No adda ti rason a mamatitayo nga agpatingganto ti panagsagaba, sumayaat ti panangmatmattayo iti biag ken maaddaantayo iti nasayaat a relasion iti Dios.

Kayat ti adu a tattao a pagpatinggaen ti panagsagaba, ngem limitado ti maaramidanda iti dayta. Kitaem ti sumaganad:

Uray rumangrang-ay ti medisina . . .

• Adu latta ti matmatay iti sakit ti puso.

• Tinawen latta a minilion ti matmatay iti kanser.

• “Adda latta dagiti nabayagen a sakit, kabbaro a sakit, ken nagsubli a makaakar a sakit,” insurat ni Dr. David Bloom iti journal a Frontiers in Immunology.

Uray nabaknang ti dadduma a pagilian . . .

• Tinawen a minilion nga ubbing ti matmatay. Nangnangruna nga apektado iti daytoy dagiti lugar nga ayan dagiti napanglaw.

• Binilion a tattao ti awanan iti nasayaat a sanitasion.

• Ginasut a milion ti awanan iti nadalus a danum.

Uray ad-adun ti ammo dagiti tattao maipapan iti kalintegan ti tao . . .

• Iti adu a pagilian, agtultuloy latta ti pannakaipuslit dagiti tattao ket saan a maidardarum dagiti mangar-aramid iti daytoy gapu ta “saan nga ammo daytoy ti autoridad, wenno dida kabaelan a solusionan,” kuna ti maysa a report ti United Nations.

  AMMUEM TI AD-ADU PAY

  Buyaem ti video nga Ania ti Pagarian ti Dios? iti jw.org/ilo.

Maseknan ti Dios kadatayo.

Ammona dagiti marikriknatayo nga ut-ot ken ladingit.

“Iti panagrigat ti mailupitlupit, [ti Dios] dina inkidem dagiti matana; saanna a tinallikudan. Idi agpatulong, dinengngegna ti pakaasina.”—SALMO 22:24.

“Ipalladawyo kenkuana ti amin a pakadanaganyo, ta ipatpategnakayo.”—1 PEDRO 5:7.

Saan nga agnanayon ti panagsagaba.

Ikarkari ti Biblia a matungpalto ti panggep ti Dios para kadatayo.

“Ti Dios . . . punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot.”—APOCALIPSIS 21:3, 4.

Ikkatento ti Dios dagiti pakaigapuan ti panagsagaba ti tao.

Aramidennanto daytoy babaen ti Pagarianna, nga inladawan ti Biblia kas pudpudno a gobierno.

“Mangipasdekto ti Dios ti langit iti maysa a pagarian a saanto pulos a madadael. Daytoy a pagarian ket saanto a mayawat iti aniaman a sabali nga ili. . . . Daytanto laeng ti agtalinaed iti agnanayon.”—DANIEL 2:44.