“The hnehengazone kö la drai elany, ke, qa i elanyi kö la drai elany.”​—MATAIO 6:34.

Alien: Ka hnehengazo asë hi së. Ngo, tha tro pi kö sa nyi hacene la mele së hnene la hne së hna hnehengazone la drai elany. Loi e tro sa melëne la ca drai.

• Ame la easa hnehengazo, easa xou. Tupathe jë la: Ame la hnapan, pëkö atr ka tha hnehengazo. Maine tro sa hnehengazone la itre ewekë, nge thatre pe së la ka troa traqa, tro së lai hnehengazo catr. Ame la hnaaluen, ame la itre ewekë hne së hna mekun laka, troa eatr, tre, tha eatre ju kö.

“Loi e mama cile kowe la nöjei atr ka hape, itre ka atreine tulu ewekë nyipunie.”​—FILIPI 4:5.

Alien: The sasaithi tulu kö. The uku itre xan kö. The thele kö troa kuca la ketre huliwa, nge tha ijiji epuni pe.

• Loi e tro epuni a atre la itre ifego i epun memine la ifego ne la itre xan, me atreine tulu ewekë. Tha tro hë epun me itre xan a hnehengazo menu, nge tro ha hmaloi koi epun me itre xan troa eatrën la itre aja i epun. Ketre, ihnyima jë memine la itre xan. Maine tro epuni a hnyimahnyima, ngacama hetre jol, troa lolo la mekuna i epun, me madrin.

“Ame la ate ka menyike la hni, te, ate trotrohnin.”​—ITE EDOMË 17:27.

Alien: Maine tro epuni a mekun menune koilo, troa jol la aqane waiewekë i epun. The hnehengazo menu kö.

• Thele jë la kepin matre epuni a hnehengazo, nge wange ju la aqane tro epuni a ujë. Ame la epuni a nyiqaane hnehengazo, sija jë la itre mekun, me itre aliene hni epun, me itre aqane ujë i epun ngöne la ijine cili. Tro ha mama la pengöi epun ngöne la epuni a hnehengazo. Tro hë epuni a atreine xomihnine lai. Ketre, xometrije jë la itre ewekë ka aciane thei epun la hnehengazo. Maine tha ijije kö, thele jë la aqane troa neëne la itre ethan. Maine jë, troa huliwane hnyawane la traem, maine itre hnei epun hna kuca.

• Loi e troa saze la aqane waiewekë së. Ame la hne së hna hnehengazon, tre, tha hna hnehengazone kö hnei itre xan. Hetre ketre aqane waiewekë i angatre kö. Hanawange la itre mekune celë:

  1. The canga nyizö ketre kö. Maine tro la ketre atr a tro pa qëmekei epun, nge pai epuni kö traqa. Tro epuni a mekun ka hape, hnei angeic hna thë, nge tro epuni a elëhni. Ngo, tune kaa e tha hnei angeice kö hna thë? Nyipici hi epun!

  2. Thele jë la ewekë ka loi. Troa hmaloi koi epun troa itreqe thei droketre, maine ngöne la hnë kei avio, e tro epuni a xome la ijine cili troa e tus, maine canga kuca la huliwa, maine e mail.

  3. Thele jë troa goeëne la nöjei götrane lai jol. Isa hnyinge jë ka hape, ‘Hapeu, tro palahi a tru la jol elanyi maine e wiik ka troa xulu?’ Ka isapengöne la itre jol ka tru me itre ka co.

“Loi e troa kuca hnyawane la nöjei ewekë asë, nge tha tro kö a hetre zikoziko.”—1 KORINITO 14:40.

Alien: Thele jë matre tro palahi a tro loi la mele i epun.

• Aja së asë hi la troa tro loi la mele së. Easa hnehengazo, ke, majemine së uthe lapan la huliwa nyine tro sa kuca. Nge, kola nyixane hmaca kö la itre huliwa së. Hanawange la lue ewekë nyine tro epuni a kuca:

  1. Kuca jë la ketre porogaram nyine tro epuni a eatrën, nge metrötrëne jë.

  2. Saze jë la itre thiina ka upi epun tro palahi a uthe lapane la itre huliwa.

“Loi e ca hnatrapaime ka tiqa ce me tingeting, hune la lue hnatrapaime ka tiqa ce me huliwa me kola xeni la eny.”​—ATE CAINÖJ 4:6.

Alien: Ame la itre ka huliwa mec, tre, kösë kola luz la ‘lue hnatrapaime ka tiqa ne huliwa.’ Pëkö traem, me trengecatre i angatr matre troa madrine la hnei angatr hna huliwa.

• Loi e troa atreine waiewekë göne la huliwa me mani. Tha hape kö laka, ka trene manie epun, matre tro fe a elitrauje la madrin, me tha hnehengazo. Ijije fe tro epuni a trenamo, me hnehengazo, me hleuhleu. Öni Ate Cainöj 5:12, “Qa ngöne la tenge nyi ne la ate tene ewekë tha ’teine kö angeice troa meköl.” Haawe, the sasaithi tulu kö ngöne la aqane itö, nge pë pe manie i epun.

• Xomi ijine jë troa pane mano. Tha tro kö epuni a hnehengazo menu, e tro epuni a kuca la itre ewekë ka thue madrine i epun. Ngo, pëkö thangane e tro epuni a goeë tele, maine itre xaa nyine iamadrinë ka tun.

• The hmo pi telefone kö. The goeëne lapane kö la itre mail, maine itre sms, maine réseaux sociaux. Maine tha ka nyipiewekë kö, the goeëne kö la itre mail ne huliwa, e tha ijine huliwa kö.

“Hetre eloine la troa jumijumi itrei.”—1 TIMOTEO 4:8.

Alien: Maine tro epuni a kuci spor, troa lolo la mele i epun.

• Troa hetre hna majemine ka loi. Maine tro epuni a kuci spor, tro epuni a madrin, me hnëkëne la ngönetrei epun kowe la ijine troa hnehengazo. Loi e tro epuni a xeni hnyawa, me ngöne la itre ijine xen. Nyipiewekë troa mano hnyawa.

• The inyië kö memine la itre hna majemine ka ngazo, tune la sixa, maine dorog, maine kahaitr. Tro hë epuni a wezipo catr, me aluzi mani.

• Maine epuni palahi a hnehengazo, tro jë troa wai droketre. Tha nyine hmahmane kö la troa sipo ixatua thei droketre.

“Atreine jë nyipunieti tuluthe la ka nyipiewekë.”—FILIPI 1:10.

Alien: Kuca panëne jë la itre huliwa ka nyipiewekë.

• Amë wengëne jë la itre nyine tro epuni a pane kuca thenge la ka nyipiewekë. Tro lai a xatua epun troa wangatrehmekune la itre huliwa ka nyipiewekë, memine la itre huliwa nyine tro epun a kuca e thupen, maine athipe koi itre xan, maine ka tha nyipiewekë kö.

• Ame kowe la wiik, sija jë la aqane huliwane epun la traem. Thupene lai, wange jë la aqane tro epuni a huliwane hnyawane la traeme i epun. Maine tro epuni a atreine huliwane hnyawane lai, tha tro kö epuni a hnehengazo menu.

• Xomi ijine jë troa mano. Maine tro epuni a xome la ketre hnepe ijine troa pane mano hnyawa, tro lai a thue trengecatre i epun, me apujene la hnehengazo.

“Ame la hleuhleu e kuhu hni ne la ate, te, ate agenyin ; ngo ate amadinën’ eje la tenge ewekë ka loi.” —ITE EDOMË 12:25.

Alien: Troa epuni a madrin, e tro itre xan a utipi epun, me qaja la itre trengewekë ka menyik.

• Ithanata jë memine la ketre atr ka atreine itrotrohni. Tro la atr cili a xatua epun troa atreine waiewekë, me öhne la ketre aqane nyinyine la jol, hnei epuni hna tha mekun. Nge, maine tro epuni a fe la hni epun koi ketre, tro lai a hetre thangane ka loi.

• Sipo ixatua jë. Hapeu, ijiji epuni kö troa sipo ixatua koi itre xan, me thue huliwa i angatr?

• Maine epuni a huliwa memine la ketre atr ka ajolë epun, thele jë la ketre aqane troa nyinyine lai jol. Maine jë, hnyinge jë cememine la menyik la mekuna i angeic göi epun. (Ite Edomë 17:27) Maine tha ie kö, the tro hmaca kö memine la atr cili.

“Madrine la itre ka atrehmekune laka, nyipiewekë Akötresie koi angatr.”—MATAIO 5:3.

Alien: Nyipiewekë kowe la atr troa xen, me heetr, me hetre uma. Ngo, nyipiewekë catre hmaca kö troa thele ixatua thei Akötresie. Maine aja së troa madrin, nyipiewekë tro sa atrehmekune laka, ka nyipiewekë Akötresie kowe la mele së, me thele Nyidrë.

• Thith la ixatua ka tru. Akötresie a upi së, ka hape, tro sa ‘nu asë koi nyidrë la itre hne së hna hnehengazon, ke nyidrëti a meku së.’ (1 Peteru 5:7) Maine tro sa thith, me mekun ajuine la itre ewekë ka draië, troa tingeting la mekuna së.—Filipi 4:6, 7.

• E jë la itre itus ka troa aeasenyi epun me Akötresie. Ame la itre trepene meköt hna ithanatane ngöne la tane mekune celë, tre, hna xome qa ngöne la Tusi Hmitrötr. Hna cinyihane itre ej matre tro epuni a easenyi Akötresie. Ketre, tro lai a acatrene la “inamacane memine la mekun” i epun. (Ite Edomë 3:21) Tupathe jë troa e la Tusi Hmitrötr. Nyiqaane jë qa ngöne la tusi Ite Edomë.