5 Bampasi ekosila mokolo mosusu?
Ntina ya koyeba yango
Soki elikya ezali ete bampasi ekosila, yango ekobongola ndenge na biso ya kotalela bomoi mpe ya kotalela Nzambe.
Kanisá naino
Bato mingi balukaka kosilisa bampasi kasi bakokaka te. Talá mwa bandakisa:
Atako mayele ya minganga ezali se kobakisama . . .
Maladi ya motema ezali kaka koboma bato mingi.
Kansɛr ezali koboma bamilio ya bato mbula na mbula.
Na zulunalo moko (Frontiers in Immunology) Doktɛrɛ David Bloom akomaki ete “atako mayele ya minganga ezali kobakisama mingi lelo oyo, minganga bazali kokoka te kosilisa bamaladi mingi. Kutu, bamaladi mosusu ezali kobakisama mpe oyo elimwaki ezongi.”
Atako bamboka mosusu ezali na bozwi . . .
Mbula na mbula bamilio ya bana bakufaka, mingimingi na bisika oyo babola bazali.
Bamiliare ya bato bazalaka na batwalɛti ya malamu te.
Bato ebele mpenza bamɛlaka mai ya malamu te.
Atako bato bayebi malamu ndenge basengeli kosalela basusu makambo . . .
Lapolo moko ya ONU elobi ete na bamboka mpe mikili mingi batɛkaka bato mpe bato oyo basalaka yango bakangaka bango te mpo bakonzi bayebi te makambo oyo ezali kosalema to mpe bazali na nguya te ya kokanga bato yango.
MPO NA KOYEBA MAKAMBO MOSUSU
Talá video Bokonzi ya Nzambe ezali nini? ezali na jw.org.
Oyo Biblia elobi
Nzambe akipaka biso.
Asepelaka te ntango tozali komona mpasi mpe tozali na mawa.
“[Nzambe] atyoli te mpe ayoki mpii te mpo na mpasi ya moto ya mpasi; mpe abombeli ye elongi na ye te, mpe ntango alelelaki ye mpo na kosɛnga lisalisi ayokaki.” —NZEMBO 22:24.
‘Bóbwakela ye mitungisi na bino nyonso, mpo atyelaka bino likebi.’—1 PETRO 5:7.
Bampasi ekosila.
Biblia elobi ete Nzambe akosala makambo nyonso oyo alaki biso.
“Nzambe . . . akopangwisa mpisoli nyonso na miso na bango, mpe liwa ekozala lisusu te, ná lilaka ná koganga ná mpasi ekozala lisusu mpe te.”—EMONISELI 21:3, 4.
Nzambe akosilisa makambo nyonso oyo ebimiselaka bato mpasi.
Bokonzi to guvɛrnema ya Nzambe nde ekobongisa makambo.
“Nzambe ya likoló akotya bokonzi moko oyo ekobebisama te. Mpe bokonzi yango ekoleka na ekólo mosusu te. . . . Ekotikala seko.”—DANYELE 2:44.
Talá mpe...
LAMUKÁ!
Bomoi ezangi mpasi—Elikya ya solosolo
Biblia elaki ete mosika te makama nyonso ekosila mpo na libela.
LINƆ́NGI YA MOSƐNZƐLI
Etikali moke bampasi esila!
Nzambe alaki ete akolongola makambo nyonso oyo ebimisaka bampasi. Ndenge nini mpe ntango nini akosala yango?
