Kachi nge natufwelela ngwetu kuyanda nachikakuma, kaha lutalililo kana nalutukafwa tumone kuyoya kupwa chachilemu nakumona nawa Kalunga mujila yamwaza.

Vatu vavavulu veji kuzatanga nangolo mangana vakumise kuyanda chosena, oloze kavahasa kuchikumisako. Achishinganyekenu havyuma vino:

Chamokomoko nakuzovoloka chavaka-kutunga vitumbo . . .

• Musongo wamuchima chiujiha lika vatu.

• Musongo wakasa uli nakujiha vatu vavavulu mwaka himwaka.

• Ndotolo David Bloom asonekele mumangazini yaFrontiers in Immunology ngwenyi: “Mukaye kosena vatu vali nakuviza misongo yakulisezaseza yize vanahase kulitambwisa.”

Numba tuhu mumafuchi amwe mwatwama jimbongo jajivulu, oloze . . .

• Mwaka himwaka vanyike vavavulu veji kufwanga, kaha chuma kana cheji kusolokanga chikumanyi kujingalila kuze kwatwama vaka-kuhutwa.

• Vatu vavavulu kavatwama muvihela vyaunyojiko.

• Vatu vavavulu vatwama mujingalila muze kamwatwama meya amwazako.

Numba tuhu vatu vavavulu vatachikiza lisesa vatwama nalyo vatu . . .

• Oloze kuvihela vyavivulu namumafuchi amavulu vatu vachili lika nakulanjisa vakwavo, kaha vaze vanakulanjisanga vakwavo kaveshi nakuvazangamisako, mwomwo pamo fulumende kayatachikijile ngwavo vatu vali nakulanjisa vakwavoko, chipwe pamo kaveshi najimbongo chipwe ngolo jakuzangamisa vaze vanakulanjisa vakwavoko. Omu mukiko vahanjikile mulipoti lyavaka-United Nations.

  LINANGULENU VYAVIVULU

  Yenu ha jw.org. mutale vindiyo yakwamba ngwavo, Wangana waKalunga chuma muka?

Kalunga eji kutuzakamanga.

Eji kwivwanga kupihya chikuma haukalu tweji kumonanga mukuyoya chetu.

“[Kalunga] kalumbilishile chipwe kuhunga ukalu wamutu uze vali nakuyanjisako. Kaliswekele kuli ikiyeko. Amwivwile omu atwile kawelele kuli ikiye.”—SAMU 22:24.

“Mbilenu kulizakamina chenu chosena hali ikiye, mwomwo amizakama.”—WAPETULU 1, 5:7.

Kuyanda kacheshi kukatwalaho likako.

Mbimbiliya yatushika ngwayo vyuma ajinyine Kalunga navikatesamo.

“Kalunga . . . mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—KUSOLOKA 21:3, 4.

Kalunga mwakafumisako vyuma vize vyeji kunehanga kuyanda.

Mwakafumisako vyuma kana kuhichila muWangana wenyi uze wapwa fulumende yamwilu.

“Kalunga wamwilu mwakahakako wangana uze kaveshi kukanongesako. Wangana kana kaveshi kukauhana kuvatu vekako. . . . kaha ukiko naukapwangako haya myaka yosena.”—NDANYELE 2:44.