Wobua fukpekpe be enye nu siwo ame wɔ le agbe sia me alo agbe si wònɔ hafi va dzɔ la me tsonu. Wobunɛ be ame ate ŋu ava ɖo moksha, si nye nɔnɔme si me womagate ŋu agbugbɔ ame adzi le o. Wobunɛ be ame va ɖoa teƒe sia ne eƒe susu dzo ɖa le xexemenuwo dzi.

Wobua fukpekpe be enye nu vɔ̃ ƒe tohehe kple xɔse ƒe dodokpɔ. Agbalẽnyalagã Sayyid Syeed si nye habɔbɔ aɖe ƒe ŋgɔnɔla gblɔ be, ‘nu siwo dzɔna ɖe mía dzi la ɖoa ŋku edzi na mí be míada akpe na Mawu ɖe eƒe yayrawo ta, eye woɖoa ŋku edzi na mí hã be míakpe ɖe ame siwo nu hiã la ŋu.’

Woxɔe se be ame ŋutɔ ƒe nuwɔnawoe nana wòkpea fu. Yudatɔ aɖewo gblɔ be tsitretsitsi li, eye le tsitretsitsia megbe la, woadrɔ̃ ʋɔnu dzɔdzɔe na ame maɖifɔ siwo kpe fu la. Yudatɔ siwo xɔ gbɔgbɔwo dzi se fiaa nu tso gbugbɔgadzɔ ŋu eye wogblɔna be enaa mɔnukpɔkpɔ ame be wòaxe fe ɖe eƒe nu vɔ̃wo ta.

Woxɔe se be zi gbɔ zi ale si ame gbugbɔgadzɔ ko la, ayi edzi anɔ fu kpem va se ɖe esime eƒe nuwɔna gbegblẽwo, seselelãmewo kple nu dzodzrowo nu yi. Ame ate ŋu ato nunya, dɔ nyuiwo, kple susua mamla dzi aɖo nirvana. Nirvana nye afi si fukpekpewo katã nu yina le.

Numekugbalẽ aɖe gblɔ be woxɔe se be “amegbetɔwo ƒe kpododo nu kple vodadawo” gbɔe míaƒe fukpekpewo tso. Woxɔe se be ame ate ŋu ato agbe nyui nɔnɔ dzi aɖe eƒe fukpekpewo dzi akpɔtɔ, gake zi geɖe la, “gbɔgbɔmenuwɔwɔ siwo ƒe ŋusẽ gbɔ amegbetɔwo tɔ ŋu gbɔe fukpekpewo tsona. Le go siawo me la, ele be ame nalɔ̃ ɖe nu si gbɔgbɔmenuwɔwɔ siawo ɖo la dzi.”

Woxɔe se be adzetɔwo ate ŋu ahe dzɔgbe nyui alo dzɔgbe vɔ̃e ava ame dzi, eya ta woate ŋu ato vɔsawo dzi alé avu wo. Ne ame aɖe le dɔ aɖe si wotsɔ ƒui lém la, nuwɔlawo ate ŋu asa vɔ alo awɔ atike nɛ be wòahaya.

Woxɔe se be mía dzila gbãtɔwo gbɔe míaƒe fukpekpewo tso, abe ale si Biblia-gbalẽ gbãtɔ si nye Mose Ƒe Agbalẽ Gbãtɔ gblɔe ene. Gake nufiafia vovovowo tɔ tsi nya sia. Le kpɔɖeŋu me, Katolikotɔ aɖewo gblɔna be ame aɖe ate ŋu akpe fu be wòaɖe vi na tsɔtsia alo ate ŋu akpe fu be ame bubuwo nato edzi akpɔ ɖeɖe.