Kon mawala ang pag-antos, makabaton tag positibong panglantaw sa atong kinabuhi ug bisan sa atong panglantaw sa Diyos.

Gustong wagtangon sa daghang tawo ang pag-antos, pero limitado lang ang ilang mahimo bahin niana. Matikdi ang mosunod:

Bisag miuswag ang medisina . . .

• Ang sakit sa kasingkasing mao gihapon ang hinungdan sa kamatayon sa daghang tawo.

• Minilyon ang mamatay kada tuig sa kanser.

• “Ang kalibotan padayong nag-atubang ug bag-ong makatakod nga mga sakit, apil ang dugay na kaayong mga sakit, ug ang karaang mga sakit nga namalik,” misulat si Dr. David Bloom sa journal nga Frontiers in Immunology.

Bisag dato ang ubang nasod . . .

• Kada tuig, minilyong bata ang mamatay ug sagad mahitabo ni diha sa pobreng mga lugar.

• Binilyong tawo ang walay tarong nga kasilyas.

• Gatosan ka milyon ang walay hinlong tubig.

Bisag daghan ang nahibalo bahin sa katungod sa tawo . . .

• Komon sa daghang kayutaan ang human trafficking, ug ang mga nasod nga wala magpriso sa mga nagbuhat niini “buta sa maong problema, o wala silay igong ebidensiya nga prisohon kining mga tawhana,” mireport ang United Nations.

  DUGANG IMPORMASYON

  Tan-awa ang video nga Unsa ang Gingharian sa Diyos? sa jw.org.

Gimahal ta sa Diyos.

Nakita niya ang atong kasakit ug pag-antos.

“Wala niya [Diyos] tamaya o dumti ang pag-antos sa dinaogdaog; wala niya itago ang iyang nawong gikan kaniya. Dihang siya mituaw kaniya alang sa tabang, iya kining gidungog.”​—SALMO 22:24.

“Itugyan kaniya ang tanan ninyong kabalaka, kay gimahal mo niya.”​—1 PEDRO 5:7.

Ang pag-antos dili magpadayon hangtod sa hangtod.

Ang Bibliya nagsaad nga matuman ang katuyoan sa Diyos para sa tawo.

“Pahiran [sa Diyos] ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.”​—PINADAYAG 21:4.

Wad-on sa Diyos ang tanang hinungdan sa pag-antos sa tawo.

Himoon niya kini pinaagi sa iyang Gingharian nga giingon sa Bibliya nga tinuod nga gobyerno.

“Ang Diyos sa langit magtukod ug gingharian nga dili gayod malaglag. Ug kini nga gingharian dili ipasa ngadto sa laing katawhan. . . . Ug kini ray mobarog hangtod sa hangtod.”​—DANIEL 2:44.