úgubu” (1 TIMOTÉU 4:8).

Le mini lubéi: Ídehati gabügürügua lan wadügün ehersísiu lun buidu lan wátuadi.

• Hechu humá adüga katei burí le buiti lun átuadi. Gayaraati ladügün ehersísiu lun buidu lan hasandiragun hungua luma lun buídutima lan lóunabun húgubu dan le gíbeya lan katei lun hichügü. Hou humá éigini le buiti lun átuadi ani meredera humá ni aban dan méiginga. Áfaagua humá lun hemeraagun buidu.

• Máluaha huméi “lárani” hituróbulin lidan agumulahani, lidan düroga ni lidan átaguni, lugundun adügarügüti lira lúntima hasandirun gíbeya lan katei lun hichügü ani gadei lumuti hátuadi, adüga ligía lun herederun maseinsunga.

• Heiba lumoun surusia anhein sandí hubéi siñá lan hun. Úati mini lan hemegeirun ídemuei lúmagiñe surusia luagu wuriba lan lidin hun.

“Chouru huméi heteniruña lan lun le súdinitimabei” (FILIPUNA 1:10, TNM).

Le mini lubéi: Akutiha huméi buidu ka lan burí katei súdinitimabei hun.

• Abürüha huméi ka lan burí dasi lunbei hetenirun lun furumiñe. Líderagubadün lira lun hetenirun lun katei burí le súdinitimabei luma lun harihini ka burí lan katei gayaraabei hígiruni lubá amu dan, hígirun lun amu lan adügei o íbini ka lan katei gayaraabei madügün humani.

• Abürüha huméi ka lan burí katei hadügübei lidan aban dimaasu luma átiriñein lan dan hau adügei. Lárigiñe, samina humá ida luba lan buídutima lan hayusuruni dan. Anhaün asandira gayara lan hahandilihani katei, maweirin háalime hasandirun gíbeya lan katei lun hichügü.

• Direi humá dan lun hemeraagun. Líderagubadün hararamagun, íbinirügü luagu murusun dan, lun hibihin iseri erei luma lun mibe lan katei lun hichügü.

“Hírugüda lumuti idiheri gürigia; anhein dimurei buiti, gúndaaguagüda lumuti” (ARIÑAWAGÚNI 12:25).

Le mini lubéi: Gayaraati ladügün dimurei burí le hariñagubei amu hun lau gamadóuni luma gudemehabu lun hasandiragun hungua buidu.

• Ariñaga huméi lun aban humada le gudemehabuti ida liña lan hasandiragun hungua. Gayaraati líderagunün aban gürigia le uáguti hafiñera lun hasansiruni ligaburi harihini katei o lun hasubudiruni ida luba lan haranseruni hituróbulin lidan aban igaburi le yebe masaminarun humagili. Láurügü hawaragun luma gürigia ligía gayaraati ladügün lira lun buidu lan hasandiragun hungua.

• Amuriaha humá ídemuei. Ígira humá lídangiñe hidasin lun ladügüni amu gürigia o amuriaha humá luma somu gürigia lun líderagunün lau huádigimari.

• Anhein adüga lubéi somu hupaaná lidan wadagimanu lun hasandirun gíbeya lan katei lun hichügü, adüga huméi sun hiyaraati lun laranserun turobuli. Kéiburi lau hariñaguni lun lau inebesei luma gamadóuni ka lan uagu adüga lubéi lun hasandiragun hungua wuriba (Ariñawagúni 17:27). Anhein maranserun turobuli, gayaraati san díseñaha lan hakipuragun hungua luéi gürigia ligía?

“Fuleseiwatiña ha asubudirubalin luagu megei hamani lídehan Bungiu” (MATÉU 5:3).

Le mini lubéi: Mámarügüñein éigini, daüguaü tuma muna hemegeira gürigia, mégeitiña giñe hetenirun lun hamadagua luma Bungiu. Lun gunda wamá, mosu gabaroun wamani megei wamani lira, teni wagíame lun.

• Gayaraati líderagunün furíei saragu. Agunbiraha lumutün Bungiu abahüdaguei sun hidiheri lun, ladüga bereseti hau (1 Féduru 5:7). Ladügüba hafurieidun luma hararamagun asaminara luagu katei buiti lun darangilu tan hanigi (Filipuna 4:6, 7).

• Aliiha humá katei burí le adügüti lun hayarafadun lun Bungiu. Le wakutihabei tidan garüdia to, dariwati tidan Bíbülia, to abürüdǘboun lun gayara lan wibihini le wemegeirubei lun gamadagua wamá luma Bungiu. Íderagua lumutiwa giñe adundehani burí le lun wibihin “lichú aau” luma “gunfurandaü” (Ariñawagúni 3:21). Ka uagu máfaagun hubéi lun haliihanu Bíbülia? Buídubei hamuga lun hagumeserun túmagiñe líburu Ariñawagúni.