መከራ ኸም ዜኽትም ዜእምነና ምኽንያት እንተሎ፡ እዚ ተስፋ እዚ ነቲ ብዛዕባ ህይወትን ብዛዕባ ኣምላኽን ዘሎና ኣረኣእያ ኼመሓይሾ ይኽእል እዩ።

ብዙሓት ሰባት ንመከራ ኼወግድዎ እኳ እንተ ደለዩ፡ ዓቕሞም ግና ድሩት እዩ። ነዚ ዚስዕብ እሞ ተመልከት፦

ኣብ ሕክምና ምዕባለታት እናሃለወ ኽነሱ፡ . . .

• ሕማም ልቢ ብቐዳምነት ዚስራዕ ጠንቂ ሞት ኰይኑ ኣሎ።

• መንሽሮ ኣብ ዓዓመት ሚልዮናት ይቐትል ኣሎ።

• ዶ/ር ዴቪድ ብሉም ኣብ መጽሔት ፍሮንቲርስ ኢን ኢሙኖሎጂ ኸም ዝጸሓፎ፡ “ዓለምና ብሰንኪ እቲ ንነዊሕ ዝጸንሐን ሓድሽ ዚቕልቀል ዘሎን ዳግም ዚቕልቀል ዘሎን ተመሓላላፊ ሕማማት ስግኣት ኣለዋ።”

ኣብ ገሊኡ ሃገራት ስጋዊ ብልጽግና እናሃለወ ኽነሱ፡ . . .

• ኣብ ዓዓመት ሚልዮናት ሕጻናት ይሞቱ ኣለዉ፣ እቶም ኣብ ድኻታት ዓድታት ዚነብሩ ድማ እዮም መብዛሕትኡ ግዜ በዚ ዚጽለዉ።

• ቢልዮናት ሰባት ብዘይ እኹል ሓለዋ ጽሬት ይነብሩ ኣለዉ።

• ኣማእታት ሚልዮናት ቀረብ ውሑስ ማይ የብሎምን።

ብዛዕባ ሰብኣዊ መሰላት ኣፍልጦ እናሃለወ ኽነሱ፡ . . .

• ኣብ ሓያሎ ሃገራት፡ ንግዲ ሰባት ይቕጽል ኣሎ፣ ጸብጻብ ውድብ ሕቡራት ሃገራት ከም ዚብሎ ድማ፡ እቶም ንበደልቲ ብሕጊ ዘይከስስዎም ሰበ ስልጣን፡ “ወይ እቲ ጸገም ኣይርኣዮምን እዩ፣ ወይ ድማ ነቲ ጸገም ንምፍታሕ ዓቕሚ የብሎምን።”

  ተወሳኺ ሓበሬታ ርኸብ

  ኣብ jw.org መንግስቲ ኣምላኽ እንታይ እያ፧ ዘርእስታ ቪድዮ ርአ።

ኣምላኽ ይሓልየልና እዩ።

ብስቓይናን ብሓዘንናን ዘይግድሶ ኣይኰነን።

“[ኣምላኽ] ንመከራ ጭቁን ኣይነዓቐን፡ ኣይፈንፈነን እውን፣ ንገጹ ኻብኡ ኣይከወለን። ናብኡ ምስ ኣእወየ፡ ሰሚዕዎ እዩ።”—መዝሙር 22:24።

“ንሱ ይሓልየልኩም እዩ እሞ፡ ንዅሉ ጭንቀትኩም ናብኡ ደርብይዎ።”—1 ጴጥሮስ 5:7።

መከራ ንሓዋሩ ኣይኪቕጽልን እዩ።

ኣምላኽ ንዓና ዘለዎ ዕላማ ኸም ዚፍጸም መጽሓፍ ቅዱስ የተስፉ እዩ።

“ኣምላኽ . . . ንብዘሎ ንብዓት ካብ ኣዒንቶም ኪደርዝ እዩ፣ ደጊም ሞት ኣይኪኸውንን፡ ደጊም እውን ሓዘን ወይ ኣውያት ወይ ስቓይ ኣይኪኸውንን እዩ።”—ራእይ 21:3, 4።

ኣምላኽ ንጠንቂ መከራ ደቂ ሰብ ፍታሕ ኪገብረሉ እዩ።

ብመንግስቱ ገይሩ እዩ ኸምኡ ዚገብር፣ እዛ መንግስቲ እዚኣ ናይ ሓቂ ምዃና ኸኣ መጽሓፍ ቅዱስ ይገልጽ እዩ።

“ኣምላኽ ሰማይ ንዘለኣለም ከቶ ዘይትጠፍእ መንግስቲ ኬቕውም እዩ። እዛ መንግስቲ እዚኣ ንዝዀነ ኻልእ ህዝቢ ኣይክትውሃብን እያ። . . . ንሳ በይና ኸኣ ንዘለኣለም ክትቀውም እያ።”—ዳንኤል 2:44።