5 Kumbi Masuzgu Ngamalengi?
Ntchifukwa Wuli Tikhumbika Kuziŵa Uneneska?
Kugomezga kuti masuzgu ngamalengi kungatiwovya kuti tiwonengi umoyu mwakwenere kweniso kuti titumbikengi Chiuta.
Ŵanaŵaniyani Ivi
Ŵanthu anandi akhumbisiska kutuzapu masuzgu kweni angafiska cha kutuzapu masuzgu ngosi. Wonani vinthu ivi:
Chinanga kuti mazuŵa nganu kwe munkhwala yinandi . . .
-
Matenda nga mtima ngalutirizga mbwenu kubaya ŵanthu.
-
Chaka chechosi kansa yibaya ŵanthu mamiliyoni nganandi.
-
Dr. David Bloom wakulemba kuti “ŵanthu alutirizga mbwenu kutama matenda ngo ngaleka kumala liŵi, ngo ngengaku kali ndipuso matenda ngo ngatamba ŵaka sonu.”—The journal Frontiers in Immunology.
Chinanga kuti vyaru vinyaki vendi ndalama zinandi . . .
-
Chaka chechosi ŵana mamiliyoni nganandi atufwa. Venivi vichitika ukongwa munyaru vo ŵanthu mbakavu.
-
Ŵanthu mabiliyoni nganandi aja mumalu ngambula kutowa.
-
Ŵanthu ma handiledi nganandi alivi mwawi wakusaniya maji ngamampha kuti agwiriskiyengi ntchitu.
Chinanga kuti ŵanthu mazuŵa nganu aziŵa umampha wanangwa wo munthu weyosi wenawu . . .
-
Lipoti la United Nations lingukamba kuti mumalu nganandi ndipuso muvyaru vinandi malonda ngakugulisa ŵanthu ngaluta panthazi ukongwa ndipu ŵanthu wo agulisa anyawu akoleka cha. Veviyo chifukwa chakuti ŵanthu wo ŵe ndi mazaza “aziŵa cha vo vichitika pamwenga kuti alivi vidya vo angagwiriskiya ntchitu kuti akole ŵanthu ŵenaŵa.”
KUTI MUZIŴI VINANDI
Woneriyani vidiyo yakuti Kumbi Ufumu waku Chiuta Ntchinthu Wuli? pa jw.org.
Vo Bayibolu Likamba
Chiuta watitiŵanaŵaniya.
Iyu waziŵa vinthu viheni vo tikumana navu.
“Pakuti iyu [Chiuta] wamunyoza cha pamwenga kumutinkha munthu wakukandirizgika; wamubisa cha chisku chaki kuti waleki kuchiwona. Iyu wati wamupempha chovyu, wangumuvwisiya.”—SUMU 22:24.
“Muchiponya paku iyu vosi vo vitikufipiskani mtima, chifukwa iyu watikuŵanaŵaniyani.”—1 PETURO 5:7.
Kusuzgika kulutiriyengi cha.
Vo Chiuta wakulayizga ŵanthu vifiskikengi.
“Chiuta . . . wazamuleska masozi ngosi mumasu mwawu, ndipu nyifwa yazamuŵaku so cha, kwazamuŵavi kuliya, kukuta pamwenga urwirwi.”—CHIVUMBUZI 21:3, 4.
Chiuta wazamumalisa vinthu vo vitambisa masuzgu nga ŵanthu.
Iyu wazamugwiriskiya ntchitu Ufumu waki wo ndi boma chayilu.
“Chiuta wakuchanya wazamujalikiska ufumu wo wazamubwangandulika cha. Ufumu wo, wazamuperekeka ku mtundu wewosi cha wa ŵanthu. . . . Ndipu ufumu wenuwu pe ndiwu wazamuŵaku mpaka muyaya.”—DANYELE 2:44.
