“[Malunga] vatela kuzanganga mapwevo javo nganomu vazanga mijimba yavo. Lunga uze azanga pwevo lyenyi alizanga ivene, mwomwo kakweshi mutu ahunga mujimba wenyiko, oloze eji kuulisanga nakuuzakamanga.”—WAVAKA-EFWESU 5:28, 29.

Lunga apwa mutwe watanga. (Wavaka-Efwesu 5:23) Oloze lunga wamwenemwene kapwa muka-kukaluhwisa muchima, chipwe kushinjila puwenyi alinge vyosena ovyo nasake ikiyeko. Amona puwenyi kupwa wamulemu nakumuzakama nakuhanjikanga nenyi mujila yalikoji. Kasaka kutakilika munayi muchima wenyiko, oloze eji kukilikitanga nangolo mangana asuulwise puwenyi. (Wavaka-Fwilipi 2:4) Eji kushimutwilanga nenyi namuchima wakukasunuka, nakumwivwilila nawa nge ali nakuhanjika. Kaha nawa ‘kamukwachila chikuma matoto’ chipwe kumupupula, chipwe kumwamba mwamupiko.—Wavaka-Kolose 3:19.

“Pwevo atela kupwa nakalemesa chikuma kuli lunga lyenyi.”—WAVAKA-EFWESU 5:33.

Nge pwevo mwavumbikanga lunga lyenyi nakuzachila nenyi hamwe, kaha mutanga namupwa kuunda. Nge lunga lyenyi nalimbenje, keshi kumumona kupwa wakuhona manganako, oloze mwatwalaho kulikehesa nakumuvumbika. (WaPetulu 1, 3:4) Nge ali nakusaka kulweza lunga lyenyi ukalu umwe, mwasakula lwola lwamwaza nakuhanjika nenyi mukavumbi.—Muka-kwambulula 3:7.

“Lunga . . . [mwakalipanjika] napwevo lyenyi, kaha navakapwanga mujimba umwe.”—KUPUTUKA 2:24.

Nge valunga napwevo vanalimbate, veji kupwanga nausepa wakukola chikuma. Shikaho vaze vanalimbate vatela kuzamisa ulo wavo hakushimutwilanga mujila yakukasunuka nakulisolwela likoji. Vatela nawa kusolola kushishika chavo hakuhona kulisavala namutu weka. Kulinga ukoji chapwa chachipi. Cheji kulingisanga vapwevo nalunga vahone kulifwelela nakuvalingisa valilukulule.—WavaHepeleu 13:4.

“Longesa mwana mwaya jila yize atela kuya, mangana numba nge nakolo, akazeneke kufumamo.”—VISHIMO 22:6, kwinyikila chamwishi.

Kalunga ahana visemi mulimo wakunangula vana vavo. Echi chasakiwa kuvanangula vapwenga navilinga vyamwaza nakuvahana nawa chakutalilaho chamwaza. (Lushimbi lwamuchivali 6:6, 7) Nge mwana nalingi vyuma vyavipi, chisemi wamangana keshi kupihilila washiko. Eji ‘kwanguhwanga  kwivwilila nakushipwokela kuhanjika nakushipwokela kukwata utenu.’ (WaYakova 1:19) Nge chisemi namono ngwenyi mwanenyi ali nakusakiwa kumuzangamisa, kaha atela kumuzangamisa muzangi, keshi nautenuko.

“Enu vana, ononokenunga kuli visemi jenu . . . ‘Vumbikenunga masenu namanenu.’”—WAVAKA-EFWESU 6:1, 2.

Vana vatela kwononokanga visemi javo nakuvavumbikanga. Nge vana navavumbikanga visemi javo kaha mutanga namupwa kuwahilila nakuunda. Vana vaze vanakolo lyehi veji kusololanga ngwavo vavumbika visemi javo hakuvazakama. Vanahase kuvazakama hakuvawahishilako zuvo chipwe kuvahana jimbongo jakulikafwa najo.—WaChimoteu 1, 5:3, 4.