Kafai e isi se pogai ke tali‵tonu tatou me ka fakagata aka a logo‵maega, e mafai eiloa ne te vaegā fakamoemoega tenā o momea aka te ‵lei o ‵tou kilokiloga ki te olaga penā foki mo ‵tou kilokiloga e uiga ki te Atua.

E tokouke a tino ka ma‵nako ke fakaseai atu a logo‵maega, kae e mu‵tana fua a mea e mafai ne latou o fai. Onoono ki mea konei mai lalo:

Faitalia a poto fakatokita  . . .

• Koi fai eiloa a masaki o te fatu pelā me ko te māfuaga o te ‵mate o tino e tokouke.

• E lau i miliona o tino e ‵mate i tausaga takitasi ona ko te kenisa.

• “Koi pokotia eiloa a tino i masaki ‵fou mo famai ‵pisi fakama‵taku kolā ko toe ‵sae mai,” ko pati ne tusi mai ne Dr. David Bloom i te tusi ko te Frontiers in Immunology.

Faitalia te mau‵mea o nisi fenua  . . .

• I tausaga takitasi, e lau i miliona o tama‵liki e ‵mate, kae pokotia malosi i ei a latou kolā e ‵nofo i fenua ma‵tiva.

• E lau i piliona o tino e ‵nofo i koga lai‵lai.

• E fia selau miliona o tino e se maua ne latou a vai ‵ma.

Faitalia te gasolo aka ki luga o te malamalama i saolotoga o tino . . .

• E uke a fenua koi tumau loa i te kai‵soa tino ke ‵togi atu ki tua, kae ko fenua kolā ne seki fakasala ne latou a tino solitulafono konei, e “faka‵kivi olotou mata ki te fakalavelave, io me e se toka ‵lei ke fakasala a vaegā tino penā,” ko pati i se lipoti mai te Malo ‵Soko.

  KE TAULOTO KI MEA E TAI UKE ATU

  Onoono ki te vitio Se a te Malo o te Atua? i te jw.org.

A te Atua e atafai mai ki a tatou.

E saga mai a ia ki ‵tou logo‵maega mo ‵tou puapuaga.

“Ne seki fakatauemu io me takalialia a [te Atua] i logo‵maega o te tino puapuaga; ne seki ‵funa ana mata mai i a ia. I te taimi ne kalaga atu ei a ia mō se fesoasoani, ne lagona eiloa ne ia.”—SALAMO 22:24.

“‵Pei atu . . . otou manava‵sega katoa ki luga i a ia, me e atafai a ia ki a koutou.” —1 PETELU 5:7.

Ka se tumau eiloa a logo‵maega ki te se-gata-mai.

E tauto mai te Tusi Tapu me ka fakataunu eiloa a te fuafuaga a te Atua mō tatou.

“Kae ko te Atua . . . ka ‵solo kea‵tea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae.”—FAKAASIGA 21:3, 4.

Ka fakaseai atu ne te Atua a mea kolā e māfua mai i ei a logo‵maega o tino.

Ka fai ne ia te mea tenei e auala i tena Malo, telā e fakamatala mai i te Tusi Tapu me se pulega tonu.

“Ka fakatu aka ei ne te Atua o te lagi se malo telā ka se mafai o fakaseai. Kae ko te malo tenei ka se tuku atu ki se isi atufenua. . . . Ka tumau eiloa a te malo tenā ki te se-gata-mai.”—TANIELU 2:44.