5 E na Bon Toki te Rawawata?
E Kakawaki Bwa Ti na Ataa te Kaeka
Ngkana ti kona ni kakoauaa ae e na bon toki te rawawata, ao anne te aeka ni kantaninga ae kona ni kanakoraoa riki iangoan te maiu iroura, ao bon iangoan naba te Atua iroura.
Iangoi Baikai
A bati aomata aika kataia ni katoka te rawawata, ma e a bon riaon aia konaa. Nori baikai:
E ngae ngke e a rikirake te rabakau i aoni bwainnaoraki, ma . . .
-
E teimatoa n riki te mamaara ni buroo bwa te kabanea ni mwaiti te mate iai.
-
A mate aomata aika mirion ma mirion ni katoa ririki n te kaentia.
-
E korea ae kangai Dr. David Bloom n te boki ae te Frontiers in Immunology: “A teimatoa kaain te aonnaba aei ni kaaitara ma kakamaakun aoraki aika ewewe ake a a kaoti ao ake a a manga kaoti kaua riki.”
E ngae ngke a kaubwai aaba tabeua, ma . . .
-
A mamate ataei aika mirion ma mirion ni katoa ririki ao angia mai buakoia bon naake a maeka n taabo aika maiu ni kainnano kaaia.
-
Birion ma birion aomata aika aikoa maeka ma te itiaki.
-
Irabubua te mirion aomata aika maiu n taabo aika aki itiaki iai te ran.
E ngae ngke a a bati riki ngkai aomata aika ataa te aroaro ae riai nakoia tabemwaang, ma . . .
-
E ribootinna te United Nations bwa e bon teimatoa naba ni waaki kaboonakoaia aomata bwa a na tautoronaki n aaba aika bati, ao aaba ake a aki katuuaaeia naake a karaoi mwakuri aikai, a bon aki atai kangaanga aikai ke a aki kona ni katuuaaeia.
REIAKINNA RIKI
Mataku n te taamnei ae Tera Ana Tautaeka n Uea te Atua? ae kona n reke n jw.org.
Te Bae E Taekinna te Baibara
E mumutiakinira te Atua.
E nori marakira ma rawawatara.
“Bwa e aki ribaa ke n taboribaa rawawatan te aomata ae karawawataaki [te Atua], ao e aki karabaa matana mairouna. Ao e ongo ngkana e tang nakoina ni kani buokaki.”—TAIAN ARERU 22:24.
“Kabanei ami iango n raraoma ni kaaki i aona, ibukina bwa e mumutiakiningkami.”—1 BETERO 5:7.
E na bon aki reitinako te rawawata n aki toki.
E berita te Baibara bwa e na boni kakororaoaki ana kantaninga te Atua ibukira.
“E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki.”—TE KAOTIOTI 21:3, 4.
E na boni katoki baike a karika rawawataia aomata te Atua.
E na karaoa aei rinanon ana Tautaeka n Uea, are kabwarabwaraaki n te Baibara bwa te tautaeka ni koaua.
“E na katea te tautaeka n uea teuana Atuani karawa ae e na bon aki kamaunaaki. Ao e na bon aki kanakoaki te tautaeka n uea aei nakoia aomata riki tabemwaang. . . . E na teimatoa n aki toki.”—TANIERA 2:44.
