Me e tumu tetai kia irinaki e ka takoreia te mamae, te akapapu maira e ka meitaki atu to tatou oraanga e ka akamanako meitaki tatou i te Atua.

E manganui te tangata te inangaro ra i te takore i te mamae, inara kare e rauka ia ratou. Akamanako ana i teia:

Noatu te puapinga o te vairakau . . .

• Ko te maki pukuatu te maki maata te akatupu ra i te mate.

• Mirioni ua atu tei mate i te maki cancer i te au mataiti.

• “Te kite ra teianei ao i te au maki kino mei mua mai, te tupu nei, e te akamata akaou maira,” i tata ei a Dr. David Bloom i roto i te makatini Frontiers in Immunology.

Noatu e te puapingaia ra tetai au enua . . .

• I te au mataiti, e mirioni ua atu tamariki te matemate ra, e te tupu putuputu ra i te au ngai putaua.

• Pirioni ua atu tangata kare e ngai repo anga.

• Anere mirioni ua atu tangata kare o ratou vai inu.

Noatu e te mārama ra te tangata i to ratou tikaanga . . .

• Manganui te enua e rave nei i te angaanga akatuikaa, e kare e akautungaia ana, no te mea kare te aronga mana “i kite eaa te tupu ra e kare a ratou ravenga i te akautunga i teia aronga,” i karanga ai te ripoti a te United Nations.

  APII UA ATU

  Akara i te vitio Eaa te Patireia o te Atua? i runga i te jw.org.

Te manako maira te Atua ia tatou.

Kare e ngaropoina iaia to tatou mamae.

“Kare oki [te Atua] i akavaavaa, kare oki i akakino, i te tairoanga o tei tairoia ra: kare oki i uuna i tona mata iaia; kia kapiki ra aia kiaia ra, kua akarongo maira aia.”—SALAMO 22:24.

“E uri i to kotou tumatetenga katoa ki runga iaia; koia oki te tiaki mai ia kotou.”—1 PETERO 5:7.

Kare te mamae e aere ua atu.

Taputou mai te Pipiria e ka akatupuia to te Atua akakoroanga no tatou.

“E na [te Atua] e orei i te roi-mata katoatoa; e e kore rava te mate, e te aue, e te mii; e te mamae oki.”—APOKALUPO 21:3, 4.

Ka takore te Atua i to te tangata mamae.

Na tona Patireia e rave i teia, mei ta te Pipiria e akataka ra e e kavamani tika tikai.

“E akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, . . . e ka vai rai te reira e tuatau ua atu.”—DANIELA 2:44.