“Ayatan na lallaki i gi-attawad-da ta kunna pangaya da ta baggi da. I lalaki nga mangaya ta atawa na ay ayatan na i baggi na mismu. Ta awan tu tolay nga mangikalussaw ta baggi na, nu ari pakanan anna immuguran na.”​—EFESO 5:28, 29.

I atawa nga lalaki i ulu na familia. (Efeso 5:23) Ngem ari tu abusadu onu fermi ka-istrikto na mapia nga atawa nga lalaki. Tagibaloran na si bako na anna iyawa na i material anna emosional nga pakawagan na. Ikaguman na gapa nga mapagayayya yayya anna arianna ipilit i ikaya na. (Filipos 2:4) Kagian na kani bako na i mataga-tageno anna i nononopan na. Ginnan na gapa i kakkagian ni bako na. Ari na nga “tazza-tazzian” si bako na anna ari na gapa yayya takitan ta pisikal onu emosional.​—Colosas 3:19.

“Mawag gapa tu i babbay ay ikakua da i gi-attawad-da.”​—EFESO 5:33.

Nu irespeto na babay si lakay na anna suportan na i desision na ira, mabbalin tu memammo i familia da. Nu makkamali si lakay na, ari na yayya nga tagibaddikan. Masippo anna marespeto lapa yayya kani lakay na. (1 Pedro 3:4) Nu egga i problema nga mawag nga ikagi na kani lakay na, maginnag yayya tu makasta nga tiempo tapenu marespeto nga ikagi yatun ta nisa.​—Eclesiastes 3:7.

“Makipattadday [i lalaki] ta atawa na, anna mabbalin ira nga tattadday nga pattag.”​—GENESIS 2:24.

Nu magatawa i lalaki anna babay, mabbalin tu meggo i relasiodda. Ikagumadda gafu nga paladdan i pagatawa da ta kanayudda nga pakka-iistoria anna pabbalidda tu masippo ta kataggi-tadday. Matalo nakuan ira ta kataggi-tadday. Ari ira nga maki-sex ta ari da atawa ta matakitadda i atawa da anna daralan naw i pattalo anna maski i familia.​—Hebreo 13:4.

“Sanayammu i abbing ta dalan nga mawag tu angngayan na; maski nu mallakay yayya ay arianna yatun panawan.”​—PROVERBIO 22:6.

Niyawa na Dios ta nikamu nga magana i responsibilidad nga tudduan i ána nu. Ituddu nu ta nira i makasta ira nga ugali anna mabbalikkamu tu makasta nga pamarigan. (Deuteronomio 6:6, 7) Nu makaliwa i ana nu, ari kamu nga feffermi nga mapporay. “Mawag tu sigga-parak-kamu nga magginna, memmugug ta paguvovug, anna ari insigida nga mallussaw.” (Santiago 1:19) Nu mawag nga disiplinan na magana i ana, madisiplina nakuan megafu ta aya, ari tu megafu ta poray.

“Sikamu nga ána, annungan nu i nacristianuan nga pakimoray nu ta mappagana nu . . . ‘Ikakuam i yamam anna yenam.’”—EFESO 6:1, 2.

Mawag nga tuppalan anna irespeto na ána ira i magana da. Nu ikakua da i magana da, mabbalin tu magayayya, memammo, anna mattaradday i familia da. Nu siguraduan na adulto ira nga ána nga matangngallan i magana da, mepasingadda i pangikakua da ta nira. Nelagum tatun i panuffun ta trabahu ta balay onu i pangiyawa ta finansial nga pakawagadda.​—1 Timoteo 5:3, 4.