MUTINDU YA KUZWA LUSADISU NA BASUSI
Muntu Lenda Zinga Kukonda Basusi
Mayele ya Biblia lenda sadisa beto na kudiyangisa ve na mambu ya kukonda mfunu. Beto mosi ta kuka ve kumanisa mambu yonso yina ke yangisaka beto. Kansi ngangi na beto ta manisa yo. Yandi me ponaka muntu yina ta sadisa beto. Muntu yango kele Yezu Kristu. Ntama mingi ve Yezu ta sala mambu ya mbote na ntoto ya mvimba kuluta yina yandi salaka ntangu yandi vandaka na ntoto. Mu mbandu:
YEZU TA KATULA MALADI MUTINDU YANDI SALAKA YO NTANGU YANDI VANDAKA NA NTOTO.
“Bo vandaka kunatila yandi bantu yonso yina vandaka ti bamaladi mpi bampasi ya mutindu na mutindu . . . , ebuna yandi vandaka kubelula bo.”—MATAYO 4:24.
YEZU TA SALA NA MPILA NDE BANTU YONSO KUVANDA TI BANZO MPI MADIA.
“Bo [bantu yonso yina ta vanda na nsi ya luyalu ya Yezu] ta tunga banzo mpi ta zinga muna, bo ta kuna bilanga ya vinu mpi ta dia mbuma na yo. Bo ta tunga ve sambu muntu ya nkaka kuzinga, bo ta kuna mpi ve sambu bantu ya nkaka kudia.”—YEZAYA 65:21, 22.
LUYALU YA YEZU TA TULA NGEMBA MPI LUTANINU NA NTOTO YA MVIMBA.
“Na bilumbu na yandi muntu ya lunungu ta yela bonso matiti ya mpa, mpi ngemba ta kuma mingi tii kuna ngonda ta vanda diaka ve. Yandi ta vanda ti bantu katuka na nzadi-mungwa tii na nzadi-mungwa mpi katuka na Nzadi tii na nsuka ya ntoto. . . . Bambeni na yandi ta lekita mfututu.”—NKUNGA 72:7-9.
YEZU TA KATULA MAMBU YA KUKONDA LUNUNGU.
“Yandi ta wila muntu ya kukonda mfunu mpi nsukami mawa, mpi yandi ta gulusa luzingu ya bansukami. Yandi ta gulusa bo na bampasi mpi na mubulu.”—NKUNGA 72:13, 14.
YEZU TA MANISA BAMPASI MPI LUFWA.
“Lufwa ta vandaka diaka ve; mawa, bidilu, mpi mpasi ta vandaka diaka ve.”—KUSONGA 21:4.
