Komo tikneltokaj ke ejkos tonal keman amo titajyouiskejok, techpaleuis maj amo semi timotekipachokan uan maj timotokikan iuan Dios.

Miakej kinekij kijkuaniskej tajyouilis, sayoj ke amo uelij. Xikonita nejin:

Maski tapajtianij kiajsinij seki pajti:

• Miakej okachi momikiliaj itech nochi taltikpak porin kipiaj se kokolis itech ininyolo.

• Sejse xiuit millones momikiliaj porin kinkui cáncer.

• Itech se amaix, se tapajtijkej akin motokaytia David Bloom kijkuiloj ke axkan onkak seki kokolismej tein temauaj uan amo niman pajtij. No kijkuiloj ke peuak nesij okseki kokolismej uan seki tein onkayajya achto (Frontiers in Immunology).

Maski itech seki altepemej kipiaj tomin:

• Sejse xiuit momikiliaj millones konemej, okachiok itech altepemej kampa semi tatasojti.

• Millones nemij kampa amo tachipaualaj.

• Millones amo kipiaj at tein uelis tayiskej.

Maski miakej kimatij ke moneki kinpoujkaitaskej oksekin:

• Itech miak altepemej, miakej kinnamakaj. Itech se nechikol tein motokaytia Naciones Unidas, moijtoj ke tekiuanij amo kimatij tein panoua oso amo uelij kitamiaj nejon kuejmol.

  XIKONTEMO OKACHI

  Itech jw.org, xikonita video ¿Toni iTekiuajyo Dios?

Dios kineki techpaleuis

Dios no tajyouia keman titajyouiaj.

“[Dios] amo kiixtopeua nion kitauelita akin tajyouia; amo moixkepa okseko. Keman kitsajtsilij maj kipaleui, yejua kikakik.” (SALMO 22:24.)

“Xikpanoltilijtiyakan Dios nochi namoyolkuejmololisuan porin Yejuatsin semi namechyolnejneki de namechyekpixtinemis.” (1 PEDRO 5:7.)

Amo nochipa titajyouiskej

Biblia kijtoua ke Dios kichiuas maj amo titajyouikanok.

“Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok.” (APOCALIPSIS 21:3, 4.)

Dios kiixpolos nochi tein techtajyouiltia

Biblia kijtoua ke Dios ijkon kichiuas porin kiixtalijya se taixyekanalis.

“Dios akin nemi iluikak kiixtalis se taixyekanalis tein amo keman kiixpoloskej nion panos imako okse xolal [...], uan sayoj nejon taixyekanalis yetos nochipaya.” (DANIEL 2:44.)