«Jia tooloyuukana, anakaja müleka aire jüpüla juʼwayuuse waneʼewaʼire jukua, [...] maa aka alin jia jüpülajiraa. Chi wayuu eekai alin nüpüla nuʼwayuuse, aijiraashi nia nüpüla süka tia. Wane wayuu, nnojotsü kanain naaʼin niʼiruku, shia eeka naaʼinmajüin shia» (ÉFESO 5:28-30).

Nia laülaaka saaʼu nüpüshi chi toolokoi (Éfeso 5:23). Nnojotpejeʼe müliainjatüin saaʼin nüpüshi nutuma. Kojutuinjatü nümüin nuʼwayuuse, naapüinjatü tü kasa choʼujaakat sümüin otta tü kasa talatüinjatkalü atuma saaʼin. Nnojoishi macheʼinjachin nia süchiirua tü keeʼireekat naaʼin, kapülainjatü naaʼin sukuwaʼipa nuʼwayuuse (Filipos 2:4). Yootuinjachi nia sümaa jee naapajüinjatü tü sümakat nümüin. Nnojoishi nia aashichijaainjachin sümüin, nnojotsü niʼyaatüinjatüin otta nnojotsü müliainjatüin saaʼin nutuma (Colosas 3:19).

«Akaʼaya jiakana jieyuukana, anakaja müleka kojutule jütüma juʼwayuuse» (ÉFESO 5:33).

Anajiraasü wanee wayuu nümaa suʼwayuuse kojutule sümüin chi suʼwayuusekai otta kojutule sümüin tü kasa naaʼinrakat süpüleerua. Mojukuwaʼiparüle wanee kasa nutuma, nnojoishi mojutuin nia sümüin, nnojotsü shia aashichijaain nümüin (1 Pedro 3:4). Süküjainjatpa nümüin wanee kasa nnojotka anain nutuma, yootusü shia nümaa anashiipa shia namüin. Süküjain tia nümüin sümaa shiiʼiyatüin nujutu nümüin (Eclesiastés 3:7).

«Müshijeseʼe nükatalaainjachin maaʼulu yaa wane wayuu shipialuʼujee nii je nipialuʼujee nüshi süpüla waneeshinjachin sünain saʼaniraainjatüin nukuaippa nümüiwa sümaa nuʼwayuuse süpüla paaʼinwajiraainjanain naya» (GÉNESIS 2:24).

Kasaatpa wanee wayuu sümaa nuʼwayuuse, aʼaniraaitpa nakuwaʼipa. Nachajaainjatpejeʼe sukuwaʼipa süpüla nnojoliinjanain nooʼulaajiraain jee yootiraainjana naya. Eeshii süpüla nakaalinjiraain jee kamaneejiraain naya. Waneepiainjachi wanee wayuu sümaa nuʼwayuuse jee nnojoishi nia aainkaainjachin sümaa wane naatajatü. Nnojotsü anain kawalaʼatale nutuma nuʼwayuuse, nnojoleerü anain nakuwaʼipa jee ooʼulaajiraajeena naya sutuma tia (Hebreokana 13:4).

«Pikiraja püchon wanaajiraa sümaa tü wopu kaluʼuinjachikat nia; laülaapa nia nnojoleechi ojunujaain suulia» (PROVERBIOS 22:6, noota).

Na wayuu kachonshiikana, nekirajüinjana nachonnii. Nekirajüinjana naya sünain tü nakuwaʼipainjatkat jee anainjatia nakuwaʼipa napüleerua (Deuteronomio 6:6, 7). Nanouteʼeruinjatü nakuwaʼipa nachonnii nnojorüle anain shia. Nachiaapa naya, jülüjainjatü naaʼin tü namakat namüin.  Nnojoishii asounnajaainjanain pejeewa namüin nachonnii jee nnojoishii naya aashichijaainjanain namüin (Santiago 1:19). Nachiaainjanapa nachonnii na wayuukana naaʼinrajatü shia süka anaka akuwaʼipa. Nnojoishii naya aashichijaainjanain namüin.

«Jia achonlu [...] anakaja müleka joonoole sümaa sünüiki jii je nünüiki jüshi [...] “Kojut pütüma püshi otta püi”» (ÉFESO 6:1-3).

Oonooinjana na tepichikana sümaa sünüiki nei jee nünüiki nashi otta kojutuinjana naya namüin. Kojutule nümüin wanee wayuu nüshi sümaa nii, anasü nakuwaʼipa namaa jee anajiraashii naya. Kojutule namüin nashi sümaa nei na wayuu miyoʼuyuuinnapakana, naaʼinmajüin naya, nakaalinjain naya sünain anouteʼeraa tü kasa amojujaakat miichipaʼa otta naapüin nneerü namüin süpüla tü kasa choʼujaakat namüin (1 Timoteo 5:3, 4).