5 ¿Kpolpe jun qʼij jatumel miʼn tentl yajbʼil?
¿Tiquʼn nim toklen xjel lu?
Qa qʼuqli qkʼuʼj tiʼj qa kʼelel qʼiʼn nya bʼaʼn, jaku tzʼonin qiʼj tuʼn tkubʼ qnaʼn mas tzalajbʼil ex tuʼn tten jun tbʼanel qximbʼetz tiʼj Dios.
Ximana tiʼj jlu
Nim xjal kyaj tuʼn tel kyiʼn yajbʼil, pero mlay bʼant nim tiʼ kyuʼn. Qʼonk twitza kyiʼj tqanil lu:
Maske o tzʼel kynikʼ doctor kyiʼj junjun tiʼchaq...
-
... kukx in che kyim nim xjal tuʼn yabʼil in tzaj tiʼj kyanmi.
-
... tkyaqil abʼqʼi in che kyim nim millón xjal tuʼn cáncer.
-
... «kukx ateʼ yabʼil jaku tzʼel kyiqen txqantl aju mintiʼ qʼanbʼil tiʼj. Ax ikx ateʼ akʼaj yabʼil ex junjuntl e ten ojtxe o che ten juntl maj», ik tzeʼn kubʼ ttzʼibʼin David Bloom, economista ex demógrafo, toj jun revista científica tiʼj inmunología (Frontiers in Immunology).
Maske at kyqʼinumabʼil junjun tnam...
-
... tkyaqil abʼqʼi in che kyim nim millón kʼwal ex mas kyoj lugar jatumel at mebʼayil moqa prowil.
-
... nim millón xjal in che anqʼin kyoj lugar jatumel mintiʼ qe drenaje ex mintiʼ in bʼant jun tiʼ kyuʼn tiʼj tzʼil aʼ.
-
... nim millón xjal mintiʼ agua potable kyukʼil.
Maske at mas tqanil tiʼjju tuʼn tok qʼet kyoklen xjal...
-
... kyoj nimku tnam ateʼ nim xjal kukx in che bʼaj yajin moqa in cheʼx kʼayin. Ik tzeʼn in tzaj tqʼamaʼn jun tqanil etz tuʼn Naciones Unidas, aʼyeju tnam mintiʼ in xi kybʼinchaʼn tiʼj nya bʼaʼn lu, «bʼalo mintiʼ in nel kynikʼ tiʼjju in bʼaj moqa mintiʼ ojtzqiʼn kyuʼn tzeʼn tuʼn t-xi bʼinchet tiʼj».
TUʼN TEL MAS TNIKʼA
Keʼyinka video ¿Tiʼ aju Tkawbʼil Dios? toj jw.org.
Aju in tzaj tqʼamaʼn Tyol Dios
In ximen Dios qiʼj
In tzaj tbʼis Dios aj ttzaj yajbʼil qiʼj.
«Mintiʼ in che el tikʼun [Dios] qe xjal mebʼa, ex mintiʼ nnikʼ tnaʼl tuʼn aju yajbʼil kye, mintiʼ nneʼl tewan twitz kyiʼj, ex in che tzaj tbʼiʼn ok in kyqanin onbʼil» (SALMO 22:24).
«Tkyaqilju in bʼaj kykʼuʼje tiʼj, kyqʼonxe tuj tkwent Dios, porke ate Dios kwentil kyeye» (1 PEDRO 5:7).
Nya kukx tzul yajbʼil qiʼj
In tzaj ttziyen Xjan Uʼj qa kʼelel tiʼn Dios yajbʼil.
«Kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (APOCALIPSIS 21:3, 4).
Kʼelel tiʼn Dios tkyaqilju in tzaj qʼinte yajbʼil qiʼj
Ok kʼajbʼel Tkawbʼil tuʼn tuʼn tel tiʼn yajbʼil, jun axix tok kawbʼil, ik tzeʼn in tzaj tqʼamaʼn Xjan Uʼj.
«Ate Dios aju at tuj kyaʼj kbʼel tqʼoʼn jun kawbʼil mlay naj ex mlay kubʼ tiʼj tuʼn juntl nasyon, [...] kukx ktel te jumajx» (DANIEL 2:44).
