5 ¿Mi chkʼot van yorail ti muʼyuk xa chkil jvokoltike?
¿Kʼu yuʼun ti skʼan jnaʼtike?
Kʼalal jpatoj koʼontontik ti chlaj skʼoplal li vokolile jaʼ tskoltautik sventa xijmuyubaj noʼox xchiʼuk ti lekuk kʼusi jnoptik ta stojolal li Diose.
Nopo ta sventa liʼe
Epal krixchanoetike oy van ta yoʼontonik chakʼbeik slajeb li vokoliletike, pe mu kʼusi mas stakʼ spasik. Kʼelo avil li kʼusitik kʼotemik tal ta pasele:
Akʼo mi ep xa kʼusitik xchanojik tal li doktoretike...
-
... li chameletik ta koʼontontike jaʼ onoʼox li kʼusi chcham-o epal krixchanoetik ta spʼejel balumile.
-
... li kansere ta smiyonal xa noʼox krixchanoetik ta smil jujun jabil.
-
... «li krixchanoetike jech-o ch-ipajik ta tsatsal infeksionetik. Jech xtok, lokʼanuk xa talel achʼ chameletik o chaʼayan xa talel yan chameletik ti chʼayemik xa ox ta alele», jaʼ jech la stsʼiba li economista xchiʼuk demógrafo David Bloom li ta revista sventa inmunología (Frontiers in Immunology).
Akʼo mi jkʼulejik tajek junantik lumetike...
-
... ta smiyonal xa noʼox ololetik chchamik jujun jabil, mas to li ta lumetik ti abol sbaik tajeke.
-
... epal miyon krixchanoetik te nakalik ta lumetik ti bu te noʼox tstsob sba li skʼaʼepike.
-
... ta sienal xa noʼox miyon krixchanoetik muʼyuk yaʼalik sventa xuchʼik.
Akʼo mi mas xa oy sderecho li krixchanoetike...
-
... ta epal lumetike, jech-o chilbajinik o chchonik li krixchanoetike. Jech kʼuchaʼal chal li Naciones Unidas, oy lumetik ti «mu xakʼik venta li kʼusi yakal chkʼot ta pasele o muʼyuk kʼusi tspasik sventa xchapanik li kʼopetik taje».
SVENTA XANABE MAS SKʼOPLALE
Kʼelo ta jw.org li video ¿Kʼusi jaʼ li Ajvalilal yuʼun Diose?
Li kʼusi chal Vivliae
Oyutik ta yoʼonton li Diose
Li Diose toj kʼux chaʼi kʼalal chkil jvokoltike.
Li Diose «muʼyuk spʼajoj xchiʼuk muʼyuk chopol yilojbe svokol li buchʼu ilbajinbile; muʼyuk bu snakʼoj sat ta stojolal. Chikintabat kʼalal xvokolet la skʼan koltael ta stojolale» (SALMO 22:24).
«Akʼbeik me sbain skotol li kʼusi chavul-o avoʼontonike, yuʼun oyoxuk ta yoʼonton» (1 PEDRO 5:7).
Muʼyuk me jech-o chkil jvokoltik
Li Vivliae chal ta jamal ti tslajesbe-o skʼoplal vokolil li Diose.
«Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik» (APOKALIPSIS 21:3, 4).
Li Diose tslajesbe skʼoplal li kʼusi chakʼ jvokoltike
Taje jaʼ tstunes li Ajvalilal yuʼune, jech kʼuchaʼal chal li Vivliae, jaʼ jun melel Ajvalil.
«Li Dios te oy ta vinajele tsvaʼan jun ajvalilal ti muʼyuk bu chichʼ chʼaybel-o skʼoplale. [...] Vaʼun stuk xa noʼox te chkom sbatel osil» (DANIEL 2:44).
