Nu kurug tu mawawan i pazziga-riga, mapakasta natun nga iddanama i pagimamma tam ta pattolay anna i pagimamma tam ta Dios.

Ikaya na aru nga totolay nga alsan i pazziga-riga, ngem limitadu laman i makuada. Angngariganna:

Maski ta papprogreso na medisina . . .

• I taki ta futu lagapa i primeru nga makagafu ta patay.

• Minillion i matay ta cancer kada ragun.

• “Aru lagapa i makeyali ira nga taki nga awan tu uruna, bagu ira nga taki, anna taki ira nga limittuag mangana kabalin na aru nga dagun,” nitura ni Dr. David Bloom ta journal nga Frontiers in Immunology.

Maski mariku i karuan nga nasion . . .

• Minillion nga abbarabbing i matay kada ragun, anna aru nira i maddian ta pobre ira nga lugar.

• Binillion nga totolay i awan tu mepangngo nga sanitasiodda.

• Ginatu nga million i awan tu pangapadda tu marenu nga danum.

Maski nu ammu mabba na aru nga totolay nu kunnasi nakuan tratuan i kasittoleda . . .

• Mesissimmu lagapa i human trafficking ta aru nga lugar, anna i nasion ira nga awan paga tu nasentensiadda taw nga kaso ay megafu ta “ariadda ammu nga mesissimmu yaw, onu awan tu makuada taw,” segun ta report na United Nations.

  AMMUAN PAGA

  Girawan i video nga Anni i Pappatulan na Dios? ta jw.org/ibg.

Iddeddukan ittam na Dios.

Ikavurunganna ittam nu matakitan ittam anna nu maddaddam ittam.

“I mariga ira ay arian [na Dios] nga kattaman; ta pazziga-riga da, arian na ira nga pallikuran; arian na ira vuluvuga nga pagurayan, ay nu makiyoffun ira sa, en-na ira tangngagan.”​—SALMO 22:24.

“Ipammakatalo nu sa ngamin i kavurungan nu ta yaya i manangngal nikamu.”​—1 PEDRO 5:7.

Ari tu mannanayun i pazziga-riga.

Nipromesa na Biblia nga matuppal i gakkag na Dios para ta totolay.

“Funatan [na Dios] ngamin i lulua da nga manuru, anna awan ngana noka tu matay, onu maraddam, onu tumangi-tangi, onu magattam ta taki.”​—NEPAKANNAMMU 21:3, 4.

Alsan na Dios i makagafu ira ta pazziga-riga na totolay.

Kuanna yaw gukaban na Pappatulanna. Segun ta Biblia, tadday yaw nga kurug nga gobiernu.

“Mamataddag noka i Dios na langi tu tadday nga pappatulan nga ari vuluvuga madaral noka. Yaw nga pappatulan ay ari noka meyawa ta maski sinni nga tanakuan nga totolay. . . . Yaw laman i mattalupaddian adde noka.”​—DANIEL 2:44.