5. Әзаблар нә вахтса битәҹәк?
Буну билмәк нәјә ҝөрә ваҹибдир?
Әҝәр әзабларын битәҹәјинә инанмаг үчүн әсасымыз олса, һәјата никбин бахаҹағыг вә Аллаһла бағлы јанлыш фикирләрдән азад олаҹағыг.
Дүшүнүн
Чохлары әзаблара сон гојмаг истәјәрди, амма әлләриндән һеч нә ҝәлмир. Нөвбәти мәгамлара диггәт јетирин.
Тибб саһәсиндәки наилијјәтләрә рәғмән,..
-
Үрәк хәстәликләри өлүм һалларынын башлыҹа сәбәби олараг галыр.
-
Хәрчәнҝ һәр ил милјонларла инсанын һәјатына сон гојур.
-
«Дүнјада узун илләрдир мөвҹуд олан, јени јаранан вә јенидән баш галдыран инфексион хәстәликләр һәлә дә түғјан едир», — дејә бир мүтәхәссис гејд едир («Frontiers in Immunology»).
Бүдҹәси зәнҝин олан бәзи өлкәләрдә белә,..
-
Һәр ил милјонларла ушаг өлүр вә бу, чох вахт јохсул әһалинин мәскунлашдығы әразиләрин пајына дүшүр.
-
Милјардларла инсанын јашадығы әразидә лазыми санитар-ҝиҝијена шәраити мөвҹуд дејил.
-
Јүз милјонларла инсан тәмиз су гытлығындан әзијјәт чәкир.
Инсан һүгуглары барәдә ҹәмијјәтдә мәлумат ҝетдикҹә артса да,..
-
Бир чох өлкәләрдә инсан алвери давам едир. БМТ-нин һесабатына әсасән, ҹинајәткарлары ҹәзаландырмајан өлкәләр «ја проблемә ҝөз јумурлар, ја да бу ҹинајәтлә мүбаризә апармаг үчүн кифајәт гәдәр ресурслара малик дејилләр».
ӘЛАВӘ МӘЛУМАТ
jw.org сајтындан «Аллаһын Падшаһлығы нәдир?» адлы видеоја бахын.
Мүгәддәс Китабда дејилир
Аллаһ гајғымызы чәкир.
Аллаһ бизим ағры-аҹымыза, әзабларымыза биҝанә дејил.
«О [Аллаһ], мәзлумун дәрдини рәдд етмәди, ситәминдән ијрәнмәди, ондан үз дөндәрмәди, фәрјадыны ешитди» (ЗӘБУР 22:24).
«Бүтүн гајғыларынызы Онун үзәринә гојун, чүнки О, гајғынызы чәкир» (1 БУТРУС 5:7).
Әзаблар сонсузадәк давам етмәјәҹәк.
Мүгәддәс Китабда вәд олунур ки, Аллаһын инсанларла бағлы нијјәти ҝерчәкләшәҹәк.
«Аллаһ... онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг» (ВӘҺЈ 21:3, 4).
Аллаһ әзабларын сәбәбини арадан галдыраҹаг.
Аллаһ буну гурдуғу Падшаһлыг васитәсилә һәјата кечирәҹәк. Мүгәддәс Китаба әсасән, Аллаһын Падшаһлығы ҝерчәк һөкумәтдир.
«Ҝөјләрин Аллаһы һеч вахт дағылмајаҹаг бир падшаһлыг гураҹаг. Бу падшаһлыг башга халга кечмәјәҹәк... Әбәди дураҹаг» (ДӘНЈАЛ 2:44).
