Tlen mitspaleuis xiyolpaki ininuaya mochampoyouaj
ToTeotsij kichijki se tlakatl uan se siuatl ma mosenkauakaj uan ma kinpiakaj ininkoneuaj, uan ni eli se nemaktli. Ya kineki ma tiyolpakikaj ininuaya tochampoyouaj yeka techmakatok Biblia, uan nopaya uelis tijpantisej tlen uelis techpaleuis kiampa ma tiitstokaj. Ipan ni tlamachtili tikitasej se keski textos tlen techpaleuis.
Tlakatl, xikikneli mosiua
“Se tlakatl kiiknelis isiua keja moiknelia. Yajaya tlen kiiknelia isiua, moiknelia. Pampa axaka kitlauelkaua itlakayo. Nochi tlakamej kitlamakaj inintlakayo uan kimokuitlauiaj ika teiknelijkayotl. [...] Keja nopa xijmokuitlaui mosiua” (EFESIOS 5:28, 29).
Se tlakatl eli katli kinyakana ichampoyouaj (Efesios 5:23). Maske kiampa kichiua, amo kinchiualtia ichampoyouaj ma kichiuakaj se keski tlamantli, kipatiita isiua, kimaka tlen moneki uan kiyolchikaua. Nojkia, kichiua kampeka kiyolpakiltis isiua uan amo kichiua san tlen ya kineki (Filipenses 2:4). Maske nopa tlakatl kiiljuia isiua tlen kiyolmati uan tlen moiljuia, nojkia kichiua kampeka kitlakakilis. Amo mokualania iuaya, amo kimakilia yon kiyolkokoua (Colosenses 3:19).
Siuatl, xijtlepanita moueue
“Se siuatl moneki kitlepanitas iueue” (EFESIOS 5:33).
Kema se siuatl kitlepanita iueue uan kipaleuia kema kitlapejpenia se tlamantli, kinpaleuia ichampoyouaj kuali ma itstokaj. Uan kema iueue mokuapoloua, ya amo nima kualani, amo kitlaijiljuia uan nojua kitlepanita (1 Pedro 3:4). Uan kema monekis kisenkauasej se kuesoli, kuali moiljuia kema kamanaltis iuaya iueue uan kichiua ika miak tlatlepanitakayotl (Eclesiastés 3:7).
Amo xijkajkayaua monamik
“Se tlakatl [...] mosejkotilis iuaya isiua uan nopa omej mochiuasej san se inintlakayo” (GÉNESIS 2:24).
Kema se tlakatl uan se siuatl mosenkauaj, mochiuaj kejuak san se inintlakayo. Yeka moneki kichiuasej kampeka kuali monojnotsasej uan kinextisej moikneliaj, kiampa nochipa kuali itstosej. Amo kinamiki motekasej ininuaya katli amo eli ininnamik pampa kema se akajya kiampa kichiua, inamik tlauel tlaijiyouia, ayokmo motemachia ipan ya uan ichampoyouaj ayokmo kuali itstosej (Hebreos 13:4).
Tetajmej, kuali xikiniskaltikaj inmokoneuaj
“Xijnextili mokone kema noja pilsiltsi para ma youi ipan nopa ojtli tlen [kinamiki]. Uan kema yajaya ueuejtias noja nopano monejnemiltis” (PROVERBIOS 22:6).
ToTeotsij kinkajtok tetajmej ma kiniskaltikaj ininkoneuaj, yeka moneki kuali kinyakanasej, kinmachtisej ma tlatlepanitakaj uan kinmachtisej ika tlen inijuantij kichiuaj (Deuteronomio 6:6, 7). Tlaj se konetl amo kinneltoka itatauaj, inijuantij amo nima kualanij, kuali kitlakakiliaj uan amo nima kiajuaj (Santiago 1:19). Uan tlaj kiitaj kinamiki kitlalnamiktisej, kichiuasej pampa kiikneliaj uan amo pampa kualantokej.
Konemej, xikinneltokakaj inmotatauaj
“Xijchiuakaj tlen inmotata uan inmonana inmechiljuiaj [...]. Xikintlepanitakaj inmotata uan inmonana” (EFESIOS 6:1, 2).
Konemej moneki kinneltokasej uan kintlepanitasej inintatauaj. Kema kiampa kichiuaj, kinpaleuiaj ininchampoyouaj kuali ma itstokaj uan ma yolpakikaj. Uan maske ya uejueyij, nojua moneki kinextisej kintlepanitaj inintatauaj. Uelis kiampa kinextisej, kema kiitaj kuali ma elto ininchaj, kinmokuitlauiaj uan kinpaleuiaj ika tomij kema moneki (1 Timoteo 5:3, 4).
Tlen nojkia mitspaktis tikitas
MOCHAMPOYOUAJ UELIS YOLPAKISEJ
ToTeotsij kinpaleuia ma yolpakikaj katli mosenkajtokej
Ome tlajtlanili tlen uelis inmechpaleuis kuali xiitstokaj.
TLEN BIBLIA KINANKILIA
¿Tlake kineki toTeotsij ma kichiuakaj katli kinpiaj inintatauaj katli ya uejueyij?
Biblia kiijtoua tlen kichijkej se keskij tlakamej uan siuamej katli kinmokuitlauijkej inintatauaj uejkajkia. Nojkia kiijtoua se keski tlamantli tlen uelis techpaleuis ipan ni tonali.
