Kon nagalaum kita nga madula ang pag-antos, mangin mas positibo ang aton pagtan-aw sa kabuhi kag sa Dios.

Gusto gid sang madamo nga tawo nga madula na ang pag-antos, pero limitado lang ang ila mahimo. Binagbinaga ang masunod:

Bisan pa padayon nga nagauswag ang medisina . . .

• Ang balatian sa tagipusuon amo gihapon ang nagapanguna nga rason sang kamatayon.

• Minilyon ka tawo ang nagakapatay sa kanser kada tuig.

• “Indi gihapon mabulong ang madamo nga makalalaton nga balatian. Ang iban sini nga balatian madugay na nga nadiskobrehan, ang iban bag-o pa lang, kag may ara nga nagabalikbalik lang,” siling ni Dr. David Bloom sa iya dyurnal nga Frontiers in Immunology.

Bisan pa manggaranon ang iban nga pungsod . . .

• Kada tuig, minilyon ka kabataan ang nagakapatay, ilabi na sa mga lugar nga grabe ang kapigaduhon.

• Binilyon ka mga tawo ang wala sing nagakaigo nga kasilyas.

• Ginatos ka milyon ang wala sing kuluhaan sing matinlo nga tubig.

Bisan pa madamo na subong ang nakahibalo parte sa mga kinamatarong sang tawo . . .

• Nagakatabo gihapon ang pagbaligya sang tawo sa madamo nga kadutaan. Kag sa mga pungsod nga wala gid nakasilot sa mga nakasala, “ginapabulagbulagan lang ini sang awtoridad ukon wala sila sing ikasarang nga prisuhon ang mga nagahimo sini,” siling sang isa ka report sang United Nations.

  DUGANGI ANG IMO NAHIBALUAN

  Tan-awa ang video nga Ano ang Ginharian sang Dios? sa jw.org/hil.

Nagaulikid ang Dios sa aton.

Makita niya ang aton kasakit kag kasubo.

‘Wala gintamay ukon ginkangil-aran sang Dios ang pag-antos sang ginapigos; wala niya ginlipdan ang iya nawong sa iya. Sang nangayo sia sing bulig, ginpamatian niya sia.’—SALMO 22:24.

‘Itugyan ninyo sa iya ang tanan ninyo nga kabalaka, kay nagaulikid sia sa inyo.’—1 PEDRO 5:7.

May katapusan ang pag-antos.

Ang Biblia nagapromisa nga matuman ang katuyuan sang Dios para sa aton.

“Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.”—BUGNA 21:3, 4.

Dulaon sang Dios ang mga rason sang pag-antos sang tawo.

Himuon niya ini paagi sa iya Ginharian, nga suno sa Biblia, isa ka matuod nga gobierno.

“Ang Dios sang langit magatukod sing isa ka ginharian nga indi gid malaglag. Ini nga ginharian indi pag-ihatag kay bisan sin-o nga tawo. . . . Ini lamang ang magapabilin sing dayon.”—DANIEL 2:44.