Inlēnö Hī Ṙāmölōn El Pati Re
Inlōntö hī ön nö kahëtö ngam Tēv ngam pinīhö, tö yip nyīö inrē. Lökten anga-aṅ nö kētö inlēnö hī nö löknyö imat ngam töhet līpöre, pön lōnu tö hī ṙôkhöre ṙāmlōn el patire. Ta-a chěi töi ngëchken minë inlēnöre kahëtö ò.
Yī-ö Kikōnyö Töpīhövö, Hāngenlōn Tö Më Pīhöre Kikānö
“Hòṅ ngatī hanāngenlōn yin yī-ö kikōnyö tö pīhövö tö më pihöre, sāre tö alahare. Ngòh töhāngenlōn tö pihöre hāngenlōn töre; Pòn öt tarīku tösumrīk tö alahare; haṙūötken e pöri.”—EFISÖS 5:28, 29.
Kūi ngam mikūönö ön ngam kikōnyö tö pihövö. (Efisös 5:23) Öt tö ngö manah pöri angu-ö tö ò nö miyë tö ngam pihöre hēk hakeūḵ chööngöre inrē. Hòṅ milēḵṙen ngam kikōnyö tö ngam pihöre, chumkūöṙen inrē tö ò. Hòṅ hateungngö nup kūilōn ò hēk hāngenlōn inrē tö ò. Yē öp pihö ò nö haṙivlōn hareuskö alaha ò anga-aṅ. Ötkô anga-aṅ nö ngölōn ngam pihö chu an hamang ṙô chu. (Filipī 2:4) Örheūheu anga-aṅ nö vë-ekūö ngam pīhöre, öt hāyunku tö nup ṙôre, hangihtöre inrē tö ṙô ngam pihöre. Öt “la-al kūö” pihöre öp tö akaha inpīhö kikōnyö, öt fël öp pīhöre hēk öt miṙivngölōn ò tö nup tö chökhu ṙô re.—Kòlòsī 3:19.
Yī-ö Kikanö Töpihövö, Milēḵṙen Tö Më Pihöre Kikōnyö
“Ngëicha ngam kikānö töpihövö inrē hòṅ ò nö pahë-e ngam pihöre.”—EFISÖS 5:33.
Hòṅ milēḵṙen ngòh kikānö tö ngam pihöre kikōnyö. Yěn kēḵ fësla ngam pīhö ò ngaich hòṅ holṙen ò anga-aṅ. Yěn vach ngam pihö ò, öt miṙēḵngen ò anga-aṅ nö inup ṙô re. Yē ò min nö ngati inlahen, ngaich lanāmö min nö el ngam pati cha. (1Pītör 3:4) Yēn ōt nup miṙivlōn ò, ngaich hòṅ chöh öp tölöng anga-aṅ ṙētak re nö vë-ekūöm pīhöre, hol tö minlēḵṙenre pöri.—Mumkahten 3:7.
Haköpngöre I Ngam Pihöre
“Lökten ön min ngòh tarik nö . . . haköpngöre min nö im pīhöre: ngaich chā-a min nö hēngö alaha.”—RANEHLÖ 2:24.
Yēn hapīhö mina kikōnyö-kikānö, hēten e min cha-a nö hěngö alaha. Yēḵ cha nö örheūheū nö vë-ekūöre, chumkūöṙen tö nup kuilōn höö i nup tö rahëchyen, ngaich ṙāmölōn min cha-a ngön inrē ngam innôlö cha. Ötkô cha-a nö asěhkö tahëng. Yē cha min nö ngati inlahen falal min ngam pinīhö cha ngaich öt köp min ngam ṙinatö ellōn cha nö in höö, taṙōl min nö mihôiṅ ngam mikūönö cha.—Heprāi 13:4.
Yī-ö Inyööngö, Haköptö Më Kūönre
“Haköptö ngam nyīö el talöökö ò nö kiröönngöre, ngaich yē ò nö köiny öthō min anga-aṅ nö ṙāngen e.”—INCHŌḴ-OṘÔ 22:6.
Kētö la-en më inyööngö ngam Tēv nö haköptö kūön re. Ötkô cha-a nöng ṙô-òvö, pòn hòṅ hakôten re nö hachōḵ elmat më nyīö. (I.Chööngö 6:6, 7) Yē më nyīö nö vach, ngaich ötkô mina inyööngö nö tainy. Pòn hòṅ hangihtöre tö ṙô cha. (Yāköp 1:19) Yē meh halēnö më nyīö ngaich holtö hanangenlōnre öm halēnö cha.
Yī-ö Nyīö Hang Ṙô Mina Yöngre
“Yī-ö nyīö, un ahôngen më inyöngö . . . Milēḵṙen man tö minā yöngre.”—EFISÖS 6:1, 2.
Hòṅ hang ṙô mina yöngre yin vē nyīö hēk hòṅ milēḵṙen inrē tö cha. Yē cha min nö ngati inlahen, lanamö min nö el ngam mikūönö cha, ṙamölōn min cha-a inrē. Pòrô më nyīö nö kiröng, sön cha-a nö hòṅ milēḵṙen tö mina tököiny yöngre, meukṙen cha inrē. Yē mina yöng cha nö öt mi-iyöng patī cha, ngaich hòṅ hayöökaṙen cha-a tö më kūön re i nup tö rahëchyen la-en tötkô nö kahëken mina tököiny. Chumkūöṙen inrē tö nup hanakten cha.—1 Timôtī 5:3, 4.
