Qe tbʼanel consej tuʼn qtzalaj kyukʼil toj qja
Jun oyaj mejebʼleʼn ex qe kʼwal tuʼn Dios. Tuʼnju taj tuʼn qtzalaj kyukʼil toj qja, in tzaj tqʼoʼn tbʼanel consej qe toj Xjan Uʼj. Toj xnaqʼtzbʼil lu, kʼelel qnikʼ kyiʼj junjun consej lu.
Aqeye chmilbʼaj, kykʼujlame kyxuʼjile
«Ax ikx qe chmilbʼaj kykʼujlam kyxuʼjil ik tzaʼn in kykʼujlaʼn kyximlal. Aju xjal in tkʼujlaʼn t-xuʼjil in tkʼujlan tibʼ. Porke mi jun xjal nneʼl tikʼun t-ximlal, noq oʼkx in tkʼaʼchan ex kwentin tuʼn» (EFESIOS 5:28, 29).
O txi qʼoʼn toklen chmilbʼaj tuʼn tok te nejenel toj ja (Efesios 5:23). Pero jun tbʼanel chmilbʼaj, mintiʼ in kubʼ tyekʼin nya bʼaʼn tmod tukʼil t-xuʼjil, sino in nok tqʼoʼn toklen, in nok tkʼaʼchin ex in ximen tiʼjju in kubʼ tnaʼn. Ax ikx, in nok tilil tuʼn tuʼn ttzalaj t-xuʼjil ex mintiʼ in xi tqʼamaʼn tuʼn tbʼant oʼkxku te tajbʼil (Filipenses 2:4). Aj tyolin tukʼil t-xuʼjil, in xi tqʼamaʼn aju in kubʼ t-ximen ex aju in kubʼ tnaʼn, pero ax ikx in nok tqʼoʼn twiʼ tiʼj tyol t-xuʼjil. Nya jun rat in tzaj tqʼoj tiʼj t-xuʼjil ex mintiʼ in nok tbʼinchaʼn nya bʼaʼn tiʼj tukʼil tyol nix tukʼil tbʼinchbʼen (Colosenses 3:19).
Xuʼjilbʼaj, qʼonka toklen tchmila
«Ax ikx te xuʼj nimanx tchmil» (EFESIOS 5:33).
In nonin xuʼjilbʼaj tuʼn tten mujbʼabʼil toj tja aj tok tqʼoʼn toklen tchmil ex aj tonin tiʼjju in kubʼ t-ximen. Qa ma tzʼel txalpaj tchmil, kukx in nok tqʼoʼn toklen ex mintiʼ in tzaj tqʼoj tiʼj (1 Pedro 3:4). Ex qa taj tuʼn tyolin tiʼj jun nya bʼaʼn tukʼil tchmil, ojtzqiʼn tuʼn toj alkye ambʼil tuʼn tyolin tukʼil ex toj tumel in xi tqʼamaʼn (Eclesiastés 3:7).
Miʼn pon tkʼuʼja tiʼj juntl xjal
«Kyjel tqʼoʼn xinaq tman ex ttxuʼ [...], ex kykabʼil che okel te junx» (GÉNESIS 2:24).
Aj tmojeʼ jun xinaq tukʼil jun xuʼj, in xi tzyet jun tbʼanel kʼujlabʼil kyxol. Tuʼntzunju, nim toklen tuʼn tok tilil kyuʼn tuʼn kukx tten kʼujlabʼil lu kyxol. ¿Tzeʼn jaku bʼant jlu kyuʼn? Jaku bʼant kyuʼn aj t-xi kyqʼamaʼn aju in kubʼ kynaʼn ex aj t-xi kyqʼoʼn jun oyaj te kyukʼil. Ax ikx, qa mintiʼ ma che kubʼ kuẍe tukʼil juntl xjal aju nya kychmil moqa kyxuʼjil. Qa ma bʼant jlu kyuʼn, che onil kyiʼj toj kyja tuʼn miʼn ttzaj kybʼis (Hebreos 13:4).
Aqeye mambʼaj, kyxnaqʼtzanxe kykʼwale
«Kyqʼonxe xnaqʼtzbʼil kye kʼwaʼl tuʼn kybʼet tuj bʼe bʼaʼn, oktzun kytijin mlay tzʼel kypaʼn kyibʼ tiʼj» (PROVERBIOS 22:6).
O txi tqʼoʼn Dios oklenj kye mambʼaj tuʼn t-xi kyxnaqʼtzaʼn kykʼwal. In bʼant jlu kyuʼn aj tkubʼ kyqʼoʼn jun tbʼanel techel kywitz ex aj t-xi kyqʼamaʼn kye qa nim toklen tuʼn tten tbʼanel kymod (Deuteronomio 6:6, 7). Aqeju tbʼanel tatbʼaj, nya jun rat in tzaj kyqʼoj qa ma kubʼ tbʼinchaʼn kykʼwal jun nya bʼaʼn, sino in xi kybʼiʼn consej lu: «Bʼaʼn tuʼn t-xi kybʼiʼn naje ju yol, pero mya jurat naj tuʼn kyyoline, ex mya jurat naj tuʼn kyjaw kyaqpaje» (Santiago 1:19). ¿Yajtzun qa ma kubʼ kyximen tuʼn tkubʼ kyqʼoʼn jun tkastiw kykʼwal? Kbʼantel jlu kyuʼn tuʼnju kʼujlaʼn kyuʼn ex nya tuʼnju in che qʼojin.
Aqeye kʼwalbʼaj, che nimane kye kymane
«Aqeye kʼwaʼlbʼaj, [...] kynimanxe kymane ex kytxuʼye» (EFESIOS 6:1, 2).
Nim toklen tuʼn kybʼin kʼwalbʼaj ex tuʼn kynimen kye kyman. Aj tbʼant jlu kyuʼn, in che tzalaj ex in che onin tuʼn tten mujbʼabʼil toj kyja. Aj kychʼiy, in kubʼ kyyekʼin qa in nok kyqʼoʼn toklen kyman aj kyxqʼuqin kyiʼj. Jaku bʼant jlu kyuʼn aj kyonin kyiʼj tukʼil pwaq moqa aj tok kykeʼyin qa bʼaʼn taʼ kyja jatumel in che anqʼin (1 Timoteo 5:3, 4).
Bʼalo ax ikx tgana jlu
JAKU TZALAJA KYUKʼIL TOJ TJAYA
Che jyone onbʼil tukʼe Dios tuʼn kytzalaje toj kymejebʼleʼne
kabʼe xjelbʼitz nya kwest tuʼn tel tnikʼa tiʼj jaku tzʼonin tiʼja tuʼn tel bʼaʼn tmejebʼleʼna.
QE XJEL TIʼJ TYOL DIOS
¿Tajpe Dios tuʼn kyok qxqʼuqin qman aj kytijen?
In tzaj tqʼamaʼn Tyol Dios tiʼ bʼant kyuʼn junjun xjal toj ambʼil ojtxe. Ax ikx, in tzaj tqʼoʼn junjun nabʼil kye qeju in che xqʼuqin tiʼj jun xjal ma tijen.
