5 ?Wan Dei Bambae Yumi No Moa Safa?
?From Wanem i Impoten?
Sipos yumi gat hop se bambae yumi no moa safa, yumi save gat gudfala tingting long saed blong laef mo God tu.
Traem Tingbaot
Plante man oli traehad blong mekem se yumi no moa safa, be oli no naf. Tingbaot hemia:
Nating se save blong man long saed blong meresin i kam antap, be . . .
-
Tede sik blong hat i kilim plante moa man i ded i bitim ol narafala sik.
-
Evri yia plante milian man oli ded from kansa.
-
Wan buk (Frontiers in Immunology) blong Dokta Deved Blum, i talem se: “Wol i fulap yet long ol sik we oli stap longtaem finis, ol niufala sik, mo ol olfala sik we oli kamaot bakegen.”
Nating se sam kantri oli rij be . . .
-
Evri yia, plante milian pikinini oli ded long ol pua kantri.
-
Plante milian man oli no gat gudfala toelet.
-
Plante milian man oli no gat klin wota.
Nating se plante moa man oli save se oli mas respektem raet blong ol narafala, be . . .
-
Bisnes ya blong salem ol man oli kam slef long narafala kantri, i stap gohed yet. Ripot blong Yunaeted Nesen i talem se, hemia from we gavman “i no save se samting ya i stap gohed, o maet hem i save be i no panisim olgeta.”
BLONG SAVE MOA
Wajem video ya ?Wanem Ya Kingdom Blong God? long jw.org.
Samting We Baebol i Talem
God i tingbaot yumi.
Hem i harem nogud taem hem i luk we yumi safa.
“[God] i no save fogetem ol puaman, mo i no save livim olgeta oli stap harem nogud. Hem i no save tanem baksaed long olgeta. Taem oli krae long hem blong i givhan long olgeta, hem i stap ansa long olgeta.”—OL SAM 22:24.
“Yufala i mas lego ol wari blong yufala long hem, from we hem i stap tingbaot yufala.”—1 PITA 5:7.
Bambae yumi no gohed blong safa olwe.
Baebol i promes se plan blong God bambae i kamtru.
“[God] bambae i ravemaot wota blong ae blong olgeta, mo bambae i no moa gat man i ded, mo bambae man i no moa krae from we hem i sore, mo bambae i no moa gat man i krae, mo bambae man i no moa harem nogud long bodi blong hem.”—REVELESEN 21:3, 4.
God bambae i tekemaot ol trabol we i mekem yumi safa.
Bambae hem i yusum Kingdom, we i gavman blong hem, blong mekem olsem.
“God ya we i stap long heven bambae i stanemap wan king [“kingdom,” NW] we rul blong hem bambae i no save finis samtaem. Bambae i no gat wan king i save winim hem. . . . Bambae hem i rul oltaem gogo i no save finis.”—DANIEL 2:44.
