5 A ku xaniseka ku ta tshuka ku mbhela?
Hikuyini zvi nga zva lisima a ku tiva lezvo
Loku hi kholwa lezvaku a kuxaniseka ku ta mbhela, a kukholwa loko ku nga hi maha hiva ni mawonela ma nene hi wutomi ku tlhela ku hi vhuna lezvaku hi tshinela ka Nungungulu.
Ehleketa hi mhaka leyi
A vanhu vo tala va zvi lava ku fuvisa ku xaniseka kanilezvi a va na ntamu kutani wutlhari ga ku maha lezvo. Hi cikombiso:
Hambu lezvi ku nga ni wutlhari ga hombe ga ku tira mababyi . . .
A mababyi ya mbilu ma daya vanhu vo tala nguvhu.
A kankro yi daya a vanhu va timiliyoni lembe ni lembe.
Dr. David Bloom i wula lezvaku hambu lezvi nyamutlha ku nga ni mimuri yo tala ya yiswa, a vadhokodhela a va zvi koti a ku tira mababyi yo tala. A cin’wani kambe, a vanhu va kuma mababyi ya maswa hambu hi lawa yaku ma wa nga se woniwa kanilezvi na ma hi ni malembe na ma hi kona.
Hambu lezvi a matiko yo kari ma ganyileko . . .
Lembe ni lembe kufa zvivanana zvo tala. Lezvo zvi maheka nguvhu ka matshamu lawa ku nga ni wusiwana.
Ku na ni vanhu vo tala va hanyako na va nga hi na ndlela ya ku maha basiselelo ya yi nene.
A ku hundza 100 wa timiliyoni ta vanhu a va na mati ya ku basa.
Hambu lezvi a vanhu va tivako lezvi va faneleko ku va khomisa zvona van’wani . . .
Ka matiko yo tala, a vanhu va ha simama ku xavisiwa niku a vanhu lava va mahako lezvo a va khon’wi. Kuzvilava lezvo zvi maheka hi ku a mufumo “a wu zvi tivi kutani ku a wu na ndlela ya ku khoma a vanhu lavo”, ku wula a mubiko wa ma Nações Unidas.
GONDZA ZVIN’WANI
Sixtira a vhidhio leyi yaku Xini a Mufumo wa Nungungulu? ka jw.org.
Lezvi a Bhibhiliya gi wulako
Nungungulu wa khatala hi hina.
Wa ku wona kurila ni kubayiseka ka hina.
‘[Nungungulu] a nga kanyisangi hambu ku nyenya a kuxaniseka ka loyi a xanisekako, cima a nga mu fihlelangi a nghohe yakwe; kanilezvi i no muzwa laha a nga mu rilela.’ — LISIMU 22:24.
“Vekani a kukarateka ka n’wina kontlhe hehla kakwe hakuva wa mu khatalela.” — 1 PEDRO 5:7.
A kuxaniseka ku nga ta simama kala rini
A Bhibhiliya gi tsumbisa lezvaku a kungo ga Nungungulu hi hina gi ta maheka.
“Nungungulu . . . i ta kulula mihloti yontlhe matihlweni yabye, ku nga ta hava ni kufa, hambu ni hlomulo, kutani kurila, ni kubayisa.” — KUVHULULELWA 21:3, 4.
Nungungulu i ta fuvisa lezvi zvi mahako ku vanhu va xaniseka.
I ta maha lezvo hi ku tirisa a Mufumo wakwe.
‘Nungungulu wa le tilweni i ta vhuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka gin’wani tiko. . . . Wona wu ta ku tsondzoma kala kupindzuka.’ — DANIELI 2:44.
