5 Sena Kupenga Kuli Nokuyoomana?
Ikaambo Ncociyandika
Ikuti naa kuli kaambo keelede kutupa kusyoma kuti kupenga kuyoomana, nkokuti bulangizi buli boobu bulakonzya kutugwasya kucinca mbotububona buumi alimwi ambotumubona Leza buya.
Ncomweelede Kuyeeya
Bantu banji balayanda kukumana kupenga, pele tabajisi nguzu zyakucita boobo. Amubone twaambo ootu tutobela:
Nokuba kuti kuli kuyaambele mumakani aabusilisi . . .
-
Malwazi aamoyo azumanana kujaya bantu banji kwiinda malwazi aambi.
-
Bulwazi bwakkansa bulajaya mamiliyoni aabantu mwaka amwaka.
-
Mumagazini yakwe iitegwa Frontiers in Immunology, Dr. David Bloom wakalemba kuti: “Bantu munyika bazumanana kulwanwa amalwazi aakaindi, mapya alimwi ayaayo aakaliko kaindi, pele aatalika kubbuka alimwi.”
Nokuba kuti mumasi aamwi kuli lusumpuko kujatikizya zintu zyakumubili . . .
-
Mwaka amwaka, mamiliyoni aabana balafwa. Kanji-kanji eeci cilacitika mumasena oomo bantu mobali bacete kapati.
-
Mabbiliyoni aabantu bakkala mumasena muli tombe.
-
Mamiliyoni aabantu tabajisi maanzi aali kabotu.
Nokuba kuti bantu mazuba aano balizyi mbobeelede kubeendelezya bantunyina . . .
-
Lipooti yaba United Nations yakaamba kuti: “Cilengwa cakubba bantu cazumanana muzisi zinji alimwi bantu ibacita micito eeyi kunyina nobasubulwa pe. Cili boobu ambweni akaambo kakuti mfwulumende tazizyi kuti cilengwa eeci cilacitika naa ambweni tazijisi zibelesyo zyakubelesya kusubula bantu bali boobu.”
AMWIIYE ZINJI
Amweebelele kavidiyo kakuti Ino Bwami bwa Leza Ninzi? ikali a jw.org.
Ncolyaamba Bbaibbele
Leza ulatubikkila maano.
Ulikubwene kupenga kwesu abuumba bwesu.
“[Leza] kunyina naasampaula naa kusesemwa mapenzi aamuntu uupengede; kunyina naasisa busyu bwakwe kulinguwe. Naakamukwiilila kuti amugwasye, wakamumvwa.”—INTEMBAUZYO 22:24.
“Kamuwaala makatazyo aanu oonse kulinguwe, nkaambo ulamubikkila maano.”—1 PETRO 5:7.
Kupenga kuyoomana, takukazumanani pe.
Bbaibbele lisyomezya kuti makanze aa Leza kujatikizya ndiswe ayoozuzikizyigwa.
“Leza . . . uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—CIYUBUNUZYO 21:3, 4.
Leza uyoozigwisya zintu zipa kuti bantu kabapenga.
Uyoocita oobu kwiinda mukubelesya Bwami bwakwe, bwalo Bbaibbele mbolyaamba kuti mfwulumende ini-ini.
“Leza wakujulu uyoobikka bwami ibutakanyonyoonwi pe. Bwami oobo tabukapegwi kubantu bambi pe. . . . mpoonya bwalo bulikke buyakwiima nji mane kukabe kutamani.”—DANIELE 2:44.
