“No warim samting wea bae happen tumoro, . . . bikos evri day bae olketa problem kamap.”—MATTHEW 6:34.

Diswan Minim: Hem normal samting lo laef for wari. So no warim olketa problem blo next day bikos each day garem problem blo hem finis. Trae for deal witim problem taem hem kamap.

• Stress savve mekem iu for wari. So hem gud for tingim tufala samting hia: First samting, luksavve samfala samting bae happen wea mekem iu stress. For warim datwan, bae mekem iu stress go moa. Mek-tu samting, luksavve hao staka taem maet samting iu wari abaotem no happen olsem hao iu tingim.

“Showimaot long evriwan, iufala no ova tumas.”—PHILIPPI 4:5.

Diswan Minim: No markem for iuseleva or olketa narawan samting wea iufala no fit for kasem.

• Mas hambol, garem olketa goal wea fitim, and luksavve lo wanem iu and olketa narawan fit for duim. Datwan bae daonem stress blo iu and blo olketa narawan, and mekem hem isi for kasem goal blo iu. Samfala taem hem gud for mekfani tu. For laflaf savve mekem iu feel gud and hapi, nomata wanem hem happen.

“Man wea garem wei for luksavve hem no kwiktaem for kros.” —PROVERBS 17:27, NW.

Diswan Minim: Taem iu kros, wari, and no patient, datwan savve mekem iu for no tingting stret, so traem best for kontrolem iuseleva.

• Luksavve wanem iu savve stress lo hem and hao iu feel lo taem olsem. Example, taem iu stress hem gud for luksavve hao nao tingting and feeling blo iu and maet for raetem diswan. Taem iu minim why iu feel olsem, datwan maet helpem iu for deal witim stress. Hem gud tu for changem samting wea savve mekem iu stress. Sapos hem hard, tingim samfala wei for katem daon hao stress affectim iu, maet lo wei for organize gud and iusim gud taem blo iu.

• Changem hao iu ting lo samting. Wanem hem mekem iu stress maet narawan no stress abaotem. Hem depend lo tingting blo iu. Tingim thrifala idea hia:

  1. No kwiktaem garem nogud tingting abaotem narawan. For example, maet samwan kat insaed laen front lo iu. Sapos iu tingse hem min for duim datwan, bae iu feel nogud. Hem gud for tingim maet hem garem gud reason for duim olsem. And maet hem tru!

  2. Tingim gud saed lo wanem hem mekem iu stress. Taem iu tingse iu weistim taem for weitim samwan, bae iu no stress tumas sapos iu iusim taem hia for readread, duim samfala waka, or raetem email.

  3. No ova tumas for warim samting. Maet problem wea iu garem tuday hem no stap tumoro or next week. Luksavve sapos disfala problem hem big tumas or hem smol nomoa.

“Duim evri samting long wei wea hem stret and wea no olobaot.” —1 CORINTH 14:40.

Diswan Minim: Trae for organize gud.

• Iumi laek for organize. Wanfala samting wea savve spoelem datwan and mekem iumi stress, hem nao for delay for duim samting. Diswan savve mekem iumi no duim olketa samting wea iumi shud duim. Traem tufala idea hia:

  1. Mekem schedule and barava followim.

  2. Sapos iumi man for delay for duim samting, trae for changem datwan.

“Hem gud for rest lelebet winim for barava waka hard and ronem wind nomoa.”—ECCLESIASTES 4:6, NW.

Diswan Minim: Pipol wea ova tumas for waka no savve enjoyim wanem olketa “barava waka hard” for kasem, bikos olketa no garem taem and strong for datwan.

• Garem balance tingting abaotem waka and selen. Nomata man garem staka selen, hem savve stress and no barava hapi. Dastawe Eklesiastes 5:12 sei: “Risman, hemi nating save slip long naet, bikos hemi wari tumas long evrisamting wea hemi garem.” So hapi nomoa witim wanem iumi garem.

• Markem taem for relax. Iu savve daonem stress blo iu taem iu duim samting wea iu enjoyim. Bat maet for sidaon nomoa, olsem for lukluk TV, no barava helpem iu.

• Kontrolem wei for iusim technology. No chekim olowe email, text message, or social media. Bihaen lo waka no gohed for chekim email abaotem waka.

“Training wea man duim for mekem body strong savve helpem hem.” —1 TIMOTHY 4:8.

Diswan Minim: Exercise savve helpem man for healthy.

• Trae for stap healthy. Exercise savve mekem iu feel gud and helpem body for deal witim stress. Kaikaim healthy kaikai, and kaikai thrifala taem lo day. Hem important for rest gud.

• No smoke, no tekem drug, or ova tumas for drinkim alcohol for deal witim stress. Olketa samting hia savve mekem stress kamap big, and maet spoelem health and selen wea iu waka hard for kasem.

• Go lukim doctor sapos iu stress tumas. No shame for askem doctor for helpem iu.

“Luksavve long olketa samting wea barava important.”—PHILIPPI 1:10.

Diswan Minim: Ting raonem wanem nao hem important for duim firstaem.

• Raetem list lo olketa samting wea iu need for duim and start witim wanem hem important winim narawan. Diswan bae helpem iu for luksavve wanem iu need for duim stretawe, wanem iu savve givim lo narawan, or wanem for leavim nomoa.

• Insaed wanfala week, raetem daon hao iu iusim taem blo iu. Sapos iu luksavve iu weistim samfala taem, tingim hao for iusim gud datfala taem. Sapos iu iusim gud taem blo iu, datwan bae helpem iu for no stress.

• Markem taem for rest. Nomata iu rest for lelebet taem, datwan savve strongim iu and daonem stress.

“Wei for wari savve mekem heart blo man wikdaon, bat gudfala toktok nao bae mekem heart blo hem hapi.” —PROVERBS 12:25, NW.

Diswan Minim: Toktok wea narawan talem bikos hem tingim iu savve mekem iu feel gud.

• Story witim samwan wea minim iu. Maet hem savve helpem iu for garem stretfala tingting abaotem wanem hem mekem iu stress, or for luksavve hao for deal witim datwan. For storyim feeling blo iu savve mekem iu feel gud.

• Askem help. Sapos iu garem staka waka, waswe, iu savve givim samfala waka hia lo narawan?

• Sapos samwan iu waka witim mekem iu stress, faendem wei for deal witim datwan. Example, lo kaenfala wei iu savve storyim hao samting hem duim mekem iu feel nogud. (Proverbs 17:27, NW) Sapos datwan no waka, waswe, eni wei stap for iu no spendem tumas taem witim hem?

“Olketa wea luksavve olketa needim God bae hapi.”—MATTHEW 5:3.

Diswan Minim: Iumi olketa man needim kaikai, kaleko, and ples for stap, bat iumi needim God tu. Iumi savve hapi sapos iumi luksavve iumi mas depend lo God and duim datwan.

• Prea savve barava helpem iumi. God laekem iumi for ‘putim evri wari blo iumi lo hand blo hem bikos hem tingim iumi.’ (1 Peter 5:7) For prea and for ting raonem olketa gud samting savve helpem iumi for garem peace.—Philippi 4:6, 7.

• Readim samting wea savve mekem iu feel klos lo God. Olketa Bible principle wea disfala magasin storyim helpem iumi for depend lo God. Olketa helpem iumi tu for “duim samting wea wise and keepim gudfala tingting.” (Proverbs 3:21, NW) Hao sapos iu markem goal for readim Bible? Maet firstaem bae iu enjoy for readim buk blo Proverbs.