5 Thaum Twg Mam Li Tsis Muaj Kev Txom Nyem Lawm?
Ua Cas Thiaj Nug Li No?
Yog tias tsis muaj kev txom nyem ces peb yuav tau lub neej kaj nrig thiab peb yuav tsis liam Vajtswv ntxiv lawm.
Xav Txog Qhov No
Coob leej ntau tus tsis xav kom muaj kev txom nyem tiamsis lawv tsis muaj peevxwm kho tau txhua yam.
Txawm tibneeg txawj kho mob npaum li cas los . . .
-
Tibneeg tseem tuag qas qees vim plawv nres.
-
Coob leej ntau tus tseem tuag qas qees txhua xyoo vim mob kheeb xawm.
-
Ib tug neeg tshawb txujci sau tias tibneeg tseem niaj hnub muaj tej kab mob ntau zuj zus uas kho tsis tau, thiab tej kab mob uas tibneeg xav tias twb kho tau lawm los kuj rov qab ua rau tibneeg muaj mob dua.
Txawm tias tej lub tebchaws muaj nyiaj npaum li cas los . . .
-
Tej menyuam tseem niaj xyoo tuag tsheej plhom leej. Cov tsis muaj nyiaj yog cov tuag coob tshaj.
-
Tsheej plhom leej tibneeg tsis muaj dej los ntxuav tes thiab tsis muaj chav dej siv.
-
Tsheej plhom leej tibneeg niaj hnub haus cov dej uas tsis huv.
Txawm tibneeg paub tias yuav tsum sib hlub sib pab los . . .
-
Lub koom haum ntiajteb UN (United Nations) tshaj tawm tias nyob rau ntau lub tebchaws, muaj neeg nyiag tibneeg coj mus muag thiab ua limhiam rau. Muaj tej nom tswv xav pab los pab tsis tau.
KAWM NTXIV
Saib zaj yeeb yaj kiab Vajtswv Lub Nceeg Vaj Yog Dabtsi? hauv lub vej xaij jw.org/hmn.
Phau Vajlugkub Hais Li No
Vajtswv hlub peb.
Nws yeej paub peb tej kev nyuaj siab.
“[Vajtswv] tsis tau muab cov neeg pluag tso tseg lossis tsis quavntsej tej kev txomnyem uas lawv raug, nws tsis tau khiav tso lawv tseg, tiamsis nws yeej teb lawv tej lus thov thaum lawv thov nws.”—PHAU NTAWV NKAUJ 22:24.
“Vajtswv yog tus uas niaj hnub tsomkwm nej, yog li ntawd nej cia li muab nej tej kev nyuaj siab huv tibsi tso plhuav rau Vajtswv.”—1 PETUS 5:7.
Tibneeg yeej yuav tsis txom nyem mus li.
Vajtswv cog lus tseg hauv phau Vajlugkub tias yuav tsis muaj kev txom nyem ntxiv lawm.
“Vajtswv . . . yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”—TSHWMSIM 21:3, 4.
Vajtswv yuav pab kom peb tsis txhob txom nyem ntxiv lawm.
Vajtswv yuav siv nws lub tseem fwv lossis Nceeg Vaj los kho tibneeg tej teeb meem.
“Vajtswv tus uas nyob saum ntuj yuav tsa ib lub tebchaws [tseem fwv, NWT] uas yuav nyob mus tsis paub kawg li. Lub tebchaws ntawd yuav tsis muaj leejtwg kovyeej nws, . . . nws yuav nyob mus ibtxhis.”—DANIYEES 2:44.
