5 Kana Manyando Akafela Nako Yeñwi?
Libaka Haluswanela Kuziba Kalabo Kwa Puzo Yeo
Haiba lulumela kuli manyando akafela, lukaba ni mubonelo omunde ka za bupilo ni ka za Mulimu.
Za Kunahanisisa
Batu babañata batabela luli kufelisa manyando, kono habana feela buikoneli bwa kueza cwalo. Munyakisise mitala yelatelela:
Kusina taba kuli milyani seili yemiñata . . .
-
Butuku bwa pilu buzwelapili kubulaya batu babañata kufita butuku bufi kamba bufi.
-
Silimo ni silimo, batu babañata-ñata basweli bashwa kabakala butuku bwa kansa.
-
Mwa magazini yeñwi yebizwa Frontiers in Immunology, caziba wa libizo la David Bloom utalusa kuli: “Kacenu mwa lifasi kunani matuku asabile teñi ka nako yetelele, kunani matuku amanca, mi matuku amañwi anaabanga teñi kwamulaho ki kale akuta hape.”
Kusina taba kuli linaha zeñwi lifumile . . .
-
Silimo ni silimo, banana babañata-ñata bashwanga, mi buñata bwa banana bao bapila mwa libaka zebotanile hahulu.
-
Buñata bwa batu bapila mwa libaka mokusina hande makete.
-
Batu babañata habana mezi amande a kuitusisa.
Kusina taba kuli batu babañata sebaziba litukelo zanani zona mañi ni mañi . . .
-
Taba ya kulekisa batu babañwi izwelapili kuekezeha mwa linaha zeñata, mi ka kuya ka piho yeñwi ya ba United Nations, nto yetahisa kuli batu babalekisanga batu basike bafiwa mulatu kikuli, “ba muuso mwa linaha zecwalo habazibi zebaeza batu bao kamba habana feela lika zetokwahala kuli baswale batu bao.”
MUITUTE ZEÑATA
Mubuhe vidio yeli Mubuso wa Mulimu ki Nto Mañi? yefumaneha fa webusaiti ya jw.org/loz.
Zeibulela Bibele
Mulimu waluisa pilu.
Wautwisisa miinelo yetaata yelusweli kukopana ni yona.
‘Mulimu haasika sheununa kamba kunyenya manyando a yanyandile; haasika mupatela pata yahae. Hanaa mulilezi kukupa tuso, naautwile.’—SAMU 22:24.
‘Munepele lipilaelo zamina kaufela ku yena, kakuli wamiisa pilu.’—1 PITROSI 5:7.
Manyando haana kuzwelapili kuba teñi.
Bibele ilusepisa kuli zasepisize Mulimu likatalelezwa.
“Mulimu . . . ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”—SINULO 21:3, 4.
Mulimu ukafelisa lika kaufela zetahiseza batu manyando.
Mulimu ukaeza cwalo ka kuitusisa Mubuso wahae.
“Mulimu wa lihalimu ukatoma mubuso osike wasinyiwa nikamuta. Mi mubuso wo hauna kushimbulukela kwa sicaba sisili. . . . Ki ona feela okaba teñi kuya kuile.”—DANIELE 2:44.
