Usange tingasanga ukaboni wakuti masuzgo ghazamumara, vingawovwira kuti tiwonenge mwakwenelera Chiuta kweniso umoyo withu.

Ŵanthu ŵanandi ŵakukhumba nga ŵangamazga masuzgo kweni ŵangakwaniska yayi. Wonani fundo izi:

Nangauli ŵanthu ŵabowozga minkhwala yinandi kweni . . .

• Ŵanthu ŵanandi ŵakulutilira kufwa chifukwa cha nthenda ya mtima.

• Kansa yikukoma ŵanthu mamiliyoni chaka chilichose.

• Dr. David Bloom wakalemba kuti: “Nangauli madokotala ghabowozga minkhwala yinandi kweni ŵakuchizga yayi matenda ghose chifukwa matenda ghakwizirakwizira ndipo pali matenda ghanyake ghakuti ŵakughamanya yayi.”—journal Frontiers in Immunology.

Nangauli vyaru vinyake ni visambazi chomene kweni . . .

• Chaka chilichose ŵana mamiliyoni ghanandi ŵakufwa chomenechomene ku malo uko ŵanthu mbakavu.

• Ŵanthu mabiliyoni ghanandi ŵalije vinthu ivyo vingaŵawovwira kuti ŵaŵenge ŵaukhondo.

• Ŵanthu mamiliyoni ghanandi ŵakutondeka kusanga maji ghawemi.

Nangauli ŵanthu ŵanandi ŵakumanya wanangwa uwo munthu waliyose wali nawo kweni . . .

• Lipoti linyake likuti: Mu vyaru vinandi ŵanthu ŵakulutilira kwiba na kuguliska ŵanthu ŵanyawo ndipo ŵanthu aŵa kanandi ŵakulangika yayi. Ŵakulangika yayi chifukwa chakuti boma “likumanya yayi, kweniso panji ŵamazaza ŵalije vilwero vyakuti ŵalimbane na ŵanthu aŵa.”—United Nations report.

  MANYANI VINANDI

  Wonelerani vidiyo ya mutu wakuti Kasi Ufumu wa Chiuta Ni Vichi? yikusangika pa jw.org/tum.

Chiuta wakutipwelelera.

Iyo wakumanya masuzgo na vyakuŵinya vithu.

“[Chiuta] wandapepure panji kutinkha suzgo ya wakuyuzgika. Wandabise chisko chake kwa iyo. Wakati walilira kwa iyo kupempha wovwiri, wakapulika.”​—SALIMO 22:24.

“Muthulirani vyose ivyo mukwenjerwa navyo, chifukwa wakumupwelelerani.”​—1 PETROSI 5:7.

Masuzgo ghamalenge.

Baibolo likulayizga kuti khumbo la Chiuta ku ŵanthu lifiskikenge.

“Chiuta . . . wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”​—CHIVUMBUZI 21:3, 4.

Chiuta wazamuwuskapo vyose ivyo vikupangiska kuti ŵanthu ŵasuzgikenge.

Wazamuwuskapo masuzgo para Ufumu wake wamba kulamulira.

“Chiuta wakuchanya wazamwimika ufumu uwo kuti uzamuparanyika chara. Ufumu uwu uzamupelekeka ku ŵanthu ŵanyake chara. . . . Iwo wekha ndiwo uzamuŵako kwamuyirayira.”​—DANIYELI 2:44.